Azərbaycanın müdafiə naziri İrana rəsmi səfərə gəlmişdir

Azərbaycan Respublikasının müdafiə naziri, general-polkovnik Zakir Həsənovun başçılıq etdiyi nümayəndə heyəti İran İslam Respublikasının müdafiə və Silahlı Qüvvələrə dəstək naziri, general-mayor Hüseyn Dehqanın dəvəti ilə Tehrana rəsmi səfərə gəlmişdir.

AzərTAc xəbər verir ki, aprelin 14-də İranın Müdafiə Nazirliyində general-polkovnik Zakir Həsənovun qarşılanma mərasimi olmuşdur.

Sonra iki ölkənin nümayəndə heyətlərinin geniş tərkibdə keçirilən görüşündə regional təhlükəsizlik və digər məsələlər müzakirə edilmişdir.

İranın dost və qardaş ölkə Azərbaycan ilə əlaqələrinin yüksələn xətlə inkişaf etdiyini vurğulayan H.Dehqan ötən həftə Prezident İlham Əliyevin Tehrana rəsmi səfərinin bu münasibətlərin bariz nümunəsi olduğunu bildirmişdir.

Müdafiə naziri Z.Həsənov əsası ulu öndər Heydər Əliyev tərəfindən qoyulmuş Azərbaycan-İran dostluq əlaqələrinin bütün sahələrdə, o cümlədən müdafiə sahəsində uğurla davam etdirildiyini diqqətə çatdırmışdır. Bu əlaqələrin möhkəmlənməsinin bölgədə sülhə və təhlükəsizliyə mühüm töhfə olduğunu qeyd edən Azərbaycanın müdafiə naziri iki dost ölkənin müvafiq nazirlikləri arasında birbaşa əlaqələrin qurulmasının 10 illiyinin tamam olduğunu demişdir.

Zakir Həsənov Ermənistan-Azərbaycan, Dağlıq Qarabağ münaqişəsi nəticəsində Ermənistanın 20 ildən artıq müddətdə Azərbaycan torpaqlarının 20 faizini işğal altında saxladığını, bir milyondan çox azərbaycanlının yurd-yuvalarından didərgin düşdüyünü bildirərək problemin tezliklə həll edilməsinin bölgədə sülhün və sabitliyin bərqərar olmasına töhfə verəcəyini demişdir.

Müdafiə naziri Z.Həsənov general-mayor H.Dehqanı Azərbaycana səfərə dəvət etmişdir.

Sonra Azərbaycanın müdafiə nazirinin başçılıq etdiyi nümayəndə heyəti İranın müdafiə sənayesi sərgisi ilə tanış olmuşdur.

General-polkovnik Z.Həsənov Azərbaycanın İrandakı səfirliyinə gələrək ulu öndər Heydər Əliyevin büstü önünə əklil qoymuşdur.

Müdafiə naziri, general-polkovnik Zakir Həsənovun İrana rəsmi səfəri aprelin 15-dək davam edəcəkdir.

Oqtay Bayramov

AzərTAc-ın xüsusi müxbiri,

Tehran

Azərbaycan.-2014.- 15 aprel.- S.6.