Bu tur-aksiya olduqca vacib və vaxtında reallaşdırılan tədbirdir

"Ölkəmizi tanıyaq" devizi ilə təşkil edilən bu maarifləndirici tur-aksiya yeniyetmə və gənclər üçün əvəzsiz bir tədbirdir.

Bu sözləri aksiyanın iştirakçısı, Qubadakı texniki təmayüllü liseyin direktoru İradə İsrailova AzərTAc-a müsahibəsində dedi. Qeyd etdi ki, şagirdlər üçün Azərbaycanın bölgələri ilə tanışlıq, qədim tariximizin, adət-ənənələrimizin öyrənilməsi, mədəniyyət abidələrimizin ziyarət olunması, turizm mərkəzləri və başqa gəzməli-görməli yerlərlə tanışlıq məqsədilə təşkil edilən bu tur-aksiya olduqca vacib və vaxtında reallaşdırılan tədbirdir. Dövlətimiz yetişməkdə olan nəslin yaxşı təhsil alması ilə yanaşı, onların ölkəmizi hərtərəfli tanımaları üçün nə lazımdırsa edir.

İradə İsrailova şagirdlərin tur çərçivəsində qidalanması, istirahətin mənalı təşkili, əylənmələri və proqrama uyğun olaraq obyektlərlə tanışlığı kimi vacib məsələlərin dövlətimiz tərəfindən həll edilməsini razılıq hissi ilə vurğuladı.

Liseyin direktoru diqqətə çatdırdı ki, Prezident İlham Əliyevin tapşırığına əsasən, orta məktəblərin IX-XI sinif şagirdləri üçün Azərbaycanın bölgələrini gəzmək imkanının yaradılması və bu gözəl təşəbbüsün ilk dəfə uğurla reallaşdırılması hamının ürəyincədir. Aksiyanın gedişində şagirdlərə vətənpərvərlik hisslərinin aşılanmasına, eləcə də onlara Azərbaycanın bölgələri barədə daha ətraflı maarifləndirmə işinin təşkilinə, yeniyetmələrin intellektual səviyyəsinin və dünyagörüşünün artırılması istiqamətində söhbətlərin aparılmasına böyük önəm verilir.

Azərbaycan. - 2014.- 3 avqust.- S. 3.