Qəbələnin hər daşı, hər qayası bir tarixdir

"Ölkəmizi tanıyaq" maarifləndirici tur-aksiyasının Quba rayonundan olan iştirakçıları avqustun 1-də axşam saatlarında İsmayıllı rayonundan Qəbələyə gəldilər.

Qəbələdəki "Qafqaz Yeddi Gözəl" otelində yüksək səviyyədə qarşılanan və yerləşdirilən qubalı şagirdlər proqrama uyğun olaraq avqustun 2-də rayonun tarixi-mədəni abidələri, turizm obyektləri, muzeyləri ilə tanış olacaqlar.

Şagirdlərlə birgə Qəbələyə gələn "A la Carte Travel" turizm şirkətinin tur rəhbəri Aysel Nuriyeva AzərTAc-a müsahibəsində ölkəmizlə bağlı geniş maarifləndirici xarakter daşıyan bu tur-aksiyanın əhəmiyyətini yüksək qiymətləndirdi.

Bildirdi ki, Prezident İlham Əliyevin tapşırığına əsasən, orta məktəblərin IX-XI sinif şagirdləri üçün Azərbaycanın bölgələrini gəzmək imkanı yaradılıb. Tur-aksiyada iştirak edən şagirdlər səyahət zamanı şəhər və rayonlarımız barədə eşitdikləri və kitablardan oxuduqları məlumatlarla, eləcə də ölkəmizin tarixi, mədəniyyəti və turizm imkanları ilə əyani şəkildə tanış olurlar. Biz Azərbaycanın dilbər guşələrindən olan Qəbələyə ölkəmizin daha bir cənnət məkanından - İsmayıllıdan gəlmişik. İnanırıq ki, buradan da xoş təəssüratlarla ayrılacağıq. Axı, Azərbaycanın 67 şəhər və rayonundan 14 minə yaxın IX-XI sinif şagirdini əhatə edən və "Ölkəmizi tanıyaq" devizi ilə keçirilən maarifləndirici tur-aksiyaların səfər proqramına daxil edilmiş Qəbələnin hər daşı, hər qayası bir tarixdir.

Azərbaycan. - 2014.- 2 avqust.- S. 5.