“Qondarma “erməni soyqırımı” və tarixi həqiqətlər”

mövzusunda elmi sessiya keçirilmişdir

Aprelin 23-də Azərbaycan Milli Elmlər Akademiyasının (AMEA) Akademik Ziya Bünyadov adına Şərqşünaslıq İnstitutunda “Qondarma “erməni soyqırımı” və tarixi həqiqətlər” mövzusunda elmi sessiya keçirilmişdir.

AzərTAc xəbər verir ki, sessiyanı giriş sözü ilə açan AMEA-nın Akademik Ziya Bünyadov adına Şərqşünaslıq İnstitutunun direktoru, Milli Məclisin deputatı, professor Gövhər Baxşəliyeva bədnam qonşularımızın qondarma “erməni soyqırımı”nı dünya xalqlarına həqiqət kimi tanıtdırmaq üçün genişmiqyaslı təbliğat apardığı indiki məqamda işğalçı dövlətin Azərbaycana təcavüzü ilə bağlı əsl tarixi həqiqətləri, “erməni soyqırımı”nın uydurma olduğunu dünya ictimaiyyətinə çatdırmağın vacibliyini vurğulamışdır.

G.Baxşəliyeva ermənilərin ötən əsrin müxtəlif dövrlərində azərbaycanlılara qarşı soyqırımı törətdiklərini diqqətə çatdırmış, bütün bu həqiqətləri üzə çıxaran faktları aşkarlayaraq geniş ictimaiyyətə çatdırmaq sahəsində Şərqşünaslıq İnstitutunda aparılan işlərdən danışmışdır. Arazın hər iki tayında ermənilərin törətdikləri soyqırımı aktları barədə həqiqətlərdən bəhs edən və İranda nəşr olunan kitabların dilimizə çevrildiyini, Bakıda, Qubada, Şamaxıda 1918-ci ildə törədilmiş soyqırımı, talanlarla bağlı rəsmi sənədlərin aşkarlanaraq, kitab şəklində bir neçə dildə dünya ictimaiyyətinə çatdırıldığını bildirmişdir. Professor bu sahədə işlərin davam etdirildiyini vurğulamışdır.

Türkiyənin Azərbaycandakı səfirinin mədəniyyət və turizm üzrə müşaviri Seyid Əhməd Arslan ermənilərin qondarma soyqırımını dünya ictimaiyyətinə tanıtdırmaq istiqamətində cəhdlərindən danışmışdır. O, Türkiyə və Azərbaycan dövlətlərinin bu təbliğata qarşı apardığı fəaliyyətdən, atılan addımlardan söz açmışdır.

Şərqşünaslıq İnstitutunun Türkiyə tarixi və iqtisadiyyatı şöbəsinin baş elmi işçisi, iqtisadiyyat üzrə elmlər doktoru İnqilab Əlibəyov “1915-ci ildəki qondarma “erməni soyqırımı”na münasibət” mövzusunda məruzə ilə çıxış etmişdir. Alim məsələnin mənşəyi, mahiyyəti və müasir təzahür formalarından danışmış, ermənilərin bu məsələni gündəmdə saxlamaq üçün göstərdikləri cəhddən söz açmışdır. O, qondarma “erməni soyqırımı”nın uydurma olduğunu konkret faktlarla diqqətə çatdırmışdır. Qeyd etmişdir ki, hadisələrdən sonra illər keçdikcə ermənilərin qətlə yetirilməsi ilə bağlı uydurma rəqəmlər şişirdilərək 1,5 milyon nəfərə çatdırılmışdır. Lakin Britaniya Ensiklopediyasında Birinci Dünya müharibəsi ərəfəsində Türkiyədə yaşayan ermənilərin sayının cəmi 1,3 milyon nəfər olması faktı ermənilərin bu iddialarının həqiqətə uyğun olmadığını təsdiqləyir. İ.Əlibəyov bütün bu məsələlərin tarixçilərin, elm adamlarının iştirakı ilə həllini tapmalı olduğunu bildirmişdir.

İnstitutun din və ictimai fikir tarixi şöbəsinin müdiri, fəlsəfə üzrə fəlsəfə doktoru Esmeralda Həsənova “soyqırımı” kəlməsinin mahiyyətindən söz açmış, bu hadisələri soyqırımı adlandırmağın tamamilə yanlış olduğunu demişdir. Konkret tarixi faktları diqqətə çatdıran E.Həsənova, ermənilərin həmin dövrdə apardıqları məkrli siyasətini ifşa edən məlumatları diqqətə çatdırmışdır.

Şərqşünaslıq İnstitutunun Cənubi Azərbaycan tarixi şöbəsinin müdiri, iqtisadiyyat üzrə fəlsəfə doktoru Əkrəm Rəhimli “1918-ci ildə Cənubi Azərbaycandakı ermənilərin törətdikləri soyqırımı haqqında” mövzusunda məruzə ilə çıxış etmiş, həmin dövrdə Cənubi Azərbaycanın qərb bölgəsində erməni daşnaklarının həyata keçirdikləri qırğınlardan danışmışdır.

Elmi sessiyada mövzu ilə bağlı digər məruzələr dinlənilmiş və müzakirələr aparılmışdır.

Azərbaycan.-2014.- 24 aprel.- S.9.