Azərbaycan Qəsəbə Bələdiyyələrinin

Milli Assosiasiyasının yığıncağı keçirilmişdir

Aprelin 17-də Azərbaycan Qəsəbə Bələdiyyələrinin Milli Assosiasiyasının növbəti ümumi yığıncağı keçirilmişdir.

AzərTAc xəbər verir ki, yığıncaqda Azərbaycan Respublikası Prezidentinin Administrasiyasının, Milli Məclisin, Ədliyyə Nazirliyinin, qəsəbə və kənd bələdiyyələrinin milli assosiasiyalarının, qeyri-hökumət təşkilatlarının nümayəndələri iştirak etmişlər.

İclasda bələdiyyələrin fəaliyyətinin əlaqələndirilməsi, onların üzləşdikləri problemlərin həllinə kömək göstərilməsi, ölkədə yerli özünüidarəetmənin inkişafına nail olunması ilə bağlı müzakirələr aparılmışdır.

Azərbaycan Qəsəbə Bələdiyyələrinin Milli Assosiasiyasının sədri Hümbət Hüseynov qurumun illik hesabatı və fəaliyyətinin əsas istiqamətləri barədə məruzə ilə çıxış etmişdir. Bildirilmişdir ki,

Prezident İlham Əliyevin rəhbərliyi ilə Azərbaycanda bütün sahələrdə həyata keçirilən genişmiqyaslı islahatlar, dövlət idarəçiliyinin təkmilləşdirilməsində və sosial-iqtisadi sahədə əldə olunan nailiyyətlər, əhalinin yaşayış səviyyəsinin gündən-günə yüksəlməsi istiqamətində görülən işlər bələdiyyələrin də fəaliyyətinin müasir səviyyədə qurulmasına zəmin yaradır. Ötən dövr ərzində ölkə bələdiyyələri tərəfindən böyük razılıqla qarşılanan və dəstəklənən, bu gün də uğurla davam etdirilən “Bir bələdiyyə azı bir layihə” təşəbbüsü çərçivəsində minlərlə layihə həyata keçirilmişdir.

Təhlillər əsasında müəyyən edilmişdir ki, 2013-ci ildə ölkə bələdiyyələri tərəfindən ümumi dəyəri 16,7 milyon manat olan 4 min 700-dən çox layihə reallaşdırılmışdır. Həmin layihələr arasında daha çox yerli əhəmiyyətli yolların, su arxlarının saxlanılmasını, ərazinin abadlaşdırılmasını və yaşıllaşdırılmasını, məişət tullantılarının yığılmasını və daşınmasını, içməli su ilə təchizat, təhsil müəssisələrinin binalarının saxlanılmasını və s. qeyd etmək olar. Həyata keçirilən layihələrdən dəyəri 2 milyon 946 min manat olan 527 layihə qəsəbə bələdiyyələrinin payına düşür.

Diqqətə çatdırılmışdır ki, hesabat dövründə Türk Dünyası Bələdiyyələr İttifaqı ilə milli assosiasiyalar arasında əməkdaşlıq daha da gücləndirilmişdir. Yaxın gələcəkdə qabaqcıl təctübənin öyrənilməsi üçün tanışlıq proqramlarının reallaşdırılması planlaşdırılır.

Bildirilmişdir ki, Assosiasiya əhalinin həyat şəraitinin yaxşılaşdırılması üçün yerlərdə irimiqyaslı layihələr həyata keçirir, mövcud problemlərin aradan qaldırılması istiqamətində tədbirlər görür. Bunun nəticəsi olaraq, bələdiyyə idarəçiliyinin səmərəliliyi daha da artırılmış, yerli əhali ilə qarşılıqlı münasibətlər xeyli gücləndirilmişdir.

İclasda Azərbaycan Respublikası Prezidentinin Administrasiyasının regional idarəetmə və yerli özünüidarəetmə şöbəsinin bələdiyyələrlə iş sektorunun müdiri Kamran Bayramov bələdiyyələrin fəaliyyətinin əlaqələndirilməsi, yerli özünüidarəetmənin inkişafı, vətəndaş cəmiyyətinin qurulmasında, demokratik prinsiplərin tətbiqində bələdiyyələrin rolunun artırılması məsələlərindən danışmışdır.

Ədliyyə Nazirliyinin bələdiyyələrlə iş mərkəzinin rəisi Mehdi Səlimzadə, Milli Məclisin regional məsələlər komitəsinin üzvü Tahir Rzayev bildirmişlər ki, həyata keçirilən islahatlar nəticəsində bələdiyyə idarəçiliyinin səmərəliliyi daha da artırılmışdır.

Tədbirdə qəsəbə bələdiyyələrinin sədrləri gördükləri işlər, yerli əhəmiyyətli məsələlərin həllində əhalinin iştirakı, bələdiyyələrin maliyyə imkanlarının artırılması, bələdiyyə-vətəndaş əlaqələrinin möhkəmləndirilməsində bələdiyyə qulluqçularının peşəkarlığı, bələdiyyələrin fəaliyyətində aşkarlığın və şəffaflığın təmin olunması mövzularında çıxışlar etmişlər.

Çıxışlarda bələdiyyələrin fəaliyyətində şəffaflığın daha da artırılmasının zəruriliyi qeyd edilmiş, yerli vergi və ödənişlərin yığılmasında mövcud çətinliklərin aradan qaldırılması yollarına dair təkliflər səsləndirilmiş, bununla bağlı müvafiq tədbirlərin görülməsi qərara alınmışdır.

İclasda nəzarət-təftiş komissiyasının hesabatı dinlənilmiş, cari ilin büdcəsi təsdiq edilmiş və təşkilatı məsələlərə baxılmışdır.

Azərbaycan.-2014.- 18 aprel.- S.5.