Sosial tərəfdaşlığın mükəmməl nümunəsi

Azərbaycan Respublikasının Prezidenti cənab İlham Əliyevin sahibkarlığın inkişafına və şəffaf biznes mühitinin formalaşmasına davamlı dəstəyi sayəsində ölkəmizdə işgüzar mühit canlanmış, sahibkarlıq inkişaf etmişdir. Hazırda ölkə iqtisadiyyatında özəl sektorun xüsusi çəkisi artmaqda davam edir. Ölkədə aparılan iqtisadi islahatlar, qanunvericilik bazasının təkmilləşdirilməsi, vergi və bank sistemlərinin sürətlə dəyişən iqtisadi şəraitə uyğunlaşdırılması, bazar iqtisadiyyatı prinsiplərinə cavab verən yeni iqtisadi siyasətin həyata keçirilməsi bütün sahələrdə inkişafın davam etdirilməsini təmin etmişdir.

Ölkədə aparılan iqtisadi islahatlar, qanunvericilik bazasının təkmilləşdirilməsi, vergi və bank sistemlərinin sürətlə dəyişən iqtisadi şəraitə uyğunlaşdırılması, bazar iqtisadiyyatı prinsiplərinə cavab verən yeni iqtisadi siyasətin həyata keçirilməsi bütün sahələrdə inkişafın davam etdirilməsini təmin etmişdir.

Ölkə başçısının 2014-cü il 3 mart tarixli "Sahibkarlığın inkişafı ilə bağlı əlavə tədbirlər haqqında" fərmanı isə bu sahədə ötən illərdən başlamış islahatların mütərəqqi davamını təmin edəcək mühüm sənəd kimi dəyərləndirilməlidir. Fərman Azərbaycanda biznes mühitinin daha da yaxşılaşdırılması və ən qabaqcıl təcrübələr əsasında təkmilləşdirilməsi istiqamətində mühüm tədbirlərin həyata keçirilməsinə, sahibkarlığın inkişafına geniş imkanlar açır. Fərmanla müəyyənləşdirilmiş vəzifələr aidiyyəti dövlət qurumları ilə birlikdə qabaqcıl beynəlxalq təcrübə nəzərə alınmaqla sahibkarlıq sahəsində səkkiz istiqamət üzrə geniş islahatların aparılmasını tələb edir.

Bu nailiyyətlərin daha da möhkəmləndirilməsi məqsədi ilə Azərbaycan Respublikası Sahibkarlar (İşəgötürənlər) Təşkilatları Milli Konfederasiyası (ASK) ölkənin özəl sektorunda sağlam qüvvələrin birləşməsi əsasında öz işini qurur, sahibkarlara göstərilən xidmətlərin əhatə dairəsini genişləndirir, günün tələblərinə cavab verən mövzular üzrə treninqlər, seminar və konfranslar keçirir.

Azərbaycan Respublikası Nazirlər Kabineti, Azərbaycan Həmkarlar İttifaqları Konfederasiyası və Azərbaycan Respublikası Sahibkarlar (İşəgötürənlər) Təşkilatları Milli Konfederasiyası mövcud beynəlxalq və ölkə qanunvericiliyinə əsaslanaraq sosial-iqtisadi siyasəti və sosial-əmək münasibətləri üzrə 2014-2015-cü illər üçün razılaşdırılmış müvqelərini və birgə fəaliyyətlərini müəyyən edən Baş Kollektiv Saziş (BKS) bağlamışlar.

Saziş sosial tərəfdaşlıq sisteminin tərkib hissəsidir və tərəflər qarşılıqlı əlaqələrin sosial tərəfdaşlıq prinsipləri əsasında inkişaf etdirilməsinə, sosial-əmək münasibətlərinin sosial dialoq, kollektiv müqavilələr və sazişlər vasitəsilə tənzimlənməsinə və Baş Kollektiv Sazişlə müəyyən edilən öhdəlik və sövdələşmələrin yerinə yetirilməsinə xidmət edir.

Baş Kollektiv Sazişin baglanılmasında əsas məqsəd ölkə iqtisadiyyatının rəqabət qabiliyyətinin və əmək məhsuldarlığının yüksəldilməsinə, sabit məşgulluğa və əmək bazarının səmərəli infrastrukturunun inkişafına, iş yerlərinin təhlükəsizliyinə kömək edəcək şəraitin yaradılmasına, isçilərin və onların ailələrinin yaşayışının keyfiyyətinin artırılmasına, yoxsulluğun azaldılması istiqamətində tədbirlərin davam etdirilməsinə, sosial və makroiqtisadi sabitliyin qorunub saxlanılmasına və əhalinin sosial müdafiəsinin güclənməsinə istiqamətlənən sosial iqtisadi siyasətin təmin edilməsidir.

Baş Kollektiv Saziş yaxın gələcəkdə dövlətin sosial-iqtisadi siyasətinin iqtisadi inkişafın dayanıqlığının, istehsalatın modernləşdirilməsi və rəqabət qabiliyyətinin artırılmasına, innovasiya fəallığının və insan kapitalına investisiyaların stimullaşdırılmasına, vətəndaşların sosial müdafiəsinin gücləndirilməsinə, yeni iş yerlərinin açılmasına, əhalinin rifahının artırılmasına yönəldilməlidir.

Bazar iqtisadiyyatı şəraitində istehsal həcminin artırılmasında və yeni iş yerlərinin açılmasında əsas amil olan kiçik və orta sahibkarlıq subyektləri üçün dövlət yardımının ayrılmasına diqqət artırılacaq.

Yerli məhsulun istehsal həcmini, əməyin səmərəliliyini, malların keyfiyyətini və rəqabət qabiliyyətini yüksəltmək məqsədilə yerli istehsalçılara hərtərəfli yardımı artırmaq, qanunvericilik və beynəlxalq hüquq normaları əsasında daxili və xarici bazarlarda ölkənin yerli istehsalçılarının mənafelərini müdafiə etmək, istehsal olunmuş hazır məhsulun dünya bazarlarına ixracını stimullaşdıran tədbirlər sistemini gücləndirmək nəzərdə tutulur.

Regionların inkişafı, yeni iş yerlərinin yaradılması məqsədi ilə hər bir şəhər (rayon) üzrə əmək və təbii resursları, iqtisadi potensialı və infrastrukturu əks etdirən məlumat banklarının yaradılmasını başa çatdırmaq və bu informasiya mənbələri haqqında məlumatın yayılması üçün tədbirlərin görülməsi planlaşdırılır.

Ölkə gənclərinin və qadınların sahibkarlıq fəaliyyəti ilə məşğul olmaları üçün səylərin artırılması, kişi və qadın işçilər tərəfindən həyata keçirilən eyni işlər üçün bərabər həcmdə əməyin ödənilməsinin təmin edilməsi bir öhdəlik kimi götürülür. Kişi və qadın işçilər tərəfindən həyata keçirilən eyni işlər üçün bərabər həcmdə əməyin təmin edilməsi məqsədilə ASK yüksək səviyyəli müzakirələrdə iştirak edərək öz prinsipial mövqeyini daima nümayiş etdirmişdir.

Baş Kollektiv Sazişdə həmçinin işçinin layiqli əmək hüququnu təmin edən kompleks tədbirlərin işlənilməsini və həyata keçirilməsini, real əməkhaqqının artırılmasını, əhalinin həyat səviyyəsinin yaxşılaşdırılmasını və gəlirlər siyasətinin təkmilləşdirilməsini zəruri hesab edilir.

Baş Kollektiv Sazişdə tərəflər hesab edirlər ki, iqtisadiyyatın modernləşdirilməsi və innovasiyalı inkişafı ixtisaslı işçilərə tələbatı formalaşdırmalı, yüksək məhsuldarlıqla, təhlükəsiz əmək şəraiti və layiqli əməkhaqqı ilə səciyyələnən səmərəli iş yerlərinin yaradılması ilə müşayiət olunmalıdır.

Bu proseslər əhalinin məşğulluğu və insan resurslarının inkişafı sahəsində məqsədyönlü dövlət siyasəti ilə və sosial tərəfdaşların qarşılıqlı əməkdaşlığı şəraitində aşağıdakı istiqamətlərdə tədbirlər həyata keçirilməsi dəstəklənilir.

- əmək bazarına dair informasiya sisteminin təkmilləşdirilməsi;

- məşğulluq sahəsində dövlət siyasətinin səmərəliliyinin və dövlət xidmətlərinin keyfiyyətinin artırılması;

- işçi qüvvəsinin keyfiyyətinin yaxşılaşdırılması və onun peşəkar mobilliyinin inkişafı;

- əmək bazarı və məşğulluq sahəsində hüquqi tənzimləmənin təkmilləşdirilməsi;

- əmək miqrasiyasının səmərəliliyinin artırılması.

Baş Kollektiv Sazişdə gənclərin məşğulluğunun təmin edilməsinə, onların kənd yerlərində çalışmasını həvəsləndirən imtiyazlar sisteminin təkmilləşdirilməsinə, əmək şəraitinin yaxşılaşdırılmasına, həyat səviyyəsinin yüksəldilməsinə, tələbə və şagirdlərin, gənc işçilərin və mütəxəssislərin sosial müdafiəsinin gücləndirilməsinə istiqamətləndirilən tədbirlərin dəstəklənməsi tövsiyə olunur.

Azərbaycan Respublikası vətəndaşlarının sosial müdafiəsi üzrə hüquqlarının təmin edilməsi üçün əhalinin sağlamlığının mühafizəsi üzərində ictimai nəzarətin gücləndirilməsi, İİV/QİÇS-ə, şəkərli diabet xəstəliyinə və digər xroniki xəstəliklərə tutulanların sosial müdafiəsinin gücləndirilməsi istiqamətində tədbirlərin davam etdirilməsi, məktəbəqədər təhsil müəssisələrində uşaq qidasının keyfiyyətinin yaxşılaşdırılması məqsədilə müvafiq tədbirlərin həyata keçirilməsinin davam etdirilməsi və s. zəruri hesab edilir.

Əmək hüquqlarının müdafiəsi, əməyin mühafizəsi, texniki və ekoloji təhlükəsizlik əməkdaşlığın əsas istiqamətlərindən biri kimi qiymətləndirilir. Əməyin mühafizəsi üzrə mütəxəssislərin hazırlanması, ixtisaslarının artırılması, təcrübə mübadiləsinin aparılması üçün şərait yaratmaq və əməyin mühafizəsi tələblərinin gücləndirilməsi məqsədilə əmək qanunvericiliyinin təkmilləşdirilməsi üzrə təkliflər hazırlanması bir məqsəd kimi qarşıya qoyulmuşdur.

ASK tərəfindən qarşılıqlı əlaqələr sosial tərəfdaşlıq prinsipləri əsasında inkişaf etdirilmiş, müəyyən edilmiş öhdəlik və şövdələşmələrə tam riayət olunaraq birgə işin aparılması nəticəsində ölkə iqtisadiyyatının hər bir sahəsində uğurlu nailiyyətlər əldə edilmişdir.

Konfederasiya sahibkarlarla, dövlət orqanları ilə, yerli qurumlarla birgə işi, Beynəlxalq İşəgötürənlər Təşkilatında, Sənayeçilərin və Sahibkarların Beynəlxalq Konqresində üzvlüyü ləyaqətlə davam etdirmiş, respublikada fəaliyyət göstərən bir çox dövlətlərin və Azərbaycanın xaricdəki səfirlikləri, beynəlxalq təşkilatlarlar, o cümlədən BƏT, Dünya Bankı, Beynəlxalq Maliyyə Korporasiyası, Avropa Birliyinin Komissiyaları və təşkilatları, Qara Dəniz və Türkdilli ölkələrin İqtisadi Əməkdaşlıq Təşkilatlarının Biznes Şuraları ilə əməkdaşlığı daha da sıx olmuşdur.

Azərbaycan Respublikası regionlarının sosial-iqtisadi inkişafı ilə bağlı görülən işlər, bu sahədə həyata keçirilən tədbirlər ölkənin regionlarında qeyri-neft sahələrinin, xüsusilə emal sənayesinin sabit inkişafına zəmin yaratmış, ölkədə yeni iş yerləri açılmış, yoxsulluğun səviyyəsinin azaldılması istiqamətində səmərəli işlər görülmüşdür. Ölkədə azad sahibkarlıq mühitinin formalaşması fərdi sahibkarlıq kimi yeni təsərrüfatçılıq formalarının təşəkkül tapmasına təkan vermişdir. ASK ilə İndoneziya Ticarət Sənaye Palatası, Tehran Ticarət, Sənaye və Kənd Təsərrüfatı Palatası, Litva İşəgötürənlər Konfederasiyası, İngiltərənin məşhur "Economist" jurnalı ilə, İtaliya-Azərbaycan Ticarət İnstitutu, Macarıstan Sahibkarlar və Sənayeçilər Konfederasiyası, Türkiyədəki Azərbaycan İş adamları Birliyi, Alman Azərbaycan Məsləhət Şirkəti, Koreya Sənaye Assosiasiyası və Azərbaycan Diplomatik Akademiyası, Azərbaycan Dövlət İqtisad Universiteti, Azərbaycan Universiteti, Qafqaz Universiteti, AMEA-nın İqtisadiyyat İnstitutu, Əmək və Əhalinin Sosial Müdafiəsi Nazirliyi, Qiymətli Kağızlar üzrə Dövlət Komitəsi ilə əməkdaşlıq müqavilələri imzalanmış, 2014-cü ilin 6 ayı da daxil olmaqla bağlanan əməkdaşlıq müqavilələrinin sayı 71-ə çatdırılmışdır.

İqtisadiyyat və Sənaye Nazirliyi, Milli Qeyri-Hökümət Təşkilatları Forumu, Türkiyənin Dış Ekonomik İlişkilər Kurulu (DEİK), Auditorlar, Fransa-Azərbaycan ticarət palataları, İteka Caspian MMC, Litva işəgötürənlər konfederasiyası, Azərbaycan Mikromaliyyə və Gəncə şəhər sahibkarlar assosiasiyaları və "Marketinq Mütəxəssislər" ictimai birliyi, banklar ilə də imzalanmış əməkdaşlıq müqavilələrindən tərəflər bəhrələnməkdədir.

Bunlarla yanaşı, Konfederasiya Azərbaycan Korporativ Direktorlar və Menecerlər Assosiasiyası, Qadın Dünyası İctimai Birlikləri, Türk Standartları İnstitutu, ATİB, TUSİAB, Azərbaycan-Rusiya işgüzar Əməkdaşlıq Palatası, Palmaliv şirkəti ilə də əməkdaşlıq edir.

Konfederasiya - Azərbaycan Respublikasının İqtisadiyyat və Sənaye Nazirliyi və Konfederasiya tərəfindən keçirilən Azərbaycan-Xorvatiya, Azərbaycan-İtaliya, Azərbaycan-Rusiya, Azərbaycan-Gürcüstan-Türkiyə, Azərbaycan-Almaniya, Azərbaycan-Türkiyə, Azərbaycan-Latviya, Azərbaycan-Macarıstan, Azərbaycan-Belarus, Azərbaycan-Andorra, Azərbaycan-Niderland, Azərbaycan-Qazaxıstan, Azərbaycan-Çexiya, Azərbaycan-Slovakiya, Azərbaycan-Serbiya, Azərbaycan-Sloveniya, Azərbaycan-Polşa, Azərbaycan-Hollandiya, Azərbaycan-Bolqarıstan, Azərbaycan - İtaliya, Azərbaycan-İsveçrə, Azərbaycan- Çin, Azərbaycan-Pakıstan, Azərbaycan-Birləşmiş Ərəb Əmirlikləri, MDB ölkələri, Asiya İnkişaf Bankı və digər biznes-forumlarda İqtisadiyyat və Sənaye Nazirliyinin Bakı şəhərində, Quba, Xaçmaz, Göyçay, Gəncə-Qazax və Qəbələ, Şəmkir, Salyan bölgələrində keçirdiyi tədbirlərdə yaxından iştirak etmiş, xarici iş adamları ilə ASK-da biznes-forumlar təşkil olunaraq tədbirlərdə Azərbaycan sahibkarlarının iştirakı təmin olunmuşdur.

Azərbaycan Sahibkarlar Konfederasiyası öhdəliklərin həyata keçirilməsi üçün həm müvafiq dövlət və hökumət orqanları ilə birgə, həm də öz üzvləri vasitəsilə zəruri tədbirlər həyata keçirir. İqtisadi inkişaf strategiyasının təməli olan iqtisadi qanunvericiliyin təkmilləşdirilməsində yaxından iştirak edir. ASK-nın Rəyasət Heyəti sosial-iqtisadi məsələləri diqqət mərkəzində saxlayaraq, regionlarda yeni sahibkarlıq ittifaqlarının Xaçmazda, İsmayıllıda, Mingəçevirdə, Tovuzda, Şəmkir və Sumqayıt şəhərlərində yaradılmasına kömək göstərilmiş və bu sahədə işlər davam etdirilir.

Konfederasiya 2014-cü ildə də uğurlu fəaliyyətini davam etdirir.

ASK-nın əhalinin həyat səviyyəsinin və gəlirlərinin artırılması, yoxsulluğun azadılması istiqamətində üzərinə götürdüyü öhdəliklərin icrasını təmin etmək məqsədilə bir çox kompleks tədbirlər həyata keçirir.

Respublikada həyata keçirilən məqsədyönlü islahatlar ölkədə siyasi və iqtisadi sabitliyin bərqərar olmasına, sosial-iqtisadi inkişaf meyillərinin möhkəmlənməsinə imkan yaradır. İctimai həyatın bütün sahələrində dönüş yaranmış, əhalinin maddi rifah halının yaxşılaşmasında nəzərə çarpacaq uğurlar qazanılır.

Konfederasiya layiqli əməyi Azərbaycan Respublikasında milli iqtisadiyyatın və sosial siyasətin ən əsas istiqamətlərindən biri kimi qiymətləndirir. Beynəlxalq Əmək Təşkilatının konsepsiyasına əsasən istər kişi, istərsə də qadınlar üçün azad, bərəbərhüquqlu, təhlükəsiz və insan ləyaqətinə hörmət edən tələblərə cavab verən layiqli və məhsuldar işlə təminat imkanlarının təkmilləşdirilməsi öz fəaliyyətində ən əsas istiqamətlərdən biri kimi qiymətləndirir. Hər bir kəsin layiqli əməklə təmin olunması milli və beynəlxalq siyasətin və milli inkişaf konsepsiyasının, eləcə də Minilliyin İnkişaf Məqsədlərinə nail olunması yolunda ən önəmli səylərin ayrılmaz hissəsi olan yoxsulluğun azaldılması strategiyası da daxil olmaqla qarşıda duran vəzifələrin öhdəsindən layiqincə gəlinməsi Konfederasiyanın əsas məqsədidir

Ölkədə aparılan məqsədyönlü siyasət nəticəsində 2014-cü ilin altı ayında 65 min yeni iş yeri açılmışdır ki, onlardan 52 mini daimi iş yeridir. 2003-cü ildən bu günə qədər 1 milyon 300 min iş yeri açılmışdır ki, onlardan təqribən 1 milyonu daimi iş yeridir. Demək olar ki, işsizlik böyük dərəcədə aradan qaldırılmışdır. Sosial məsələlərin həlli bu altı ayda da diqqət mərkəzində olmuşdur. Orta əməkhaqqı artıb, hazırda 440 manat və ya 560 dollar təşkil edir.

Vətəndaşların sosial müdafiəsinin gücləndirməsi, sosial sektorun inkişafı istiqamətin müxtəlif sosial proqramların həyata keçirilməsini uğurla davam etdirmişdir. ASK bu istiqamətdə müvafiq işlər aparmış, Baş Kollektiv Sazişin öhdəliklərinin həyata keçirilməsi üçün səy göstərmişdir.

Uşaq əməyinin, məcburi əməyin və insan alverinin aradan qaldırılmasını təmin edən Əmək miqrasiyasını tənzimləyən dövlət sosial proqramlarını dəstəkləyərək öz təkliflərini vermişdir.

Ölkədə uşaq hüquqlarının müdafiəsi sahəsində bir sıra dövlət orqanları və ictimai birliklər ilə yanaşı Sahibkarlar Konfederasiyası da iş aparır. "Uşaqların sağlamlaşdırılması və istirahəti haqqında" qanun layihəsinə Sahibkarlar Konfederasiyasının təcrübəsinə əsaslanaraq bir sıra rəy və təkliflər verilmişdir. Baş Kollektiv Sazişdə bu məsələlərə aid öhdəliklər əks olunmuşdur.

Əmək miqrasiyasını tənzimləyən tədbirlərin icrası üçün Azərbaycan Sahibkarlar Konfederasiyasının Avropa Birliyi, ATƏT, BƏT və BMQT-nin iştirakı ilə keçirilən layihələrin icrasında yaxından iştirak edir və bu sahədə qəbul olunmuş sənədlərə əsaslanaraq öz fəaliyyətlərini davam etdirir.

Hazırda sığorta - pensiya sisteminin dayanıqlı və dinamik inkişafına nail olunması "2009-2015-ci illərdə Azərbaycan Respublikasında sığorta-pensiya sisteminin inkişafına dair Dövlət Proqramı" na uyğun olaraq həyata keçirilir. Pensiyaların baza və sığorta hissələrinin artımından sonra əmək pensiyalarının orta aylıq məbləği 172,7 manata, yaşa görə əmək pensiyaları 190,9 manata çatdırılmışdır. Yaşa görə pensiyalar üzrə əvəzetmə əmsalı isə 45 faizə yüksəlmişdir.

Nəticədə pensiyaların orta aylıq məbləği pensiyaçılar üçün yoxsulluq həddini 1,7 dəfə üstələyib. Halbuki, 2003-cü ildə bu göstərici yoxsulluq həddindən 2 dəfə aşağı məbləğdə ifadə olunurdu.

Hər bir inkişaf etmiş ölkədə olduğu kimi Konfederasiya işçilərin həyatı və sağlamlığını əsas dəyərlər kimi qiymətləndirir. Bu məqsədlə işçilərin həyat və sağlamlığının qorunması əməyin mühafizəsi sahəsində dövlət siyasətinin və strategiyasının başlıca istiqamətlərinin müəyyən edilməsində yaxından iştirak edib və öz tövsiyələrini vermişdir. Konfederasiyanın əməyin mühafizəsi sahəsində siyasəti BƏT-in 187-ci Konvensiyasına uyğun olaraq təhlükəsiz əmək şəraitinin yaradılmasına yardım etməkdir. Uzun illərin təcrübəsi göstərir ki, müəssisədə əməyin səmərəli mühafizəsinə ancaq sistemli, yeni kompleks şəkildə yanaşmaqla nail olmaq mümkündür.

Konfederasiya sosial tərəfdaşlarla birlikdə əməyin mühafizəsi üzrə mütəxəssislərin hazırlanması, ixtisasların artırılması, təcrübə mübadiləsi aparmaq üçün birgə seminarlar və kurslar təşkil edilməsi, əməyin mühafizəsi tələblərinin gücləndirməsi məqsədilə əmək qanunverciliyinin təkmiləşdirilməsi üzrə təkliflər hazırlamışdır. İş yerlərində əməyin mühafizəsi normaları və qaydalarına riayət olunması məqsədilə işəgötürənlər fərdi mühafizə vasitələrindən istifadə edilməsi, onları hansı risklərdən qoruması barədə maarifləndirmə işləri aparırlar.

Əməyin mühafizəsi tələblərinin gücləndirilməsi məqsədilə əmək qanunverciliyinin təkmilləşdirilməsində, Beynəlxalq Əmək Təşkilatının "Əməyin təhlükəsizliyi və gigeyinası haqqında" 155 nömrəli, "Kənd təsərrüfatında əməyin təhlükəsizliyi və gigeyinası haqqında" 184 nömrəli, "Əmək təhlükəsizliyinin və gigeyinasının təmin edilməsi haqqında" 187 nömrəli Konvesiyalara qoşulması üçün tədbirlərin keçirilməsində, "Azərbaycan Respublikasında alternativ və bərpa olunan enerşi mənbələrindən istifadə olunması barədə Dövlət Proqramı" üzrə tədbirlərin həyata keçirilməsində Azərbaycan Sahibkarlar Konfederasiyası yaxından iştirak etmiş, təkliflər hazırlamışdır.

Konfederasiya tərəfindən regionlarda mövcud potensialdan səmərəli istifadə etməklə iqtisadiyyatın ayrı-ayrı sahələrinin inkişafına, istehsal müəssisələrinin fəaliyyətinin bərpasına, daha da genişləndirilməsinə, ixracyönümlü və idxalı əvəz edən məhsul istehsalının stimullaşdırılmasına və sahibkarlıq fəaliyyətinin artırılmasına xüsusi diqqət verilmişdir.

Əhalinin sağlamlıq mühafizəsini təmin etmək məqsədi ilə ekolojı problemlərin aradan qaldırılması, ekoloji vəziyyətin yaxşılaşdırılması üzrə mövcüd olan layihələr, proqramların, planların həyata keçirilməsində ASK fəal iştirak edir.

Biznes mühitinin yaxşılaşdırılması məqsədilə Vergi Məcəlləsinə dəyişiklik və əlavələr edilməsi üçün sahibkarlardan daxil olmuş təkliflər ümumiləşdirilərək Vergilər Nazirliyinə təqdim olunmuşdur. Vergilər Nazirliyi ilə bağlanmış əməkdaşlıq müqaviləsinə uyğun olaraq vergi ödəyicilərinə xidmət mərkəzlərində ASK-nın mütəxəssisləri çalışır və onlar tərəfindən sahibkarlara göstərilən xidmət işi yaxşılaşdırılmışdır. Hazırda fəaliyyətdə olan Vergi ödəyicilərinə xidmət mərkəzlərinin sayı 38-dir və onların sayının artırılması istiqamətində iş aparılır.

ASK sosial partnyorluq sistemini inkişaf etdirməyə böyük önəm verərək sosial-iqtisadi siyasətin işlənməsi və həyata keçirilməsi məsələləri üzrə daim məsləhətləşmələr aparmış, sosial əmək münasibətləri, əhalinin məşğulluğu, miqrasiya və sosial təminat sahəsində milli proqram, qanun və digər normativ-hüquqi aktların layihələrin hazırlanmasında və müzakirəsində fəal iştirak edərək öz təkliflərini vermişdir. Sosial tərəfdaşlıq, həmçinin BƏT-in Konvensiyalarının birgə müzakirəsi və ya ratifikasiya edilməsi üzrə birgə məsləhətləşmələrin aparılmasında da öz əksini tapmışdır.

Konfederasiya Azərbaycan Respublikasının Xarici İşlər, İqtisadiyyat və Sənaye, Vergilər, Əmək və Əhalinin sosial müdafiəsi, Mədəniyyət və Turizm, Təhsil, Gənclər və İdman, Kənd Təsərrüfatı nazirlikləri, Ailə, Qadın və Uşaq Problemləri üzrə Dövlət Komitəsi, Qiymətli Kağızlar üzrə Dövlət Komitəsi, bir qrup Dövlət Səhmdar Cəmiyyətləri və şirkətləri ilə, Ombudsman aparatı ilə yaxından əməkdaşlıq edərək onların təşkil etdiyi tədbirlərdə iştirak etmiş, onlar da Konfederasiyanın tədbirlərinə dəvət olunmuşlar.

Baş Kollektiv Sazişin müddəalarını təmin etmək məqsədilə Azərbaycan Respublikasının Nazirlər Kabineti yanında Sosial və İqtisadi Məsələlər üzrə Üçtərəfli Komissiyanın Əsasnaməsinin layihəsi Konfederasiyada müzakirə olunmuş və qəbul olunması üçün tövsiyələr verilmişdir.

Sosial və İqtisadi Məsələlər üzrə Üçtərəfli Komissiyanın yaradılmasında əsas məqsəd sosial-iqtisadi siyasətin aparılmasının razılaşdırılmış ümumi prinsiplərini müəyyən etmək üçün təkliflər vermək, sosial əmək münasibətlərini tənzimləmək, sosial stabilliyi qorumaq məqsədilə sosial dialoqun inkişafına dəstək vermək, Baş Kollektiv Sazişin layihəsinin hazırlanmasında işlərin əlaqələndirilməsi, sosial-əmək münasibətləri, əhalinin məşgullugu, əmək miqrasiyası, əmək bazarının ixtisaslı işçi qüvvəsi ilə təmin edilməsi, sosial təminat sahəsində qanun və digər normativ-hüquqi aktların və dövlət proqramlarının layihələrinin hazırlanması və tədbirlərin həyata keçirilməsi ilə bağlı məsləhətləşmələrin aparılması və s. təşkil edir.

Konfederasiya İtaliyanın Turin şəhərində "Mərkəzi Asiya və Qafqaz ölkələrində üçtərəfli sosial dialoqun milli mexanizminin gücləndirilməsi" mövzusunda keçirilən seminarda ASK-nın, ƏƏSMN-nın və AHİK-nın əməkdaşları iştirak ediblər. Qara Dəniz İqtisadi Əməkdaşlıq Təşkilatının və Beynəlxalq İşəgötürənlər Təşkilatının Cenevrədə keçirilən 101-ci Əmək Konfransının sessiyasında Azərbaycan hökümətinin və Azərbaycan Həmkarlar Konfederasiyasının nümayəndə heyəti ilə birlikdə iştirak etmişdir.

Azərbaycan Sahibkarlar Konfederasiyası zamanın tələblərini nəzərə alaraq, gündəlik fəaliyyətini durmadan təkmilləşdirir, birgə fəaliyyəti müəyyən edən Baş Kollektiv Sazişin müddəalarını həyata kecirmək ücün bütün vasitələrdən istifadə edərək müstəqillik yollarında inamla irəliləyən doğma Azərbaycanın, o cümlədən sahibkarlığın inkişafının təmin olunması ücün əlindən gələni edəcəkdir.

Məmməd MUSAYEV,

Azərbaycan Respublikası Sahibkarlar (İşəgötürənlər) Təşkilatları Milli Konfederasiyasının prezidenti

Azərbaycan. - 2014.- 12 avqust.- S. 8.