Qafqaz Müsəlmanları İdarəsi Şabran

və Siyəzəndə müşavirələr keçirmişdir

Qafqaz Müsəlmanları İdarəsinin (QMİ) sədri şeyxülislam Allahşükür Paşazadə aprelin 12-də Şabran və Siyəzən rayonlarında olmuşdur.

AzərTAc xəbər verir ki, QMİ-nin sədri əvvəlcə Şabrana gəlmişdir. Şeyxülislam Allahşükür Paşazadə əvvəlcə ümummilli lider Heydər Əliyevin şəhərin mərkəzində ucaldılmış abidəsini ziyarət etmişdir.

Sonra Heydər Əliyev Mərkəzinin konfrans zalında rayonda fəaliyyət göstərən dini icmaların rəhbərləri və dindarların iştirakı ilə müşavirə keçirilmişdir.

Müşavirədə Şabran Rayon İcra Hakimiyyətinin başçısı Novruz Novruzov çıxış edərək ölkəmizdəki nümunəvi tolerantlıq mühitindən, insan hüquq və azadlıqlarının, o cümlədən vicdan və dini etiqad azadlığının yüksək səviyyədə qorunmasından danışmışdır.

Qafqaz Müsəlmanları İdarəsinin sədri şeyxülislam Allahşükür Paşazadə Azərbaycanda mövcud dini durum barədə danışmışdır. Müstəqillik illərində Azərbaycanda dinə və dini icmaların fəaliyyətinə dövlətimiz tərəfindən böyük diqqət və qayğı göstərildiyini vurğulayan şeyxülislam çox sayda məscidin bərpa olunduğunu, yeni ibadətgah yerlərinin yaradıldığını diqqətə çatdırmışdır. Vətəndaşların Prezident İlham Əliyevin yürütdüyü siyasətdən, dini dəyərlərə olan ehtiramından ətraflı bəhs olunmuşdur.

Bildirilmişdir ki, ölkədəki tolerantlıq mühitinin qorunub saxlanması, təhrikçi dini qrupların və qeyri-ənənəvi təriqətlərin zərərli təbliğatının qarşısının alınması istiqamətində bir sıra işlər həyata keçirilir. Görülən tədbirlərin əhali tərəfindən razılıqla qarşılandığı, dindarların maarifləndirilməsi ilə bağlı belə görüşlərin əhəmiyyəti vurğulamışdır.

QMİ-nin sədri son vaxtlar islamda cihad və şəhadət kimi müqəddəs məqamlara dair təhrifli düşüncələrin məqsədli şəkildə cəmiyyətimizə sirayət etdirilməsinə cəhdlər göstərilməsindən təəssüfləndiyini bildirmişdir. Şeyxülislam demişdir: “Bizi narahat edən bir məqam da odur ki, bəzi xarici ölkələrdə baş verən silahlı münaqişələrə qərəzli məqsədlərlə qatılmış həmvətənlərimizin əməllərinin cihad, fiziki məhvinin isə şəhidlik kimi təqdim edilməsidir. Müharibə şəraitində yaşadığımız bir dövrdə bəzi vətəndaşlarımızın digər ölkələrdə baş verən iğtişaşlarda, məzhəb qarşıdurmalarında guya dinin təəssübünü çəkmək adı ilə dinc əhaliyə yönəlik qərəzli və təmənnalı savaşı, çoxsaylı günahsız insanların məhvinə bais olması dinimizin mahiyyətinə ziddir”.

Görüşdə akademik Vasim Məmmədəliyev çıxış edərək dindarların maarifləndirilməsinin vacibliyindən söz açmış, bu cür tədbirlərin əhəmiyyətindən danışmışdır. Azərbaycan xalqında dinə həqiqi inamın olduğunu, dinlər, məzhəblər arasında heç bir qarşıdurma olmadığını, səmimi münasibətlərin formalaşdığını vurğulayan akademik dini parçalanmanın xalqımıza yad bir keyfiyyət olduğunu diqqətə çatdırmışdır.

Bakı İslam Universitetinin rektoru Sabir Həsənli çıxışında bildirmişdir ki, hər bir işdə elmi düşüncəyə, elmi təfəkkürə əsaslanmaq lazımdır. O, İslam yolunu seçən gəncliyin daha savadlı, dünyagörüşlü olmasının vacibliyini qeyd etmişdir.

Şeyxülislam Allahşükür Paşazadə Şabrandakı Xıdırzində məscidini ziyarət etmişdir. Buradakı dini icmanın nümayəndələri ilə görüşdən sonra məscidin təmiri üçün 10 min manat yardım ayrılmış və müxtəlif dini ədəbiyyatlar təqdim olunmuşdur.

Qafqaz Müsəlmanları İdarəsinin sədri şeyxülislam Allahşükür Paşazadə və nümayəndə heyətinin üzvləri Şabrandan sonra Siyəzən rayonunda olmuş, burada dindarlarla görüşmüş, məscidlərin imamlarına, dini icmaların rəhbərlərinə tövsiyələrini vermişlər.

Azərbaycan.-2014.- 13 aprel.- S.4.