Azərbaycan Prezidenti İlham Əliyevin İrana səfəri ikitərəfli əlaqələrin və regional əməkdaşlığın inkişafı baxımından mühüm əhəmiyyətə malikdir

Azərbaycan Prezidenti İlham Əliyevin İrana səfəri iki ölkə arasında əlaqələrin və regional əməkdaşlığın inkişafı baxımından mühüm əhəmiyyətə malikdir.

AzərTAc xəbər verir ki, bu sözləri İranın Azərbaycandakı səfiri Möhsün Pakayin Prezident İlham Əliyevin İrana səfərinin nəticələri ilə bağlı keçirdiyi mətbuat konfransında demişdir.

Səfərin əhəmiyyətindən danışan M.Pakayin Prezident İlham Əliyevin iranlı həmkarı Həsən Ruhani və ölkənin Ali Rəhbəri Seyid Əli Xamenei ilə görüşlərində aparılmış hərtərəfli müzakirələrin önəmini vurğulamışdır. Diplomat, həmçinin səfər zamanı Azərbaycan ilə İran arasında imzalanmış sənədlərin əhəmiyyətini qeyd etmişdir. Bildirilmişdir ki, bu sənədlərdən biri də “Azərbaycan Respublikası Hökuməti və İran İslam Respublikası Hökuməti arasında “Ordubad” və “Marazad” Su Elektrik stansiyalarının tikintisi və istismarı haqqında Saziş”dir. Həmin stansiyaların tikilməsi iki ölkənin elektrik enerjisinə tələbatı təmin etməklə yanaşı, Araz çayının suyunun səmərəli istifadəsinə də zəmin yaradacaqdır.

Ölkələrimiz arasında əlaqələrin inkişafında hökumətlərarası komissiyanın fəaliyyətini qeyd edən səfir bildirmişdir ki, bu quruma hər iki tərəfdən yeni sədrlərin təyin edilməsi komissiyanın fəaliyyətində dönüş yaradacaq və onun işinin sürətlənməsinə səbəb olacaqdır. Komissiya işə başlayandan sonra iki ölkə arasında energetika, turizm və digər sahələrdə əməkdaşlıq daha da möhkəmləndiriləcəkdir.

Diqqətə çatdırılmışdır ki, hər iki ölkənin əməkdaşlığı həm də regional təhlükəsizliyin təmini baxımından önəmlidir. Buna görə də səfər zamanı keçirilən görüşlərdə bölgədəki sabitlik naminə təhlükəsizlik sahəsində əməkdaşlıq məsələləri də müzakirə olunmuşdur.

Ermənistan-Azərbaycan, Dağlıq Qarabağ münaqişəsinə toxunan səfir bildirmişdir ki, İran Prezidenti Həsən Ruhani bu problemin ədalətli şəkildə, beynəlxalq hüquq normaları çərçivəsində həllinin vacibliyini vurğulamışdır.

Azərbaycan.-2014.- 15 aprel.- S.6.