Azərbaycan ilə İran arasında fövqəladə hallar sahəsində

əməkdaşlığın inkişafına dair müzakirələr aparılıb

Dekabrın 2-də Azərbaycanın fövqəladə hallar naziri Kəmaləddin Heydərov Bakıda keçirilən “BakuTel-2014” XX Azərbaycan Beynəlxalq telekommunikasiya və informasiya texnologiyaları sərgi və konfransında iştirak etmək üçün ölkəmizdə səfərdə olan İran İslam Respublikasının rabitə və informasiya texnologiyaları naziri Mahmud Vaezinin başçılıq etdiyi nümayəndə heyəti ilə görüşüb.

Fövqəladə Hallar Nazirliyinin mətbuat xidmətindən AzərTAc-a bildiriblər ki, qonaqları salamlayan nazir Kəmaləddin Heydərov ölkəmizdə fövqəladə halların qarşısının alınması və nəticələrinin aradan qaldırılması istiqamətində görülən işlər, bu sahədə İranın müvafiq qurumları ilə əməkdaşlığın perspektivlərindən danışıb. Nazir vurğulayıb ki, Azərbaycan Prezidenti İlham Əliyevin və İran Prezidenti Həsən Ruhaninin qarşılıqlı səfərləri və imzalanan sənədlər ikitərəfli əlaqələrin möhkəmlənməsində yeni mərhələnin əsasını qoyub.

Mahmud Vaezi səmimi görüşə görə təşəkkürünü bildirib, iki ölkənin müvafiq qurumları arasında qarşılıqlı faydalı əməkdaşlığın inkişaf etdirilməsinin əhəmiyyətini vurğulayıb.

Görüşdə qarşılıqlı maraq doğuran digər məsələlər ətrafında fikir mübadiləsi aparılıb.

Azərbaycan.-2014.- 3 dekabr.- S.6.