BTC-nin 11 səhmdarından biri – «KonokoFillips»

"KonokoFillips" Azərbaycana bir sıra digər xarici şirkətlərdən gec gəlib. O, Bakı-Tbilisi-Ceyhan layihəsinə 2002-ci ilin oktyabr ayında qoşulub. Həmin vaxt BTC Ko. şirkətindən 2,5 faiz iştirak payı əldə edib.

Bu gün "KonokoFillips" Azərbaycanın neft sektorunda yaxşı tanınan səhmdarlardan biridir. O, Azərbaycandan başqa daha onlarca ölkədə çalışır. Vətəni Amerika Birləşmiş Ştatlarıdır. Mənzil qərargahı Texas ştatının Hyüston şəhərində yerləşir.

"KonokoFillips" beynəlxalq çoxsahəli enerji şirkətidir. Səhmlərinin ümumi qiymətinə, aşkar edilmiş neft və qaz ehtiyatlarına, karbohidrogen hasilatının həcminə görə ABŞ-da aparıcı yerlərdən birini tutur. Ölkədə eləcə də ən iri neft emalı müəssisələrindən sayılır. "KonokoFillips" həmçinin dünyada ən iri qeyri-dövlət şirkətləri və emal müəssisələri sırasında dayanır.

Şirkət karbohidrogenlərin kəşfiyyatı və hasilatı, həmçinin emalı, marketinqi, təchizatı və nəqli ilə məşğul olur. Bundan əlavə, cari və gələcək inkişaf üçün imkanları təmin edən, texnoloji həll yolları, maye qazın istehsalı, elektroenergetika və ən son texnologiyalar kimi bir sıra yeni layihələrə sərmayə qoyuluşu ilə məşğuldur.

Bu gün Heydər Əliyev adına Bakı-Tbilisi-Ceyhan əsas ixrac neft kəmərinin uğurla fəaliyyət göstərməsində "KonokoFillips"in də layiqli payı var.

Xatırladaq ki, 1768 kilometr uzunluğa malik BTC boru kəməri 2006-cı ilin ortalarında istismara verilib. Layihənin əməliyyatçısı BP şirkətinin məlumatına görə, həmin vaxtdan etibarən BTC vasitəsilə nəql edilmiş ümumilikdə təxminən 2 milyard barel (263 milyon ton ) xam neft Ceyhanda 2 580 tankerə yüklənib və dünya bazarlarına göndərilib.

"KonokoFillips" layihədəki digər tərəfdaşlarla birlikdə kəmərboyu ərazilərdə həyata keçirilən "Davamlı inkişaf təşəbbüsləri" adlı sosial proqramlarda da fəal iştirak edir.

Azərbaycan. - 2014.- 27 avqust.- S.5.