Şəmkirçay dəryaçasında işlər yekunlaşmaq üzrədir

Uca bir zirvənin başından boylanırıq. Qarşıda əsrarəngiz mənzərə açılır. Qoşa dağın arasında qızğın iş gedir. Müxtəlif texnika aramsız işləyir. Maşınlar belədən-beləyə şütüyür. Dəryaçanın məcrasında dərələr, təpələr hamarlandıqca göz oxşayan bir mənzərə yaranır. Öndə çox enli bir bənd tikilir. Dağların arasından sağ və sol su kanalları nəhəng qollar kimi uzanıb gedir.

Burada müasir dövrün ən nəhəng obyektlərindən biri - Şəmkirçay dəryaçası yaradılır. Çox əzəmətli bir obyektdir. Dövlət başçısı İlham Əliyev hər dəfə ölkəmizin quruculuq işlərindən danışarkən Şəmkirçay Su Anbarının da ölkəmizin iqtisadiyyatında, məişətində yerini, rolunu xüsusi vurğulayır. İşlər bir növ yekunlaşmaq üzrədir. Nazirlər Kabinetinin cari ilin birinci yarısının sosial-iqtisadi inkişafının yekunlarına həsr olunmuş toplantısında dövlət başçısı dedi ki, "bu il Şəmkirçay Su Anbarının istifadəyə verilməsi nəzərdə tutulur. Bu, böyük infrastruktur layihəsidir. On minlərlə hektar torpağı suvaracaqdır".

Gündən-günə geniş miqyas alan meliorasiya obyektlərinin sırasına nəhəng bir qurğunun adı yazılır. Bu, müstəqil ölkəmiz üçün çox gərəkli bir obyektdir. Onun vacibliyi barədə hələ sovetlər dövründə söz-söhbət gedirdi. Ulu öndər Heydər Əliyev hələ ötən əsrin 70-ci illərində belə bir su qovşağını yaratmaq istəyirdi. Təəssüf ki, o dövrdə bu dəyərli iş xoş bir istək olaraq qaldı. Xalqın ümummilli lideri Heydər Əliyevin müqəddəs arzusu Azərbaycan müstəqillik əldə edəndən sonra onun layiqli davamçısı Prezident İlham Əliyevin qayğısı və diqqəti ilə reallığa çevrilir.

Bu yerlərdə 2009-cu ilin 25 may gününü iftixarla xatırlayırlar. Dövlət başçısı İlham Əliyev Şəmkirçay Su Anbarının təməlqoyma mərasiminə gəlmişdi. Dəryaçayda görülən işlərlə tanış oldu, tövsiyə və tapşırıqlarını verdi. Kollektivə uğurlar arzuladı. Şəmkirçay dəryaçası geniş ərazini əhatə edir. Onun "ayağı" Daşkəsənlə Gədəbəy rayonlarının qovşağına qədər uzanacaq, ümumi su tutumu 170 milyon kubmetr olacaq, su səthinin sahəsi 504 hektara, bəndin hündürlüyü isə 190 metrə çatacaqdır. İşlər tamamlananda Gəncəyə içməli su veriləcək. Şəmkir, Göygöl, Samux və Gədəbəy rayonlarında azı yetmiş min hektar sahənin suvarılması təmin olunacaqdır. Dəryaçada 6 generator quraşdırılacaq və elektrik enerjisi istehsal ediləcəkdir. Ona görə də bu yerlərdə nəhəng dəryaçanı bolluq-bərəkət çeşməsi, işıq və nur mənbəyi adlandırırlar.

Bu mühüm obyektin inşası Azərbaycan Meliorasiya və Su Təsərrüfatı Açıq Səhmdar Cəmiyyətinə həvalə olundu. Tender keçirildi, tikinti təşkilatı müəyyən edildi. Türkiyənin "Çengiz" şirkəti işə start verdi. Texnika, mal-material gəldi. Türkiyəli mütəxəssislər yerli işçi qüvvəsi ilə işə başladı. Neçə ildir obyektdə qızğın iş gedir. Şəmkir dağının başında, Daşkəsən və Gədəbəy rayonlarının qovşağında nəhəng dəryaça yaradılır.

Sifarişçi təşkilatın nümayəndəsi Ayaz Qəhrəmanov deyir ki, hazırda Dəryaçayda təqribən 600 nəfər çalışır. Çoxu da qonşu kəndlərdən gəlir. Gündə üç dəfə yemək verilir. İşdən sonra evə gedib-gəlmək istəyənlər nəqliyyatla təmin olunurlar. Burada qalanlara isə hər cür şəraiti olan otaqlar ayrılır. Bir sözlə, Azərbaycan-Türkiyə inşaatçıları dağların qoynunda əsl dostluq, qardaşlıq abidəsi ucaldırlar.

Layihənin müəllifi Mehmet Səlahəddin Yazıçı çox mehriban, işgüzar adamdır. Vacib müsafiri gələn kimi özü qabağa düşür, obyekt boyu gəzdirir, görülən işlər barədə böyük həvəslə məlumat verir. Mehmet deyir ki, dünyanın bir sıra ölkələrində işləyiblər. Müxtəlif səviyyəli ixtiyar sahibləri ilə əlaqə-ünsiyyəti olub, lakin Azərbaycanda olan qayğı və diqqət, işgüzar mühit, birlik, böyükdən-kiçiyə kimi hər kəsdə gördüyü əsl qardaşlıq münasibəti onu valeh edir. Atəşkəsdə yaşayan ölkədəki sülh ovqatı, əmin-amanlıq və quruculuq həvəsinə qibtə etməmək mümkün deyil. Onu da bildirdi ki, dövlət başçısı İlham Əliyevin qayğı və köməyini daim hiss edirlər.

Dəryaçanın məcrası, demək olar ki, hazırdır. Bəndin inşasının bitməsinə cəmi 13 metrlik bir məsafə qalır. Sol və sağ sahil kanallarının çəkilişində son tamamlama işləri görülür. Dəryaçada hidroelektrik stansiyasının inşası da sürətlə gedir. Burada Fransanın istehsalı olan ümumi gücü 56,6 meqavatlıq 6 ədəd turbin-generator quraşdırılır.

Dağlarda xoş əhval-ruhiyyə hökm sürür. Hamı işlərin vaxtında və yüksək keyfiyyətlə başa çatdırılmasına çalışır. Şəmkir dəryaçası görüşə hazırlaşır.

Əhməd İSAYEV

Azərbaycan. - 2014.- 2 avqust.- S. 1.