Böyük Britaniya cəbhədə gərginliyin artması ilə bağlı narahatlığını ifadə edib

Böyük Britaniyanın Xarici İşlər Nazirliyi son günlərdə Azərbaycan və Ermənistan qoşunlarının təmas xəttində atəşkəsin pozulması ilə əlaqədar narahatlığını ifadə edib.

AzərTAc-ın məlumatına görə, bu barədə nazirliyin rəsmi saytında yerləşdirilən bəyanatında qeyd olunur.

Bəyanatda bildirilir ki, ötən həftə Dağlıq Qarabağ bölgəsində qoşunların təmas xəttində və Ermənistan-Azərbaycan dövlət sərhədində vəziyyətin gərginləşməsi müşahidə olunub. “Həlak olanların sayının çox olması atəşkəs rejiminin əldə olunduğu 20 il ərzində ən narahatedici məqam olub”.

Sənəddə deyilir ki, Böyük Britaniya tərəfləri gərginliyin azaldılması üçün tədbirlər görməyə və 1994-cü ildən qüvvəyə minən atəşkəs haqqında sazişə hörmət etməyə çağırır: "Biz hər iki tərəfdən insanların həlak olmasından kədərlənirik. Biz tərəfləri ATƏT-in Minsk qrupu ilə sülh sazişinin hazırlanması üzrə işləməyə çağırırıq".

Azərbaycan. - 2014.- 6 avqust.- S. 1.