Avropanın ən məhsuldar südlük
keçiləri Qarabağdadır
Əksər ölkələrdə keçiçilik heyvandarlığın ən unudulmuş sahələrindən sayılır. Heyvandarlıqla məşğul olduğum 58 ildə qəzet və jurnallarda keçiçiliklə bağlı hər hansı bir yazının getdiyini və ya hər hansı bir kitabçanın nəşr olunduğunu xatırlamıram. Odur ki, bu mövzuda söhbət açmağı vacib saydıq.
Keçi qiymətli ev heyvanıdır. Vaxtilə almanlar onu "kasıbların inəyi" adlandırırdılar. Fransızlar keçilərin "kasıbların inəyi" adlandırılmasının əleyhinə çıxaraq onun "zəif və xəstə adamların inəyi" adlandırılmasını daha düzgün hesab edirdilər. Sonralar Almaniyada keçiləri "proletar inəyi" adlandırmağa başladılar. Çünki Birinci Dünya müharibəsində və sonrakı ağır illərdə bir çox fəhlə ailələri yalnız keçinin hesabına aclıqdan xilas oldu.
SSRİ-də keçi saxlayanları almanlar yaxşı başa düşürdülər. İlk vaxtlar Rusiyada zaanen keçilərini başqa cür adlandırırdılar - "Stalin inəkləri". Çünki inqilabdan sonrakı ərzaq böhranında, həmçinin Böyük Vətən müharibəsindən sonrakı aclıq illərində kəndlilərin həyatında keçilərin rolu hamıya yaxşı məlum idi. O dövrdə inək saxlamaq mümkün deyildi.
Bütün dövrlərdə yoxsulların yeganə "var-dövləti" olan keçilərə, digər ev heyvanlarından fərqli olaraq, xüsusi qayğı göstərilməyib. Heç kəs onların yaxşılaşdırılması barədə düşünmürdü, keçi sahiblərinin vəsaiti və bacarığı yox idi, keçilərin ifrat dərəcədə istismar olunması, pis saxlanması və uzun illər qohumluqda yetişdirilməsi nəticəsində cinsə məxsus keyfiyyətlər müəyyən qədər itirilmişdi. Almanlar isə əksinə, qaramalla yanaşı, keçilərin də böyük gəlir verdiyini nəzərə alaraq, alman inadkarlığı ilə geniş miqyasda onların yetişdirilməsinə və yaxşılaşdırılmasına girişdilər və böyük nailiyyətlər qazandılar.
Azərbaycanda ən çox keçi 1945-ci ildə olmuşdur. O vaxt ölkədə 733,4 min baş keçi var idi. Keçilər qoyun sürüsünün 21,1 faizini təşkil edirdi. Böyük Vətən müharibəsi illərində hamının inək saxlamağa imkanı yox idi. Kişilər və cavan oğlanlar müharibəyə getmişdi. Yaxşı inək tapmaq, satın almaq, onun üçün yem tədarük etmək çətin məsələ idi.
1965-ci ildən başlayaraq 1993-cü ilədək respublikada keçilərin sayı azalmağa başladı. 1993-cü ildə bütün kateqoriya təsərrüfatlarda 168,1 min baş keçi var idi.
Sonrakı dövrdə Kənd Təsərrüfatı Nazirliyi, alimlər və mütəxəssislər keçiçiliyin intensiv inkişaf etdirilməsi vəzifəsini qarşıya qoydular. Respublikada ixtisaslaşmış keçiçilik təsərrüfatları yaradılmağa başlandı. Sahibkarlar keçiçiliyin inkişafına diqqət və qayğını artırdılar. Nəticədə keçilərin baş sayı get-gedə artmağa başladı. 2014-cü ilin yanvar ayının 1-nə respublikada 651,1 min baş keçi vardı. Ancaq əsasən az məhsuldar yerli keçilər saxlanılır. Buna baxmayaraq, keçən il respublikada 10-11 min ton keçi südü istehsal olunmuşdur.
Dədə-babalarımız keçiləri qoyun sürüsünün bələdçisi adlandırmışlar. Keçilər qabağa düşməklə qoyun sürüsünü ən təhlükəli dağ yolları, sıldırım qayalar və daşlı cığırlarla otlaqlara çatdırır, sürünü kütləvi qırğından xilas edirlər. Alimlər keçinin dırnağında maqnetizm xüsusiyyətlərinin olmasını qeyd edirlər. Bunun hesabına keçilər qoyunlarda qorxmazlıq hissi yaradır, davarları qorxusuz-ürküsüz öz arxalarınca aparırlar.
Azərbaycanda uzun illərdir ki, yerli keçilər üzərində damazlıq-seleksiya işləri aparılmır. Əvvələr olduğu kimi, indi də yerli keçilərin ət və süd məhsuldarlığı çox aşağıdır. Onlar gündə 1-2 litr süd verir ki, bu qədər süd kasıb və aztəminatlı ailələrin tələbatını qismən ödəyir.
Keçi saxlamaq kəndli üçün çox əlverişlidir. Keçilər tələbkar olmayan, yüksək qulluq tələb etməyən, ucuz qiymətə satılan heyvanlardır. Onu saxlamaq çox zəhmət tələb etmir. İnəklərin saxlanması çətin olan yerlərdə keçiləri saxlamaq mümkündür. Keçilərə hətta yeniyetmələr də baxa bilirlər. Onlar ot, ağaç və kol bitkiləri ilə kifayətlənir, həm də olduqca təmiz heyvandır.
Keçi südündə inək, camış və qoyun südünə nisbətən su çox olur - 87,2 faiz, quru maddə isə az - 12,8 faizdir. 4,5 faiz yağ, 2,8 faiz kazein, 0,7 faiz qlobulin və albumin, 4,2 faiz süd şəkəri, 0,8 faiz mineral duzlar mövcuddur. 1 kq keçi südündə 722 kkal var. Süddə kalsiumun, qlobulin və albuminin çox olması keçi pendirini ağappaq göstərir.
2012-ci ildə sabiq kənd təsərrüfatı naziri, hazırda Azərbaycan Respublikası Baş nazirinin müavini işləyən İsmət Abasovla Hollandiyada (Niderlandda) rəsmi səfərdə olarkən iri keçiçilik təsərrüfatı ilə tanış olduq. Keçilərin görünüşü, məhsuldarlığı, saxlanma şəraiti bizi valeh etdi. O, qəti surətdə tapşırıq verdi ki, bu keçilərin ən azı 2000 başı damazlıq məqsədilə Azərbaycana gətirilməlidir.
Ağcabədi rayonunun Ağabəyli kəndində heyvandarlığa böyük maraq göstərən, rayon heyvandarlar cəmiyyətinin sədri, tanınmış ziyalı Mülhazil Balakişiyev böyük həvəslə bu işə girişdi. "Aqrolizinq" ASC idarə heyətinin sədri Əli Bayramov dövriyyə vəsaiti hesabına Hollandiyadan zaanen və alp keçilərinin damazlıq məqsədilə Azərbaycana gətirilməsinə şərait yaratdı.
Mülhazil Balakişiyev 2013-cü ilin iyun ayında fəal işə başladı. 6 ay müddətində hər birində 600 baş keçi yerləşən iki ədəd müasir tipli iri tövlə tikildi. Keçiçilik kompleksində süd sağımı və süd emalı sexləri, doğum şöbəsi, yem anbarı da tikildi. Hazırda çəpişlər və təkələr üçün ayrıca pəyələrin tikintisinə başlanılmışdır. Beləliklə, təsərrüfatda 6000 başlıq pəyə olacaqdır.
İlk dəfə olaraq Azərbaycana keçən il oktyabrın 2-də 670 baş keçi gətirilmişdir. Onun 330 başı zaanen, 340 başı isə alp keçiləridir.
Kompleksin ərazisi 11 hektardır. Burada hazırda 3750 baş keçi saxlanılır. Onun 2645 başı ana keçi, 1000 başı çəpiş, qalanı isə təkələrdir.
Zaanen keçiləri. Bu keçilərin vətəni İsveçrədir. Orada bu cinsdən olan keçilər zaanental da adlanır. Heyvanlar, əsasən, Simmental və Zaanental vadilərində yetişdirilir. Bu cinsin fərqləndirici əlamətləri aşağıdakılardır:
- başı buynuzsuzdur, mütənasibdir, İsveçrənin başqa tip keçilərinə nisbətən qısadır;
- alnı və üzü enlidir;
- döşü enli və həcmlidir;
- yelini böyük və güclü inkişaf etmişdir;
- qıçları bərk və şaquli vəziyyətdədir, dırnaqları möhkəm olur;
- cidav hündürlüyü 76-89 sm, diri çəkisi 57-90 kq-dır. Bu cins İsveçrə keçiləri arasında ən irisidir.
Zaanen keçiləri vadilərdə yaşamağa üstünlük verir, çox möhkəm bədəni ilə fərqlənir, dağ şəraitinə də dözür və özünü yaxşı hiss edir. Gündə 4,5-6,15 litr süd verir və bu məhsuldarlıq 5 ay davam edir. Yaşlı keçilər gündə təxminən 3 litr süd verir. Bütün laktasiya dövründə keçilərdən 615-779 litr süd alınır. Laktasiya müddətində 75-80 vedrə, hətta 100 vedrə (1000 litr) süd vefən keçilər çoxdur.
Zaanen keçiləri tezyetişkəndir, ilin axırında çəpişlərin inkişafı başa çatır.
Alp keçiləri. Vətəni İsveçrədir. Əsasən Alp dağlarında yetişdirilir. Bu cinsdən olan keçilərin bədəni palıd (kofe) rəngində olur və vəhşi keçiləri xatırladır. Lakin bütün beli boyu tünd rəngli kəmər uzanır. Üzü, qulaqlarının kənarları, döşü və çiyinləri, dizləri, burun aynaları, buynuz və dırnaqları da tünd palıd rəngindədir. Bu keçilər XIX əsrdən başlayaraq İtaliyaya və Fransaya aparılmış və bu ölkələrdə də çox sayda geniş inkişaf tapmışdır.
Alp keçiləri ətlik-südlük istiqamətlidir. Pəyə şəraitində alp keçilərinin süd məhsuldarlığı zaanen keçilərindən çox az fərqlənir. Lakin kökəlməyə meyillidir və zaanen keçilərinə nisbətən çox ət verir. Onlar daha çox əhliləşdirilmişdir, əmrə tabe olmağı sevir, adam görən kimi yaxınlaşır, nəvazişlik nümayiş etdirir.
Hazırda kompleksdə 1131 baş keçi
sağılır. Gündə 2 tondan çox süd istehsal olunur. Südün
hamısı "Atena" Süd Emalı Kombinatına
göndərilir. Zaanen keçiləri ildə
orta hesabla 700-800 kq, alp keçiləri isə 650-700 kq süd
verir. Bir çox keçilərin məhsuldarlığı
1000-1200 kq-dır. Zaanen keçiləri
gündə orta hesabla 4-6 litr, alp keçiləri isə 4-5 kq
süd verir.
Müəssisədə
82225 nömrəli "Çempion" ləqəbli zaanen
cinsindən olan keçi gündə 6,4
kq, ildə isə 1400-1500 kq süd verir. Bu
keçi nəzarət altında yemləndirilir və ona
xüsusu qulluq göstərilir.
Alp
keçilərinin südü yağlı olur, süddə
yağ 3,8 faizdir. Zaanen keçilərində
isə yaglılıq 3,6-3,7 faizə
çatır. Keçi südü bir qədər qatı
olmaqla, asanlıqla köpüklənir, ağ
rənglidir, bəzən sarı rəngə çalır.
Zaanen və
alp keçiləri cütləşməyə buraxılmadan
1,5-2 il süd vermək qabiliyyətinə
malikdir. Keçilər süd sexində gündə
3 dəfə aqreqatlarla sağılır. Hər
bir keçinin verdiyi süd kompüterdə əks olunur.
Orta hesabla diri çəkisi 35 kq olan keçilər ən
adi şəraitdə ildə 350-360 kq süd verir ki, bu da
onların diri çəkisindən 10 dəfə
artıqdır. Halbuki inəyin verdiyi süd diri çəkisindən
5-6 dəfə artıq olur.
Keçilərin
təsərrüfatda 10 il
saxlanılmasına baxmayaraq, onların ən yüksək
süd məhsuldarlığı 3-4 yaşlarında olur.
Keçi südü inək südünə nisbətən
yüngül və dadlıdır. Keçi inəyə
nisbətən sağlam olur. Keçi otlayarkən və
ya ot yeyərkən ehtiyatlı olur, yemə
tələbkarlıqla yanaşır, necə deyərlər,
yaxşını yamandan seçməyi bacarır, otlayarkən
qida maddələri ilə zəngin bitkiləri tapıb yeyir. Keçilər otlaqda hər yemi yemir. Onlar
daşların arasında bitən kobud otların zərif
gövdələrini, rast gəldikləri kolların incə
yarpaqlarını yeyir, ota isə az diqqət
yetirir. Mineral gübrələr səpilmiş
tarlalardan tez keçir, belə sahələrin otlarına dəymir.
İnək ayaqaltı yemlərin
hamısını, hətta həzm olunmayan maddələri də
yeyir.
Keçi südü ana südünə çox
yaxındır. Ona görə də südü az
olan qadınlar öz körpələrinə keçi
südü verirlər. 2007-2008-ci illərdə Bakı şəhərindəki
Krupskaya adına doğum evinə gündə
10 kq keçi südü göndərilirdi.
Keçi
südündə yağ və albuminin
miqdarı inək südünə nisbətən çox
olur. Keçi südündə yağ
kürəcikləri inək südünə nisbətən
kiçikdir. Ona görə də yaxşı mənimsənilən
emulsiya əmələ gəlir və ana südünü
yaxşı əvəz edir.
Hazırda Qərbi Avropada və Amerikada keçi
südündən istifadə edən körpələr evi
vardır. Vaxtilə Sankt-Petreburqda da belə körpələr
evi olmuşdur. Fransada tərbiyə evlərində
keçilər saxlanılır ki, burada körpələr
keçilərin altında yemləndirilir, onlar keçini
özləri əmirlər.
Ağcabədi rayonunda keçi südünün 1 litri
2 manata, inək südü isə 1 manata satılır. Bakı şəhərindəki "Tahir" marketdə
keçi südünün litri 6 manata satılır.
Kompleksin süd emalı sexində baytar-sanitariya
qaydalarına ciddi əməl olunur. İşçilərin hər biri
iş paltarı ilə təmin olunur. Emal sexində 4 növ
pendir istehsal olunur: motal pendiri, duzlu dəymiş pendir, təzə
pendir, qəlib pendiri. 5-6 kq keçi
südündən 1 kq təzə pendir istehsal olunduğu
halda, 1 kq pendirin alınmasına 7-8 kq inək südü sərf
olunur. Pendirin kiloqramı növündən
asılı olaraq 15-20 manata satılır.
Keçilərin südündən pendirdən başqa
müxtəlif məhsullar da emal olunur. Cənubi Qafqazda belə
hesab edirlər ki, inəkdən yaxşı yağ,
qoyundan pendir, camış və keçidən isə
yaxşı qatıq alınır. Yüksək
keyfiyyətli keçi qatığı qatı, sıx, hamar
olur. Qaşıqla kəsilərkən
qatıqdan zərdab ayrılmır. Qatığın
əsas üstünlüyü odur ki, ondan müalicəvi məqsədlə
istifadə olunur.
Keçi əti barədə xüsusilə qeyd etmək
lazımdır. Keçi əti çox ləzizdir, dadlı, piyi az olur. Ətin tərkibində
xolestirin, demək olar ki, yoxdur. Hər
keçi orta hesabla 25-30 kq ət verir. Həkimlər
bir çox xəstəliklərdə, xüsusilə şəkər
xəstəliyində keçi ətindən istifadə
olunmasını tövsiyə edirlər.
Keçinin həzm orqanları inəyinkindən xeyli fərqlənir. Keçilərdə
bağırsaqların qeyri-adi uzunluğu diqqəti cəlb
edir, bədənin uzunluğu ilə müqayisədə 27 dəfə
çoxdur. Mədəaltı vəz həddindən
çox inkişaf etmişdir.
Kompleksdə keçilərin yemləndirilməsinə
diqqətlə yanaşılır və yem rasionunun tərkibi
südün keyfiyyətindən və miqdarından
asılı olaraq dəyişdirilir. 1 baş keçiyə 2,5 kq yonca, 0,5 kq balanslaşdırılmış
qarışıq yem, 0,3 kq arpa yarması, 5-6 qram duz verilir.
Keçilərə
saxlayıcı yem kimi ot və küləş,
məhsuldar yem kimi qarışıq yem və kökümeyvəli
verilir.
Keçilər streslərə çox həssasdır. Stres
keçirən kimi südü azalır, ciddi
narahatçılıq başlayır, mələyir, normadan
çox gəzir və s. Stresin qarşısını almaq
üçün hər bir keçiyə yay aylarında
gündə 5 qram soda verilir. Keçilərlə
mehriban, oxşayıcı, nəvazişli, mülayim, sakit,
yumşaq rəftar edilməlidir. Onlarla
kobud və pis rəftar etdikdə, pəyədə
hündürdən danışdıqda, xüsusilə
onların yeri dar olduqda keçilər tərs, şıltaq və
kobud olurlar. Keçilərə baxmağa
heyvana məhəbbəti olan adamlar cəlb olunmalıdır.
Kompleksdə hər 100 baş zaanen və alp keçilərindən
ən azı 150-170 baş bala alınır. İntensiv
yemləmə şəraitində ildə 2 dəfə bala
almaq da mümkündür. Bunun üçün noyabr-dekabr və
may-iyun aylarında cütləşmə kampaniyası
aparılır. Keçilərdə həvəs
24-36 saat çəkir. Hər 18-25-30
gündən bir həvəs yaranır. Doğuşu
yaxınlaşan keçilər doğum şöbəsinə
köçürülürlər. Doğum
şöbəsində küləşdən qalın
döşənək vardır. Şöbənin
havası quru olmaqla nəmliyə və rütubətə yol
verilmir. Pəyədə peyinin
toplanması nəticəsində rütubətin əmələ
gəlməsi doğuşa hazırlaşan keçilərə
mənfi təsir göstərir.
Keçilər çox vaxt çətin doğurlar. Ona görə
də dar və ya çanağı pis inkişaf edən
keçilər çıxdaş edilməlidir.
Kompleksdə hər 3 keçidən biri ekiz doğur. Bu il 881
baş keçi ekiz bala verib. Çəpiş tək halda
doğulanda çəkisi 1-1,2 kq olur. Ekiz doğulan çəpişlərin çəkisi
isə 750-800 qram olur.
Keçilər 5 aydan bir bala verirlər. Kompleksdə
çəpişlərə xüsusi xidmət göstərilir.
Əgər analar öz balalarını
yalamırlarsa, çəpişlər doğulan kimi quru
küləşlə və ya əski ilə silinib qurudulur.
Onun üstünə az duz və kəpək
səpilir. Bundan sonra analar öz çəpişlərini
yalayır və onları qəbul edirlər. Çəpişlər tezliklə ayağa durub,
analarının məmələrini axtarır və əmirlər.
Kompleksdə təbii cütləşmədən istifadə
olunur. Süni mayalama tətbiq edilmir. Lakin
qabaqcıl ölkələrin təcrübələrindən
istifadə edərək burada süni mayalanmanın tətbiqi
vacibdir.
Yaxın gələcəkdə burada keçilərin
sayı 6000 başa çatdırılacaqdır. Keçilər
dözümlü və möhkəm heyvan olduqları
üçün ölüm halları təsadüfdən-təsadüfə
baş verir.
Azərbaycanda indinin özündə də keçi
lazımsız heyvan sayılır. Bu onunla əlaqədar idi ki, yerli
keçilər çox az süd verirlər.
Həm də artıq belə bir fikir
formalaşmışdır ki, yay aylarında onun ətindən
spesifik qoxu gəldiyi üçün yeməyə yararlı
deyil, ondan yalnız qış aylarında istifadə etmək
olar.
Düzdür,
natəmiz saxlanılan keçilərin südünün
dadı çox da xoşagəlməyən ola
bilər. Yaxşı havalandırılmayan yerlərdə,
çirkli döşənək olduqda, ağacların
yarpaqları, çuğundur yarpağı və ya iynəyarpaqlı
ağacların və kolların tumurcuqları ilə yemləndikdə
keçilərin ət və südündən xoşagəlməyən
iy və dad hiss olunur.
Keçi
ətindən spesifik qoxunun və iyinin gəlməməsi
üçün keçiçilik kompleksində
aşağıdakı tədbirlər həyata keçirilir:
- keçilər ən azı 5-6 metr
hündürlüyündə, yaxşı havalanan pəyələrdə
bəslənilir;
- hər pəyədə 500-600-dən çox
keçi saxlanılmır;
- keçilər seyrək formada
saxlandığından sərbəst gəzə bilirlər;
- keçilərin altına küləşdən
və taxta kəpəyindən ibarət qalın döşənək
səpilir. Belə döşənək rütubəti
özünə yaxşı çəkə bilir;
- döşənək hər 10 gündən bir
dəyişdirilir;
- keçilər və çəpişlər
qaşovla təmizlənir;
- sərin havalarda keçilər pəyələrin
qarşısındakı 4 tərəfi açıq talvarlara
çıxarılır.
Yaxşı yemləmə və qulluqdan əlavə
keçinin süd məhsuldarlığına hava şəraiti
də təsir göstərir. Keçilər quru və
isti havanı xoşlayır, rütübətli və soyuq
havaya çətin dözürlər. Tutqun
hava gözlənildikdə keçilərin iştahları
azalır. İsveçrədə belə bir məsəl
var: keçi pis yeyirsə, görünür sabah
havalar pis olacaqdır.
Kompleksdə döşənəyin qalın olmasına
ciddi diqqət yetirilir. Əks halda keçi yem axurunda olan keyfiyyətli
otu ayaqları ilə çəkib yerə tökür və
qiymətli yemdən döşənək kimi istifadə edir.
Keçilər adətən quru torpaq üstdə
yatmağı sevir və ayaqları ilə döşənəyi
dağıdırlar. Ağac kəpəyindən olan
döşənək çox qiymətlidir, rütubəti
özünə çəkir və eyni zamanda qiymətli peyin
alınır. Yayda döşənək
kimi qumdan istifadə olunması tövsiyə olunur. Ayda 2 dəfə pəyə diqqətlə təmizlənilir.
Düzgün yemləmə və lazım olan xidmətləri
həyata keçirdikdə keçilər təsadüfi
hallarda xəstələnirlər. Digər ev
heyvanları ilə müqayisədə keçilərin az xəstələnməsinə
baxmayaraq, onlar çətin müalicə olunurlar. Keçilərin xəstəlikləri vaxtında
aşkar edilməli və müalicəyə tezliklə
başlanılmalıdır.
Yaşlı və çox süd verən keçilərdə
sümüklərin yumşalması (osteomalyasiya) tez-tez
baş verir. Belə olan hallarda keçilər zəif yeriyir,
yerindən qalxa bilmir, arıqlayır və s. Bu xəstəlik
zamanı fiziki təsir olmadan xüsusilə qabırğalar və
taz sümüyü sınır. Belə xəstəlikdə
keçilərə kalsiumla zəngin olan dənli
paxlalılar, vələmir, yonca otu, jımıx, noxud və
paxlalıların küləşi yedizdirilməli, yem
payına sümük unu, tabaşır əlavə
olunmalıdır.
Xəstəliklərin müalicəsi
başı-başına buraxıldıqda və ya
uzandıqda, arıqlamağa imkan verilmədən keçilər
kəsilib, ətindən istifadə olunmalıdır.
Keçilər vərəm xəstəliyinə
tutulmurlar.
İnəklərin isə 14,6 faizi bu xəstəliyə
düçar olur. Ona görə də
keçi südünü qaynatmadan içmək olar.
Son aylarda respublikanın regionlarında keçiyə
münasibət dəyişmişdir. "BMS-Aqro" MMC tərəfindən
respublikaya keçi gətirildikdən sonra yüzlərlə
sahibkar, fərdi, ailə-kəndli və ev
təsərrüfatlarının başçıları
keçi almaq istədiklərini bildirirlər.
Bu istək təsadüfi yaranmamışdır. Yuxarıda qeyd olunduğu kimi, inək almaq, onun yemini tapmaq, inək südünü satmaq hər ailə üçün elə də asan iş deyildir. Xüsusilə aztəminatlı ailələr üçün keçi saxlamaq çox sərfəlidir. Çünki keçilər xəstəliyə az tutulur, yemə az tələbkardır, xüsusilə qayğı və xidmətə ehtiyac duymur.
Yeri gəlmişkən qeyd olunmalıdır ki, keçilər xüsusilə bruselyoz xəstəliyinə çox həssasdır. Fransada keçiləri bruselyozun "anası" adlandırırlar. Odur ki, keçilərdən vaxtaşırı qan alıb bruselyoza qarşı yoxlanması, təsərrüfatda sağlamlaşdırma tədbirlərinin aparılması bu xəstəliyin kökünü kəsə bilər.
İndi kənd və qəsəbələrdə ən hörmətli və əziz qonaqlara çəpiş kəsilər. Keçi ətinə tələbat xeyli artmışdır.
Hazırda "BMS-Aqro" MMC-də keçi südündən hazırlanan motal pendirinə bazarlarda növbə yaranır, belə pendir və süd almaq istəyənlərin sayı get-gedə çoxalır.
Azərbaycanın yerli keçiləri az məhsuldar olmaqla, diri çəkiləri 30-35 kq-dan artıq olmur. Süd məhsuldarlığı çox aşağıdır, ildə 100-150 kq süd verirlər.
Zaanen və alp keçilərindən istifadə etməklə yerli keçilərdə damazlıq seleksiya işləri aparıb, onların cins tərkibini yaxşılaşdırmaq olar. "BMS-Aqro" MMC-nin keçiçilik təsərrüfatı bu sahədə baza müəssisəsi ola bilər.
Ən yaxşı damazlıq analar ekiz doğulan dişi çəpişlərdən alınır. Lakin 2-dən çox alınan balalardan yetişdirilən keçiləri damazlıq kimi istifadə etmək tövsiyə olunmur. Çünki onların çox kiçik balaları olur və böyüyəndə də keçilər cinsin standartlarına cavab vermirlər. Gələn ildən başlayaraq keçilərin 8-10 aylıqda 32 kq-a çatdırıldıqdan və mayalandıqdan sonra damazlıq heyvan kimi ailə-kəndli, ev və fərdi təsərrüfatlara satılması planlaşdırılır.
Kompleksdə damazlıq keçiçiliyin daha da inkişaf etdirilməsi üçün aşağıdakı tədbirlər həyata keçirilməlidir.
Keçiçilik kompleksinin bir hektar da olsun
torpağı yoxdur. Bütün yemlər çox baha qiymətə
satın alınır. Ağcabədinin
qış otlaqlarından kompleksə 400 hektar torpaq sahəsinin
ayrılması imkanlarına baxılmalıdır. Bu
torpaqlarda silosluq qarğıdalı, dənlik arpa, yonca və
raps əkilməlidir. Hər keçiyə 3,2
sentner yem vahidi istehsal olunmalıdır. Hər ana keçiyə
500 kq hesabı ilə silos basdırılması təklif
olunur.
Respublikada keçiçiliyin daha da inkişaf etdirilməsi
geniş təbliğ olunmalıdır. Kompleksdə
satılan keçilərin bir başının qiyməti 400
manatdan artıq olmamalıdır. Elə
şərait yaratmaq lazımdır ki, hər bir aztəminatlı
ailə keçi almaq imkanına malik olsun. Lakin indi təklif olunan 800 manata bir baş inək
almaq mümkündür.
Bakı
Şəhər İcra Hakimiyyəti Azərbaycan Respublikası
Prezidentinin 16 yanvar 1994-cü il tarixli fərmanının tələblərinə
uyğun olaraq Bakı şəhərində keçi
südünün, pendirinin və ətinin satılması
üçün "fermer mağazası"nın
yaradılması qayğısına qalmalıdır ki,
adamların bu məhsulları əldə etmək imkanları olsun.
Respublika Səhiyyə Nazirliyi doğum evlərinin tələbatını
öyrənib, körpələr üçün keçi
südü sifariş verməsi məsələsinə
baxmalıdır.
Keçiçilik çox gəlirli təsərrüfat
sahəsidir. Heç şübhə yoxdur ki, bu yeni sahənin
daha da inkişaf etdirilməsi üçün Kənd Təsərrüfatı
Nazirliyi fəaliyyət proqramını həyata keçirəcəkdir.
Azərbaycan
Elmi-Tədqiqat Heyvandarlıq İnstitutu, Elmlər
Akademiyasının Genetik Ehtiyatlar İnstitutu, Azərbaycan
Dövlət Aqrar Universiteti zaanen və alp keçilərindən
istifadə etməklə yeni Azərbaycan keçi cinsinin
yaradılması üzərində geniş işə
başlamalıdırlar.
Çingiz
FƏRƏCOV,
Azərbaycan
Respublikasının Əməkdar kənd təsərrüfatı
işçisi, heyvandarlıq, damazlıq işi, otlaqlar və
yemçilik üzrə ekspert
Azərbaycan. - 2014.- 13 avqust.- S. 5.