Vətən, sən nə gözəlsən!

Aralarında indiyədək Qobustandan çıxan da vardı, çıxmayan da. Bakıdan ölkənin qərb sərhədlərinə qədər uzanan avtomobil magistralı Qobustan ərazisindən keçdiyinə görə ötüb gedən maşın karvanlarına min bir arzu ilə baxanları da çox olub. Bəziləri də axşam qaranlığı düşəndən sonra uzaqdan bu maşınların işıqlı düzülüşünü sərnişin qatarlarının vaqonlarına oxşadırdı. Əmin idilər ki, günlərin bir günü bu "vaqonlar"la arzularına qovuşacaqları ünvana doğru üz tutacaqlar. Bundan ötrü, şübhəsiz, orta məktəbi bitirib ya ali təhsil almaq, ya da hansısa bir iş dalınca getmək üçün Qobustandan çıxmalı idilər.

Ancaq heç orta məktəbi bitirməmiş uşaqların arzusu qəfildən çin oldu. Ölkə Prezidenti İlham Əliyevin tapşırığına əsasən, təşkil edilmiş "Azərbaycanı tanıyaq" maarifləndirici tur-aksiyasında iştirak etmək Qobustan məktəblilərinə də qismət oldu. 40 nəfərlik qrupa rayonun ən nümunəvi məktəbliləri cəlb edildi. Şagirdlərdən əlavə iki müəllim və bir həkim də qrupa daxil edildi. Qrup rəhbəri, Qobustan Təhsil Şöbəsinin metodisti Mahir Soltanovun şagirdlərə səfərqabağı qısa tövsiyəsindən sonra avtobus yola düzəldi. Marşrut İsmayıllı-Qəbələ-Şəki idi.

Yolboyu mənzərələr bir-birini əvəz etdikcə tur-aksiya iştirakçıları ətrafa daha heyranlıqla baxırdılar. Əlbəttə, Qobustanın havası nə qədər gözəl olsa da, yaşıllıq sarıdan elə qonşu Şamaxıdan da çox geri qalır. Uzaqdan görünən dağlar da yamyaşıl görünür. Enişli-yoxuşlu Muğanlı-İsmayıllı yolu isə əsrarəngiz gözəlliyi ilə gəncləri lap valeh etdi. Əzəmətli dağlar, sıldırım qayalar, dibigörünməz dərələr, qıvrıla-qıvrıla axıb gedən dağ çayları hər kəsin qəlbində unudulmaz xatirəyə dönürdü. İştirakçılar təəssüratlarını bir-biri ilə bölüşür, elə avtobusun pəncərəsindəncə "tanrı gözəllikləri"ni fotoaparatın yaddaşına köçürməyə çalışırdılar. Azərbaycan öz bənzərsiz gözəllikləri ilə kənd-kənd, rayon-rayon göz önünə çıxırdı. Yolboyu təbii gözəlliklərdən, möhtəşəm təbiət lövhələrindən əlavə, həyata keçirilən tikinti-quruculuq, abadlıq işləri də diqqətdən yayınmır, hətta Qobustanda rastlaşdıqları yenidənqurma işlərini müqayisə də edirdilər. Bəli, bütün bölgələrimiz tikilir-qurulur, abadlaşır, müasirləşir.

İsmayıllının Lahıc qəsəbəsi Qobustan məktəblilərini, sözün həqiqi mənasında, heyran etdi. Qədim tikililər, enişli-yoxuşlu daş küçələr, sənətkarlıq nümunələri, mehriban qəsəbə sakinləri elə ilk andaca ürəklərdə xoş duyğular oyadırdı.- "Vətənimizin necə gözəl yerləri var imiş, gərək buraları çoxdan tanıyaydıq..."

Aksiya iştirakçılarının gördükləri ilə müəllimlərin verdikləri məlumatlar təəssüratın daha dolğun və əhatəli formalaşmasına təsir edirdi.

Nəhayət, bu da son dövrlər sorağı ölkə hüdudlarını da aşan qədim və müasir Qəbələ! Gecəni "Yeddi gözəl" hotelində qaldılar. Gün ərzində Tarix-Diyarşünaslıq Muzeyində, Heydər Əliyev Mərkəzində, Çuxur Qəbələdə, Nic qəsəbəsində, Alban kilsəsində, "Tufandağ" qış-yay turizm mərkəzində, Qəbələ piano fabrikində və digər yerlərdə oldular.

Ulu öndər Heydər Əliyevin anadan olmasının 91-ci ildönümü ilə əlaqədar keçirilmiş respublika inşa müsabiqəsində III yeri tutmuş Gülər Cavadovanın dediklərindən: - Möhtərəm Prezidentə dərin minnətdarlığımızı bildiririk ki, bizə ölkəmizi daha yaxından tanımaq, görmək üçün belə şərait yaradılıb. Qəbələni ancaq mavi ekranda görmüşdük. Böyük tədbirlərin, beynəlxalq musiqi festivallarının keçirildiyi bir şəhərdə olmaq çox qürurvericidir. Hara gedirik, hər yerdə abadlıq, quruculuq, müasirlik görürük. Doğulduğum Qobustan rayonu kiçik olsa da, çox işlər görülüb. Ancaq Qəbələ, mənə elə gəlir ki, heç yerlə müqayisə oluna bilməz. Təəssüf ki, bu vaxta qədər buranı görməmişdik.

Tur-aksiya iştirakçıları Şəkidə "Olimp" hotelində axşamladılar. Qədim Şəki ilə tanışlıq da unudulmaz xatirəyə döndü. Tarixi məkanlar, zəngin mədəniyyət nümunələri, "Yuxarıbaş" Tarix və Memarlıq Qoruğu, Şəki Tarix-Diyarşünaslıq Muzeyi, Yuxarı Karvansaray, Cümə məscidi, qədim yaşayış məskəni Təpəbaşı nekropolu, Kiş kəndindəki Alban məbədi, bir sözlə, üz tutduqları hər yer qobustanlı gənclər üçün çox maraqlı oldu. Özlərini az qala, tarixin qanadlarında hiss edirdilər.

Şəkidə Hacıqabul məktəbliləri ilə intellektual yarış da keçirildi. Suallar əsasən marşruta daxil edilmiş rayonların keçmişi və bu günü ilə bağlı idi. Qaliblər arasında mükafat alanlardan biri də Gülər Cavadova oldu. Beləcə, gündüz gördüklərini, eşitdiklərini axşam "imtahandan" keçirmək gənclər üçün çox maraqlı oldu.

Bu il yüksək balla BDU-nun tarix fakültəsinə qəbul olmuş Şövqi Soltanın ürək sözləri: - Şəki bənzərsiz tarix-mədəniyyət və arxeoloji abidələrlə zəngindir. Azərbaycan milli memarlığının bir çox inciləri də bu şəhərdədir. Dünya ipəkçilik sənətinin başlanğıcı da Şəki ilə bağlıdır. Hələ digər sənətlər... Bu gözəl şəhərdən ayrılmaq çox çətindir. Bizə bu imkanı yaratdığına görə dövlətimizin başçısına təşəkkür edirik.

Digər iştirakçılardan Dilavər Kərimov (bu il İqtisad Universitetinə daxil olub), Şükran Cavadov, Nihal Mirzəliyev, Aytac Şəkərova və Nərgiz Əhlimanova da təəssüratlarını bölüşərək Azərbaycan məktəblilərinə yaradılan bu şəraitə görə minnətdarlıqlarını bildirdilər.

Avtobus axşam gün batandan sonra Qobustana çatdı. Bir-birilə sağollaşıb, dərslər başlayana qədər ayrılsalar da, İsmayıllı, Qəbələ, Şəki xatirələri ilə onlar hər vaxt bir yerdə olacaqlar.

Qrup rəhbəri Mahir Soltanov: - Bu tur-aksiyaların istər maarifçilik, istərsə də vətənpərvərlik baxımından böyük əhəmiyyəti var. Şagirdlərin bilik və bacarıqlarının, vətən və torpaq sevgisinin güclənməsində belə tədbirlər çox faydalıdır. Mən də bir müəllim olaraq belə tur-aksiyaların təşkili üçün göstəriş verdiyinə görə möhtərəm Prezidentə dərin minnətdarlığımı bildirirəm. Əminəm ki, belə aksiyalar tədrisin keyfiyyətinə, şagirdlərin ictimai fəallığına da müsbət təsir edəcək.

Telman NƏZƏRLİ

Azərbaycan. - 2014.- 16 avqust.- S.6.