Yeniliklər göz oxşayır

Şəhərin girəcəyində onlarca hektarı əhatə edən uşaq əyləncə mərkəzinə baxmaq kifayətdir ki, rayonda inkişafın sürəti barədə aydın təsəvvür yaransın. Göz işlədikcə uzanan yaşıllıqlar qoynunda müxtəlif istirahət guşələri, əyləncə yerləri, karusellər, yelləncəklər və s. göz oxşayır. Şəmkirlilər də yeniliyi, müasirliyi çox sevirlər. Özü də milli üslubda təqdim edilən yenilikləri.

İpək yolu boyunca düzülmüş bir-birindən yaraşıqlı Avropa tipli ticarət obyektləri görənləri valeh edir. Yol ötən hər kəs istər-istəməz ayaq saxlayır, dünyanın ən müxtəlif firmalarının brend mallarını təklif edən mağazalara baxır, xoş təəssüratla yolunu davam etdirir. Avropa üslublu, milli ornamentli bu satış mərkəzinin yanında yeni bir şəhər yaranır. Bir tərəfdə şadlıq sarayı, olimpiya idman kompleksi, üzbəüzdə Bayraq meydanı, Heydər Əliyev Muzeyi, "Zəka" İntellekt Mərkəzi. Şəhərə doğru uzanan yol boyu müxtəlif məramlı, müxtəlif görkəmli inzibati binalar yan-yana düzülüb.

Hara baxırsan, Şəmkir ürək açan yeni bir uğurdan xəbər verir. Bu barədə cari ilin altı ayının yekunları müzakirə olunarkən də geniş söhbət açıldı. Rayon icra hakimiyyətinin başçısı Nazim Veysov Nazirlər Kabinetinin iclasında Prezident İlham Əliyevin verdiyi tapşırıqlar və qarşıda duran vəzifələr haqqında ətraflı danışmış, müxtəlif idarə və müəssisə nümayəndələri çıxış etmişdilər. Yekdilliklə qeyd olunmuşdu ki, regionların sosial-iqtisadi inkişafı üzrə II Dövlət Proqramında irəli sürülmüş tapşırıqlara ümumən əməl edilmişdir. Təkcə cari ilin ilk altı ayı ərzində ümumi məhsul buraxılışının həcmi 241 milyon 365 min manat təşkil etmişdir ki, bu da ötən ilin müvafiq dövründəkinə nisbətən xeyli çoxdur. Digər sahələrdə də irəliləyiş göz qabağındadır.

Toplantıda əsas diqqət qarşıda duran vəzifələrin icrasına yönəldildi. Qeyd olundu ki, III Dövlət Proqramında Şəmkir rayonu üzrə 20 mühüm tədbirin icrası nəzərdə tutulmuşdur. Onların bir neçəsinin həyata keçirilməsinə artıq başlanılmışdır. Qərb bölgəsində ən böyük obyektlərdən biri olacaq müasir çörək və nişasta istehsalı müəssisəsinin təməli qoyulmuşdur.

Ölkəmizin ən mühüm layihələrindən biri sayılan Şəmkirçay su anbarının inşası davam etdirilir. Mühüm işlərin bir hissəsi başa çatmış, hazırda nəhəng bəndin tikintisi, Gəncə, Şəmkir və Samux şəhərlərinə su xətlərinin çəkilişi davam edir. Əsas kanallardan əlavə, uzunluğu 800 kilometr olan kəndarası və təsərrüfatlararası kanalların çəkilişinə başlanılmışdır.

Dövlət başçısı İlham Əliyev Nazirlər Kabinetinin 2014-cü ilin birinci yarısının yekunlarına həsr olunmuş iclasda demişdi ki, bu il Şəmkirçay su anbarı istifadəyə veriləcək. Hazırda bu mühüm vəzifənin icrası uğurla davam etdirilir.

İlin arxada qalan ayları ərzində digər sahələrdə də çox mühüm işlər görülüb. Bakı-Qazax avtomobil yolunun Şəmkir rayonunun ərazisindən keçən 42 kilometrlik hissəsi, Şəmkir-Gədəbəy avtomobil magistralı, Kür qəsəbəsi-Qaracəmirli-Təzəkənd avtomobil yolları istifadəyə verilmişdir. Yeni Göyçə, Günəşli, Varlı Həyat, Dağ Cəyir, Yuxarı və Aşağı Çaykənd kəndlərinin əhalisi yolların narahatlığından əziyyət çəkirdi. Bu il iyun ayının 13-də dövlət başçısı 7 yaşayış məntəqəsini birləşdirən Şəmkir-Yeni Göyçə- Dağ-Cəyir avtomobil yolunun inşası üçün 3 milyon manat vəsait ayırıb.

Rayonda sosial problemlərin həllinə də xüsusi diqqət yetirilir. Şəhər üzrə su və kanalizasiyanın çəkilişi sistemli surətdə davam edir. Bəlli olduğu kimi, Nazirlər Kabinetinin yığıncağında Prezident İlham Əliyev ölkədə qazlaşdırma prosesinin bir qədər ləng getdiyini vurğulamışdı. Şəmkir rayonunda bu sahədə işlər ümumən yaxşı gedir. Yalnız üç yaşayış məntəqəsinin - Bayramlı, Muxtariyyət və Qaralar kəndlərinin qazlaşdırılması bir qədər ləngiyir. Bu barədə "Azəriqaz" İstehsalat Birliyi qarşısında məsələ qaldırılmış və yaxın vaxtlarda hər üç kəndin qaz təchizatı başa çatdırılacaqdır.

Şəmkir rayonu həm də qərb bölgəsi üzrə təhsil-maarif sahəsinin mərkəzinə çevrilir. Son on ildə 27 məktəb binası tikilib. 26 bina əsaslı təmir olunub. Nizami Gəncəvi adına orta məktəb üçün 640 yerlik binanın inşasına, habelə Düyərli kənd məktəbinin əsaslı təmirinə hazırlıq görülür. Rayon üçün ən xoş işlərdən biri də budur ki, xəstəxana kompleksinin inşası məsələsi həll olunub. Bu məqsədlə dövlət başçısının sərəncamına uyğun olaraq səfalı guşədə geniş sahə ayrılıb.

Ötən müddət ərzində Bakı Oksford məktəbi üçün yataqxana və uşaq bağçası inşa olunub. Bu genişmiqyaslı təhsil ocağı hamının diqqətini cəlb edir. Şəmkir öz orijinal iş üslubu, şəhərsalma mədəniyyəti ilə müasirliyə doğru inamla irəliləyir. Bütün küçələr başdan-başa yenidən qurulub. Asfalt döşənib, səkilər, su keçidi yerləri düzəldilib, evlərin fasadları, darvaza, qapı və pəncərələri, habelə dam örtükləri milli üslubda təzələnib. Küçələr boyu dibçəklərdə gül-çiçək düzülüb. Demək olar, bütün şəhər üzrə müasir və bənzərsiz işıqlandırma sistemi qurulub. Bağlarda, bağçalarda yaraşıqlı bulaqlar inşa olunub. Bir sözlə, qədim Şəmkir öz sürətli tərəqqisi, bir-birindən maraqlı müasir memarlıq üslubunda ucaldılan tikililəri ilə gələnləri heyrətləndirir. Belə obyektlərdən biri "Zəka" Gənclərin İntellektual İnkişaf və Yaradıcılıq Mərkəzidir. "Zəka" mərkəzində məktəblilər arasında rəsm, əl işləri və heykəltəraşlıq eksponatlarından ibarət sərgilər təşkil edilir, məşhur yazıçı və şairlərin kitablarının təqdimatları, intellektual oyunlar və digər tədbirlər keçirilir. Mərkəzdə kompüter, şahmat, rəsm və təsviri incəsənət, dekorativ tətbiqi sənət, ingilis, alman, rus dilləri üzrə kurslar fəaliyyət göstərir.

Şəmkir respublika tədbirlərinə önəm verir. Hər həftənin bazar günləri "Zəka" mərkəzində ölkə üzrə ali məktəb tələbələrinin iştirakı ilə "Parlaq zəka" intellektual oyunları keçirilir və həmin oyunlar "AzTV1" televiziya kanalında nümayiş etdirilir.

Axşamüstü Yasamal dağından Şəmkirə baxanda qarşında əsrarəngiz mənzərə açılır. Şəhərin əlvan işıqları sayrışır. Bu yerlərin gündüzü də gözəldir, gecəsi də. Ruhumu oxşayan qənirsiz gözəlliklərdən böyük zövq alırsan. Qürur hissi keçirirsən, şəhərinin, ölkənin uğurlarına sevinirsən.

Əhməd İSAYEV

Azərbaycan. - 2014.- 21 avqust.- S.4.