Müdafiə Sənayesi Nazirliyinin XIV Asiya Müdafiə Xidmətləri Sərgisində nümayiş etdirdiyi məmulatlar böyük maraqla qarşılanmışdır

Müdafiə Sənayesi Nazirliyinin (MSN) müəssisələrində yaradılan və istehsal olunan müdafiə təyinatlı məmulatlar Malayziyanın Kuala-Lumpur şəhərində keçirilən XIV Asiya Müdafiə Xidmətləri Sərgisində (DSA-2014) nümayiş etdirilmişdir.

MSN-in mətbuat xidmətindən AzərTAc-a bildirmişlər ki, bununla bağlı müdafiə sənayesi naziri Yavər Camalovun başçılıq etdiyi geniş tərkibli nümayəndə heyəti Malayziyada səfərdə olmuşdur.

Dünyanın ən böyük beş müdafiə sənayesi sərgisindən biri olan “DSA-2014”də Azərbaycan Respublikasının Müdafiə Sənayesi Nazirliyi 132 adda müdafiə təyinatlı məmulatla təmsil olunmuşdur.

Müdafiə Sənayesi Nazirliyi bu sərgidə nazirliyin müəssisələrində yaradılan və istehsal olunan “İstiqlal”, “Mübariz”, “Yalquzaq” snayper tüfənglərini, tank və zirehli texnikalar üçün pulemyotu, hücum pulemyotunu, ilk dəfə olaraq universal pulemyotu, “Zəfər”, “Zəfər-K” və “İnam” tapançalarını, pilotsuz uçuş aparatlarını, aviasiya təlim bombasını, müxtəlif çaplı sursatları, əleyhqazları və s. məmulatları nümayiş etdirmişdir.

Bu məmulatlar sərginin iştirakçıları və qonaq qismində iştirak edən ölkələrin nümayəndə heyətləri tərəfindən böyük maraqla qarşılanmışdır.

MSN-in stendində cari ilin sentyabrında Bakıda keçiriləcək “ADEX-2014” Beynəlxalq Müdafiə Sənayesi Sərgisinin təqdimatı da keçirilmişdir.

“DSA-2014” sərgisinin açılışından sonra iştirakçı və bu tədbirə qonaq qismində qatılan ölkələrin nümayəndələri MSN-in stendini ziyarət etmişlər. Nümayiş etdirilən məmulatlar barədə nazirliyin mütəxəssisləri tərəfindən ziyarətçilərə geniş məlumat verilmişdir. Sərgi zamanı Azərbaycanda keçiriləcək “ADEX-2014” Beynəlxalq Müdafiə Sənayesi Sərgisi ilə bağlı da ətrafı məlumatlar verilmiş və dəvətlər çatdırılmışdır.

Səfər çərçivəsində nazir Yavər Camalovun MSN-in stendini ziyarət edən Malayziyanın müdafiə naziri Hişammuddin Tun Hüseyni və Türkiyənin müdafiə nazirinin müavini Hasan Kamal Yardımçı, Əmniyyət Baş İdarəsinin rəhbəri Mehmet Kılınclar, Pakistanın böyük müdafiə şirkətlərindən olan GİDS Korporasiyası idarə heyətinin sədri Zübeyir İqbal Malikin və Tailandın Müdafiə Nazirliyinin rəsmiləri ilə görüşləri olmuşdur.

Görüşlərdə nazir Yavər Camalov Müdafiə Sənayesi Nazirliyinin fəaliyyəti barədə məlumatlar vermişdir.

Görüşlərdə müdafiə sənayesi üzrə qarşılıqlı əməkdaşlıq məsələləri müzakirə edilmişdir. Bu sahədə əlaqələrin inkişaf etdirilməsi üçün birgə tədbirlərin həyata keçirilməsinə dair ümumi razılıq əldə olunmuşdur. Eyni zamanda, görüş iştirakçıları sentyabrda Bakıda keçiriləcək “ADEX-2014” Beynəlxalq Müdafiə Sənayesi Sərgisinə dəvət edilmişlər.

Azərbaycan.-2014.- 22 aprel.- S.2.