Rahat yol rahat həyat deməkdir

Ulu öndər Heydər Əliyevin "Yol iqtisadiyyat, mədəniyyət, bir sözlə, həyat deməkdir" kəlamını fəaliyyəti ilə reallaşdıran Prezident İlham Əliyevin diqqət və qayğısı sayəsində Bakıda və onun ətraf qəsəbələrində, eləcə də regionlarda dövlət proqramları çərçivəsində bu istiqamətdə şoxsaylı layihələr həyata keçirilib. Nəticədə ümumilikdə ölkə üzrə 3017, o cümlədən 1103 kilometr respublika əhəmiyyətli və 1914 kilometr yerli əhəmiyyətli yol çəkilib. Bu yollarda 164 yeni körpü və yol ötürücüsü tikilib, 47 körpü əsaslı təmir olunub. Yol-nəqliyyat kompleksi üzrə tədbirlərin yerinə yetirilməsinə 8,2 milyard manat vəsait sərf edilib.

Prezident İlham Əliyev yaradılmaqda olan yol infrastrukturunda işlərin bundan sonra da davam etdiriləcəyini diqqətə çatdıraraq demişdir: "Yaxın vaxtlarda Heydər Əliyev Beynəlxalq Aeroportunun yeni aerovağzal kompleksi istifadəyə veriləcəkdir. Bu, dünya miqyasında ən gözəl aerovağzal komplekslərinin arasında olacaqdır, həm xarici görünüşü, həm daxili rahatlığı çox gözəldir, ən yüksək standartlara cavab verir. Nəzərə alsaq ki, Azərbaycanda çoxsaylı beynəlxalq tədbirlər artıq adi hal alıbdır, əlbəttə, bu aeroportun ölkəmizin ümumi inkişafında rolu çox böyük olacaqdır. Bu, ölkəmizə bir giriş qapısıdır. Əlbəttə, yeni aerovağzal kompleksinin tikintisi hesab edirəm ki, tarixi hadisədir. Magistral yolların tikintisi qrafik üzrə davam edir. Biz burada da əsas diqqəti keyfiyyətə yönəltməliyik. Çünki magistral yollarımızın əksəriyyəti tikilib, indi işlər davam edir. Ancaq keyfiyyət ön planda olmalıdır".

Tikilib istifadəyə verilən magistral yolların çox qısa coğrafi xronologiyasına nəzər salsaq görərik ki, Abşeron iqtisadi rayonu üzrə 174 kilometr yol, 18 körpü, Gəncə-Qazax iqtisadi rayonu üzrə 626 kilometr yol, 21 körpü, Şəki-Zaqatala iqtisadi rayonu üzrə 206 kilometr yol, 34 körpü, Lənkəran iqtisadi rayonu üzrə 168 kilometr yol, 25 körpü, Quba-Xaçmaz iqtisadi rayonu üzrə 293 kilometr yol, 30 körpü, Aran iqtisadi rayonu üzrə 1068 kilometr yol, 26 körpü, Yuxarı Qarabağ iqtisadi rayonu üzrə 96 kilometr yol, Dağlıq Qarabağ iqtisadi rayonu üzrə isə 386 kilometr yol və 10 körpü tikilib və yenidən qurulub.

Magistral avtomobil yollarının yenidən qurulması üzrə isə vəziyyət belədir: Bakı-Ələt-Gürcüstanla dövlət sərhədi, Bakı-Quba-Rusiya ilə dövlət sərhədi, Ələt-Astara-İranla dövlət sərhədi magistral avtomobil yollarında yenidənqurma işləri davam edib. Bakı-Hacıqabul (118 kilometr), Yevlax-Gəncə (87 kilometr), Gəncə dövrələmə (39 kilometr), Bakı-Gəndob (132 kilometr) və Ələt-Kürsəngi (30 kilometr) avtomobil yolları 4 zolaqlı - birinci texniki dərəcəyə, Bakı-Şamaxı (118 kilometr) və Hacıqabul-Bəhramtəpə istiqamətində (50 kilometr) avtomobil yolları isə ikinci texniki dərəcəyə uyğun çəkilib. Beynəlxalq əhəmiyyətli magistral yolların qalan hissələri də 4 zolaqlı olmaqla yenidən qurulur. Eyni zamanda Qusar-Ənig-Ləzə (39 kilometr), Şəki-Qax (35 kilometr), Qəbələ-Oğuz (46 kilometr), Ağstafa-Poylu-Sadıxlı (59 kilometr), Ağdaş-Ləki (12 kilometr), Goran-Naftalan (18 kilometr) və digər yerli əhəmiyyətli avtomobil yolları da yenidən qurulub. Bundan əlavə, ölkə rəhbərinin imzaladığı sərəncamlara əsasən, Azərbaycan Respublikası Prezidentinin Ehtiyat Fondundan ayrılmış vəsaitlər hesabına kəndləri rayon mərkəzləri ilə birləşdirən və kəndlərarası yollar əsaslı təmir edilib. Belə yolların ümumi uzunluğu 1334 kilometrdir.

Cari ilin ilk aylarında ölkə rəhbərinin sərəncamları ilə 2014-cü ilin dövlət büdcəsindən kəndlərarası avtomobil yollarının tikintisi və yenidən qurulması üçün Quba Rayon İcra Hakimiyyətinə 7 min nəfər əhalinin yaşadığı 7 yaşayış məntəqəsini birləşdirən Quba-Küpçal-Küsnət avtomobil yolunun tikintisinin davam etdirilməsi üçün 5 milyon 300 min, Saatlı Rayon İcra Hakimiyyətinə 44 min nəfər əhalinin yaşadığı 17 yaşayış məntəqəsini birləşdirən Sımada-Qarayevkənd avtomobil yolunun tikintisinin davam etdirilməsi üçün 3 milyon 700 min, Gədəbəy rayonuna 27 min nəfər əhalinin yaşadığı 11 yaşayış məntəqəsini birləşdirən Qarıkənd-Miskinli-Çalburun və Qızıltorpaq-Ağbaşlar avtomobil yollarının tikintisinin davam etdirilməsi üçün 6 milyon 700 min, İsmayıllı rayonuna 4 min nəfər əhalinin yaşadığı 5 yaşayış məntəqəsini birləşdirən İsmayıllı-Göytəpə-Ruşan-Qualıcaq yolunda işlərin sürətləndirilməsi məqsədilə 3,4 milyon manat vəsait ayrılmışdır. Respublika Prezidentinin Ehtiyat Fondundan ayrılmış 5,5 milyon manat vəsait hesabına 28 kilometr uzunluğunda Zaqatala-Danaçı-Aşağı Çardaxlı avtomobil yolunun artıq 14 kilometri tikilmiş, qalan hissəsində isə işlər davam edir. Bir sözlə, bu gün yolunuz Azərbaycanın hansı bölgəsinə, hansı kəndinə düşsə, yeni çəkilmiş və çəkilməkdə olan yolların, eləcə də böyük tikinti-quruculuq işlərinin şahidi olacaqsınız.

Bu proses eyni sürətlə Bakıda və onun ətraf qəsəbələrində də davam edir. Təkcə son illər paytaxtda 379 kilometr yol çəkilib, müxtəlif səviyyəli 40 yol qovşağı, körpü və tunel yenidən qurulub, vətəndaşların təhlükəsizliyini təmin edən 37 piyada keçidi inşa edilib. Dünya standartlarına uyğun qurulmuş paytaxt yollarında hərəkətin və nəqliyyat axınlarının idarə olunması, ictimai nəqliyyatın işinin təkmilləşdirilməsi üçün Nəqliyyatı İntellektual İdarəetmə Sisitemi də yaradılıb. Həmçinin yollardakı tıxac və parklama problemi ilə əlaqədar səkilərdə, yolun hərəkət hissəsində, parklara və metrolara girişlərdə avtomobillərin qanunsuz parklanmasının qarşısının alınması üçün tədbirlər həyata keçirilir. Nərimanov rayonu, Atatürk prospekti - 47 ünvanda yeni yerüstü piyada keçidinin tikintisi yekunlaşmaq üzrədir. Uzunluğu 86, eni 3,5, hündürlüyü 6,5 metr olan bu yeni keçid may ayının sonlarında istifadəyə verilmişdir. Şəhərin baş planına uyğun olaraq, Vaqif prospektinin genişləndirilərək Əhməd bəy Ağaoğlu küçəsi ilə birləşdirilməsi, Ziya Bünyadov küçəsinin yenidən qurulması, Olimpiya Stadionunun tikintisi ilə əlaqədar yeni yol qovşaqlarının salınması istiqamətində, eləcə də Heydər Əliyev prospekti, Koroğlu Rəhimov, akademik Həsən Əliyev küçələrində və digər ərazilərdə də işlər görülür, bəzilərində son tamamlama işləri başa çatmaq üzrədir.

Bu baxımdan Bakıda Qara Qarayev və Babək prospektlərinin yenidən qurulması xüsusi vurğulanmalıdır. Belə ki, metronun "Koroğlu" stansiyasından prospektə gələn yol "Xalqlar dostluğu" metro stansiyasınadək genişləndirilir. Qara Qarayev prospekti ilə Cəmşid Naxçıvanski küçəsinin kəsişməsində 390 avtomobil tutumlu yeraltı və yerüstü, Cəmşid Naxçıvanski küçəsi ilə E.Süleymanov küçələrinin kəsişməsində isə 210 avtomobil tutumlu yeraltı dayanacaq tikilir. Heydər Əliyev prospektində yerləşən "Şəfa" stadionunun qarşısında da böyük yol qovşağının və yeraltı piyada keçidinin inşası tamamlanmaq üzrədir.

Bunlardan əlavə, paytaxtın Ziya Bünyadov prospektinin Alı Mustafayev, Hüseynbala Əliyev və Əbdülvahab Salamzadə küçələri ilə kəsişməsində - "Xutor dairəsi"ndə yerləşən yol qovşağı kompleksinin tikintisi ilə bağlı işlərin cari ilin iyun-iyul aylarında başa çatdırılması nəzərdə tutulub. Bu yol qovşağı kompleksinə 3 tunel və 1 yol ötürücüsü daxildir. Birinci tunel uzunluğu 890, eni 22 metr olmaqla 4 hərəkət zolağından ibarət olacaq. Birinci tunel istifadəyə verildikdən sonra nəqliyyat vasitələri 3-cü mikrorayon dairəsindən "Xutor dairəsi"nə daxil olmadan Ziya Bünyadov prospekti ilə Azadlıq prospektinin kəsişməsi istiqamətinə maneəsiz çıxa biləcəklər. Uzunluğu 450, eni 10,5 metr olan 2 hərəkət zolaqlı və birgedişli ikinci tunel Ə.Salamzadə küçəsindən Z.Bünyadov prospekti ilə Azadlıq prospektinin kəsişməsi istiqamətinə, üçüncü tunel isə Z.Bünyadov prospekti ilə Azadlıq prospektinin kəsişməsindən Ə.Salamzadə küçəsinə maneəsiz hərəkəti təmin edəcək. Hazırda həmin yol qovşağı kompleksində tikinti işləri yekunlaşma mərhələsindədir.

Cari ilin əvvəllərindən paytaxtın şimal giriş qapısı hesab olunan Bakı-Sumqayıt magistralının da yenidən qurulmasına başlanılıb. Biləcəri-Xocasən avtomobil yolunun Sulutəpə-Biləcəri hissəsi genişləndirilir. Hazırda 2 zolaqlı olan yol yenidənqurmadan sonra 8 hərəkət (4 gediş, 4 gəliş) zolağından ibarət olacaq. Xocasən istiqamətində yeni dairə yaradılacaq, Sumqayıt istiqamətindən gələn nəqliyyat vasitələri yeni yaradılmış 4 zolağın hesabına həm Xocasən, həm də Bakı-Sumqayıt-Yevlax avtomobil yoluna sərbəst çıxa biləcək.

Rəhman SALMANLI

Azərbaycan. - 2014.- 3 avqust.- S. 4.