Kəngərlidə tikilən məktəb binası müasirliyi ilə seçilir

Son illər Kəngərli rayonunda aparılan genişmiqyaslı quruculuq və abadlıq tədbirləri nəticəsində bölgənin siması tanınmaz dərəcədə dəyişib. 11 yaşayış məskənini əhatə edən rayonda genişmiqyaslı sosial infrastruktur layihələri həyata keçirilib, kənd və xidmət mərkəzləri, həkim ambulatoriyaları, məktəb binaları inşa edilib və ya yenidən qurulub, gözəl yollar salınıb.

Rayonun ən böyük kəndi olan Qarabağlarda bu günlərdə yeni məktəb binasının tikintisi aparılır. Naxçıvan Muxtar Respublikası Dövlət Şəhərsalma və Arxitektura Komitəsinin Kəngərli Rayon İdarəsi tərəfindən inşa edilən təhsil müəssisəsində hazırda qızğın iş gedir. Əsaslı yenidənqurma işlərinin həyata keçirildiyi obyekt haqqında məlumat almaq üçün idarə rəisi Vəzir Əliyevlə görüşdük.

Öyrəndik ki, zirzəmi və 3 mərtəbədən ibarət olan binada işlərə mart ayından başlanılıb. İlk olaraq binanın arxasındakı tamamilə yararsız vəziyyətdə olan idman zalı sökülüb, binanın kənar divarları saxlanılmaqla digər arakəsmələr çapılaraq götürülüb.

468 şagird yerlik tam orta məktəb binası kənd əhalisinin, müəllim və şagirdlərin böyük sevincinə səbəb olub. Belə ki, əvvəllər buradakı orta məktəb binası öz istismar müddətini başa vurmuş, məktəbin qızdırılmasında ciddi problemlər meydana gəlmişdi. İndi isə şagirdlər gözəl və səliqəli, müasir avadanlıqlarla təchiz olunmuş yeni təhsil ocağında dərs keçəcək, fərdi qazanxana vasitəsiylə payız-qış mövsümündə soyuqdan əziyyət çəkməyəcəklər.

Məktəbdə hər biri 18 nəfərlik olan 26 sinif, müdir və qəbul otağı, tədris hissə, təsərrüfat müdirləri, psixoloq, təşkilatçı və gənclər təşkilatı sədri üçün kabinet, iki müəllimlər və 2 kompüter otağı, fizika, kimya, biologiya laboratoriyaları, hərbi kabinet, kitabxana, müəllim və şagirdlər üçün ayrılıqda bufetlər, idman zalı, idman müəllimi üçün ayrıca otaq, iki qarderob və iki soyunub-geyinmə otağı var. Ayrıca 4 elektron lövhəli sinif, həmçinin 6 yarımqrup üçün sinif fəaliyyət göstərəcək.

Binada tikinti işləri sürətlə davam edir. Artıq dam örtüyü vurulub, istilik və elektrik xətləri çəkilib, pəncərələr salınıb, qara suvaq üzərində ağlama işləri görülüb. Mərtəbələrdə döşəmə işləri yekunlaşıb, asma tavanlar vurulub. Usta və fəhlələr binanın daxili boyama işlərinə hazırlıq görürlər.

Binanın istilik sistemi ilə təchiz olunması üçün mavi qazdan istifadə edilərək kalorifer sistemi işə salınacaq. Qeyd edək ki, bir vaxtlar xarici ölkələrdən alınıb gətirilən istilik qazanı indi muxtar respublikanın özündə istehsal olunur. Alınması, gətirilməsi böyük məbləğdə pul tutan elektrik qazanı Gəmiqaya MMC-nin Sənaye Kompleksinin məhsuludur.

Ümumiyyətlə, tikinti işlərində yerli materiallardan istifadə olunmasına xüsusi diqqət yetirilir. Belə ki, binanın döşəməsində istifadə edilən daşlar məktəbin bir neçə yüz metrliyində yerləşən Qarabağlar daş ocaqlarından çıxarılan xammaldan alınan travertinlərdir. Həmin daşlardan binanın fasadındakı pəncərə kənarlıqlarında da istifadə edilib. Pəncərə və şüşələr də muxtar respublikanın istehsal müəssisələrindən alınıb.

Məktəb binasının yeni dərs ilinə kimi istifadəyə verilməsi üçün rayon tikinti idarəsinin kollektivi bütün səy və bacarıqlarından istifadə edir.

Məktəbin direktoru, əməkdar müəllim Mənsim Məmmədovla da söhbət etdik. Ötən dərs ilinin yekunları ilə maraqlandıq, yeni və müasir üslublu binanın tikilməsi barədə təəssüratlarını öyrəndik. Direktor bildirdi ki, yeni dərs ilində məktəbdə 252 şagird təhsil alacaq. Ötən dərs ilində isə məktəbi 41 şagird bitirib. Onlardan 31 nəfəri ali məktəblərə sənəd verib və 13 şagird ayrı-ayrı universitetlərin tələbəsi adını qazanıb. Məzunlardan 3 nəfəri Heydər Əliyev adına Hərbi Liseyə qəbul olunub.

Dərs ilinin yekunlarına əsasən, məktəbin yetirməsi Xanım Mehdiyeva qızıl medala layiq görülüb. Ötən dərs ilinin uğurları sırasında məktəbin ədəbiyyat müəllimi Rəsmiyyə Seyidovanın "İlin ən yaxşı müəllimi" müsabiqəsinin qalibi olması, həmçinin fransız dili müəllimi Gültəkin Hüseynovanın Naxçıvan Muxtar Respublikasının "Əməkdar müəllimi" adına layiq görülməsi də var.

Mənsim müəllim dərs ilindən müasir üslublu yeni binada fəaliyyət göstərəcəklərinin sevincini yaşadıqlarını da xüsusi vurğuladı:

- 51 müəllimin çalışdığı məktəbimizin uğurları bundan sonra daha çox olacaq. Uzun illər idi ki, yarı yararsız vəziyyətdə olan məktəb binasında fəalliyyət göstərirdik. Siniflərin qızdırılmasındakı çətinliklər payız-qış mövsümündə tədrisin keyfiyyətinə xeyli təsir edirdi. Amma bundan sonra hər cür şəraitlə təmin olunmuş siniflərdə uşaqlar da, müəllimlər də soyuq dərdi çəkməyəcəklər. Bu da istər-istəməz həm dərslərin keyfiyyətinin artırılmasına səbəb olacaq, həm də şagirdlər dərslərə rahat hazırlaşacaqlar.

Dövlətin bu diqqəti və qayğısı qarşılığında bizim bircə borcumuz var: məsuliyyətlə çalışmaq və ölkəmiz üçün layiqli, savadlı və yüksək mənəviyyatlı gənclər yetişdirmək. Bütün müəllim kollektivimiz adından deyə bilərəm ki, növbəti dərs ilinin yekunlarında məktəbin uğurları daha çox olacaq.

Elxan MƏMMƏDOV

Azərbaycan. - 2014.- 20 avqust.- S. 2.