Həmişə səninlə
olan bayram
Yaxud "Sevənlər
günü" nə vaxtdır?
Bəzən belə yersiz mübahisənin şahidi
olursan. Biri sevgidən danışır, digəri söyləyir
ki, sevgi deyilən şey yoxdur.
Necə yəni yoxdur? Əksinə, sevgisiz həyatın
özü yox olar! Vətən, Ana, Torpaq sevgisi
andımız-amalımızdır. Gülə-çiçəyə,
günəşə-aya, açılan sabahlara sevgi,
yaşayıb-yaratmaq, tikib-qurmaq eşqi... Bunlarsız
yaşamaq mümkündürmü? Qaldı ki qadınla
kişinin bir-birinə sevgisinə, bunsuz həyatın mənası,
davamı olmaz axı! Onların sevgisi iki səsdən
yaranmış bir akkorddur ki, bunsuz bütün dünya
ölü sükuta qərq olardı.
Dünyanın
bir çox yerlərində sevənlər, əsasən, gənc
oğlan və qızlar hər il
fevralın 14-də Müqəddəs Valentinin adı ilə
bağlı Segililər gününü qeyd edirlər. Hərçənd
sevgi elə qiymətli hiss-duyğudur ki, təkcə bir
gün deyil, böyük yazıçı Ernest Heminqueyin ifadəsi
ilə desək, "həmişə səninlə olan
bayram"dır...
Müqəddəs
Valentin gününü Azərbaycanda da qeyd edənlər var.
Beş-on il bundan əvvəl bir sıra gənclər
bu günü daha canfəşanlıqla keçirirdilər. Sonralar həmin tarixin Azərbaycana heç bir dəxli
olmadığını anladıqlarındanmı, yoxsa bunun
milli qürura toxunduğundanmı ondan imtina etmək qərarına
gəldilər.
Cəmiyyət
arasında belə yekdil fikrə dəstək verildi və qərara
alındı ki, Sevgililər günü hər il
iyunun 30-da qeyd olunsun. 30 iyun 1989-cu il zəmanəmizin
bənzərsiz məhəbbət əfsanəsinin qəhrəmanları
- 1990-cı ilin 20 Yanvar faciəsində düşmən
qarşısına əliyalın çıxıb şəhidlik
zirvəsinə yüksələn İlham Allahverdiyevin və
özünü sevgisinə qurban verən Fərizənin toyunun
çalındığı tarixdir.
Bununla belə,
Azərbaycanda, əsasən də Bakıda hər il
fevralın 14-də Valentini yada salaraq
öz sevgilərini, bir-birini sevdiyini nümayiş etdirən
cavanlar yenə var. Əslində, onların arasında
çox az gənc tapılar ki, Valentinin kim olduğunu, onunla
bağlı bayramın necə
yarandığını bilsin.
Mənbələrin
birində deyilir ki, Roma papası məhəbbət yolunda
canını qurban vermiş Valentini hələ 496-cı ildə
müqəddəslər sırasına daxil etmiş və hər
il fevralın 14-də Sevgililər
gününün keçirilməsi barədə sərəncam
vermişdir.
Valentinlə bağlı rəvayətlər qədimdən
mövcuddur. Xüsusilə orta əsrlərdə Fransada və
İngiltərədə onun haqqında çoxlu rəvayət
yayılmışdı. Onların birində, məsələn,
"Qızıl əfsanə"də deyilir ki, qədim
dövrlərdə qəddar və zəhmli Roma imperatoru II
Klavdiy subay, ailə qayğısından azad, tənha kişilərin
döyüş meydanında hökmdar uğrunda daha cəsarətlə
vuruşacağını fikirləşib. Ona
görə də kişilərə evlənməyi,
qızlara və qadınlara isə sevdikləri insana ərə
getməyi qadağan edib. Bu dövrdə
yaşayan Valentin adi bir səhra həkimi və keşiş
olub. O, bir-birini sevən qızların və
oğlanların halına acıyaraq hamıdan xəlvət
gecələr onlara kəbin kəsib. Lakin
Valentinin fəaliyyəti tezliklə hakimiyyətə məlum
olub və ona ölüm hökmü oxunub. Hələ həbsxanada
yatdığı zaman Valentin nəzarətçinin gözəl
qızı Yuliya ilə tanış olub. Sevgi əzablarına mübtəla olmuş
keşiş ölümündən əvvəl həmin
qıza məktub yazaraq öz məhəbbətini etiraf edib və
sonda "sənin Valentinin" imzasını qoyub.
Valentinin
ölüm hökmü 269-cu il fevralın
14-də yerinə yetirilib. Odur ki, məktubu tapılıb
oxunanda o, artıq həyatda yox idi...
Belə rəvayətlər çoxdur və onların
heç biri öz tarixi təsdiqini tapmayıb.
İlham-Fərizə sevgisi isə həqiqətdir. Tariximizin
çox faciəli bir günündə özünü bəyan
etmiş canlı bir hadisədir. Bu acı
olay yalnız Azərbaycan oğluna və qızına məxsus
zəngin mənəviyyatdan doğan pak duyğulardan, incə
hisslərdən yoğrulmuş bir məhəbbətin təsdiqidir.
Onların hissləri hər cür səs-küydən,
özünü nümayiş etdirmək istəyindən uzaq
bir sevgi idi. Fərizə İlhamın bacılarının rəfiqəsi
olmuşdu. Rəfiqələr bir-birinin
evinə gedib-gəlmişdilər. İlham
qızların bu dostluğuna kölgə salmamaq
üçün qəlbində baş qaldıran hissləri
gizlincə saxlamışdı. Yalnız evlənmək
məqamı çatanda onun üçün qohum-qonşuda
qız gözaltılamağa çalışan
ana-bacısının narahatlığına son qoymuş və
özünün çoxdankı istəyini də ikicə kəlmə
ilə dilə gətirmişdi: "Qız elə evin
içindədir, siz də onu kənarda
axtarırsınız".
İlhamın elçilərinə son cavabı vermək
üçün Fərizənin valideynləri qızın
fikrini soruşmuşdular. Başını
aşağı salıb dinməmişdi. Deməli, o da
el adəti ilə, qanun-qayda ilə ailə qurmaq məsələsi
ortaya atılana qədər hisslərini qəlbindəcə bəsləmişdi...
Bu abır-həya, bu ismət nənə-babalarımızdan
yadigardır.
Nə xoş ki, bu əvəzsiz ərməğan
nəsildən-nəslə ötürülərək
yaşayır.
Deyilən
fikirlərə söykək olan bir neçə digər olay:
Şamaxının istirahət mərkəzlərinin birində
dincələn ahıl cütlük qollu-budaqlı bir
ağacın altında dayanıb mehriban-mehriban söhbət
edirdi. Birdən qoca əyilib otların arasından boy
qaldıran çobanyastığı gülünü
üzüb ağ saçlı
xanımına bağışladı. O isə gülümsəyərək
gülü qoxlayıb örpəyinin altında gizlətdi.
Qəflətən onları bir dəstə uşaq,
yeniyetmə dövrəyə aldı. Demə, böyük
ailənin üzvləri burada birlikdə istirahət
edirmişlər. İndi nəvələr
nənə ilə babanın birgə şəklini çəkmək
istəyirdilər. Əlində fotoaparat
olan oğlan - nəvələrin ən böyüyü nənəyə
tapşırdı ki, babanın qolundan tutsun. Qocaların ikisinin də üzünə
qızartı çökdü. Oğul-uşaq
yanında abır-həya gözləyib sadəcə
yanaşı dayandılar. Amma nənənin əlindəki
çobanyastığı şəklə
düşmüşdü...
İlhamın comərdliyi də, Fərizənin vəfası
da, onların bir-birinə olan bağlılığı,
sevgisi də Azərbaycan xalqının milli-mənəvi dəyərlərindən,
zəngin daxili dünyasından, adət-ənənəsindən,
mentalitetindən qaynaqlanırdı. Fərizə bu sevgiyə öz həyatını
qurban verdi və bu, təkcə onun
özünün məhəbbətinin ifadəsi deyildi. Həm də onu sevənin böyük sevgisinə
cavab idi.
Doğrudur, dinimizə görə, intihar etmək
bağışlanmaz günahdır. Amma biz Fərizənin
ölümünə başqa rakursdan yanaşırıq və
yanaşmalıyıq. Fərizənin intiharı ilk
növbədə torpağımıza bəd niyyətlə qədəm
basan, əliyalın əhalinin üstünə zəhmli,
ölüm saçan silahla yeriyən, xalqımızın
azadlıq arzulu oğullarını, günahsız körpə
və qocalarını qanına qəltan edən, o cümlədən
onun da sevimli yarını əlindən alan
qüvvələrə qarşı bir üsyan və etiraz
idi. Bir də bu, Azərbaycan qadınının
əhd-peymana sədaqəti idi (sevdiyinə "Ölsəm
torpağınam, qalsam səninəm" deyən Azərbaycan
qadınının).
Keçmiş
iş yoldaşımız, mərhum şair Eldar Nəsib
sağlığında bu qeydlərin müəllifinin
qadın əməyi, qadınların məşğulluq
problemi haqqında yazısını qəzet səhifəsində
oxuduqdan sonra fikirlərini söylədi. Söhbətin
mövzusunun çevrəsi bir qədər də genişlənərək
təkcə qadın əməyinə deyil, ümumiyyətlə,
Azərbaycan qızlarının saflığına, vəfasına,
geniş qəlbinə, bir sözlə, yüksək mənəviyyatına
aid oldu. Onda Eldar şair Hüseyn Arifin rus
şairi Konstantin Simonovun məşhur "Gözlə məni"
şeirinin tərcüməsi ətrafında gedən
müzakirə və mübahisələr zamanı söylədiyi
fikri xatırladı. Hüseyn müəllim
o vaxt deyib ki, mən (yəni Azərbaycan kişisi - F.S.)
Azərbaycan qadınına "gözlə məni"
deyə bilmərəm. Əgər sevirsə,
özü mütləq gözləyəcək. Bu halda ona "gözlə məni" demək
artıq sözdür".
Bəli, Azərbaycan qadını ilə sədaqət,
vəfa barədə danışmırlar. Onun öz əhd-peymanına
sədaqəti bir aksiomdur. "Mənə
sədaqətli ol" demək onu təhqir etməkdir.
Azərbaycan oğlunun da sevgiyə baxışı fərqlidir. O, sevdiyi xanımın
üzündə, bir bayatıda deyildiyi kimi, hətta yad bir
baxışın olmasını belə qəbul etmir:
Əzizim, baxtı yarım,
Baxtımın taxtı yarım,
Üzündə göz izi var,
Sənə kim
baxdı, yarım?
Azərbaycan oğlu üçün sevdiyi qadın təkcə
sevgili deyil, eyni zamanda onun dostu, həmdəmi, evinin,
ömrünün yaraşığı, namus-qeyrətinin
tacidarıdır.
Bu yerdə sözləri əsgərliyə gedən
cavan oğlanın dilindən deyilən, vaxtilə çox
populyar olan, indi də hərdən Moskva efirlərində səslənən
bir rus mahnısını xatırlayıram. Oğlan ordu
sıralarına yola düşərkən sevdiyi qıza
"iki qış və iki bahar sən başqa oğlanlarla
kinoya getmə" deyə tapşırır, bəlkə də
xahiş edir.
Gülməlidir, amma əlbəttə ki, bizim mənəviyyatımız, bizim nöqteyi-nəzərimizdən baxıb düşünəndə. Biz heç bir xalqın oğlunun, qızının sevgisinə, sədaqətinə kölgə salmaq fikrində deyilik. Amma sadəcə demək istəyirik ki, bizdə sevgiyə, məhəbbətə baxış fərqlidir. O, çox qiymətli bir duyğu kimi ürəkdə bəslənir, insanı yaşadır, ucaldır. Nəbi Xəzri demişkən:
Bizdədir dünyanın sevinci, qəmi,
Bəs niyə
susuruq görüşəndə biz?
Böyük məhəbbət
də böyük çay kimi
Axar ürəklərdən
səssiz-səmirsiz.
Bir sevgi iki nəfər üçündür, başqalarına nümayiş etdirilmək üçün yox! Bu duyğularla yaşadığın hər an, hər gün bayramdır, təkcə Sevgililər günü yox. Sevənlər bir-birinə öz məhəbbət və istəklərini hər gün əməlləri, diqqət və qayğıları ilə haysız-küysüz, sakitcə sübut etməlidirlər.
Ayrıca Sevgililər gününün olmasına gəldikdə isə, biz onu niyə Valentinin adı ilə rəsmiləşdirməliyik? Özümüzün Leylimizə və Məcnunumuza, Fərhadımıza və Şirinimizə nə gəlib?! Qəribin Sənəmini, Koroğlunun Nigarını, Nəbinin Həcərini niyə unuduruq? Nəhayət, İlham-Fərizə sevgisi Sevgililər gününün (bəlkə onu elə Sevənlər günü adlandıraq?!) loqosu olmaq üçün alternativsiz variantdır.
Yeri gəlmişkən xatırladaq ki, Roma Katolik Kilsəsi hələ 1969-cu ildə Valentinin adını müqəddəslər sırasından silmiş və onun haqqında heç bir dəqiq tarixi məlumat olmadığı üçün xatirəsinə həsr edilən bayramı da ləğv etmişdir. Sevgililər bayramı üçün başqa gün seçilmişdir.
2008-ci ildə isə Rusiya Federasiyası Şurası hər il iyulun 8-də məhəbbət və ailə səadəti günü keçirilməsi barədə təşəbbüsü bəyənmişdir. Çünki bu tarix qədim zamanlardan həmin ölkədə ər-arvad münasibətlərinin, ailə xoşbəxtliyinin himayədarları sayılan Pyotr və Fevroniyanın xatirə günüdür. Deməli, Valentini heç Rusiyada da anmırlar.
Beləliklə, Azərbaycanda "Sevənlər günü" iyunun 30-dadır. Bu, rəsmi bayram deyilsə də, hər bir azərbaycanlı üçün əzizdir və təbii ki, belə olmalıdır.
Qoy bu bayram Müqəddəs Valentin gününə bənzəməsin. Yəni təkcə Bakının küçələrində əllərində bir, üç, beş qızılgül, gülə-gülə, zarafatlaşa-zarafatlaşa gedən sevənlərin bayramı olmasın. Qoy bu, bütün sevənlərin - məhəbbətini illərin çətin sınaqlarından keçirə bilmiş nənələrin və babaların, əl-ələ verib birgə həyat quran, sevgilərini üst-üstə toplayaraq körpə balalarına bəxş edən gənc ata-anaların, nişanlanıb toyuna hazırlaşan ağıllı-kamallı oğlanların və qızların hamısının bayramı olsun.
Həmin gün sevgilərin ən böyüyünün - Vətən sevgisinin zirvəsinə yüksələn İlhamı, bu dünyada yarımçıq arzularla yaşamaqdansa, o dünyada öz yarı(sı) ilə birgə olmağı üstün tutan Fərizəni xatırlayaq, ehtiramla yad edək!
Bir də bizim Fərizə timsallı qızlarımız, gəlinlərimiz çoxdur axı! Bu, həmin gəlinlərdir ki, cavanlıqlarını qurban verib Azərbaycanın müstəqilliyi, ərazi bütövlüyü uğrunda şəhid olan oğulların körpə balalarını ərsəyə gətirdilər, indi də öz məhəbbətlərinin təzə pöhrələrini - nəvələrini böyüdürlər. Qoy bu gün onların da fədakar sevgisinin təntənəsi olsun!
Flora SADIQLI
Azərbaycan. - 2014.- 10 avqust.- S. 6.