Azərbaycan və Xorvatiya arasında turizm sahəsində

əməkdaşlıq üçün geniş imkanlar mövcuddur

Xorvatiyanın turizm naziri Darko Lorencin rəhbərlik etdiyi nümayəndə heyəti İqtisadiyyat və Sənaye Nazirliyində olmuşdur.

Nazirliyin mətbuat xidmətindən AzərTAc-a bildirmişlər ki, nazir Şahin Mustafayev ilə keçirilmiş görüşdə Azərbaycan və Xorvatiya arasında iqtisadi əlaqələr və əməkdaşlığın genişləndirilməsi perspektivləri müzakirə edilmişdir.

Nazir Şahin Mustafayev yüksək səviyyəli səfərlərin, keçirilən görüşlərin Azərbaycan və Xorvatiya arasında iqtisadi münasibətlərin genişlənməsində xüsusi rol oynadığını vurğulamışdır. Bildirilmişdir ki, parlamentlərarası dostluq qruplarının uğurlu fəaliyyəti, indiyədək Azərbaycan və Xorvatiya arasında 20-yə yaxın sənədin imzalanması əlaqələrin daha da inkişafı baxımından mühüm əhəmiyyət kəsb edir. İqtisadiyyatın müxtəlif sahələrində, o cümlədən turizm sahəsində əməkdaşlıq üçün geniş imkanların olduğunu diqqətə çatdıran nazir Şahin Mustafayev ölkəmizin turizm potensialı və bu istiqamətdə son vaxtlar görülən işlər barədə də məlumat vermişdir.

Xorvatiyanın turizm naziri Darko Lorenc Azərbaycana Beynəlxalq Səyahət və Turizm Sərgisində iştirak etmək üçün gəldiyini bildirmiş və ölkəmizin iqtisadi inkişafından məmnunluğunu ifadə etmişdir. Mövcud imkanlardan səmərəli istifadənin Xorvatiya və Azərbaycan arasında iqtisadi əlaqələrin inkişafında əhəmiyyətini qeyd edən D.Lorenc ölkəsinin turizm potensialı və bu sahədə əməkdaşlıq imkanları barədə danışmışdır.

Azərbaycan.-2014.- 5 aprel.- S.6.