İranın İslam Mədəniyyəti və Əlaqələri Təşkilatının

sədri Mədəniyyət və Turizm Nazirliyində olub

İran İslam Respublikasının İslam Mədəniyyəti və Əlaqələri Təşkilatının sədri Əbuzər İbrahimi Türkmanın rəhbərlik etdiyi nümayəndə heyəti Azərbaycana rəsmi səfəri çərçivəsində dekabrın 4-də Mədəniyyət və Turizm Nazirliyində olub.

AzərTAc xəbər verir ki, nazir Əbülfəs Qarayev Azərbaycan və İran arasında münasibətlərin genişlənməsindən söz açıb. Diqqətə çatdırıb ki, son iki ayda nazirlikdə qonşu ölkənin bir sıra nümayəndə heyəti ilə görüşlər keçirilib. Ə.Qarayev ölkələrimiz arasında mədəniyyət və din sahələrində əlaqələrin daha da genişləndirilməsinin zəruriliyini diqqətə çatdırıb. Bildirib ki, qardaş ölkələrimiz və xalqlarımız arasında münasibətlər daha intensiv xarakter almalıdır. Ona nail olmalıyıq ki, tariximizi, mədəniyyətimizi, kökümüzü, dinimizi, imanımızı birləşdirən amillər daha geniş şəkildə xalqlarımıza çatdırılsın, onlar bir-birini daha yaxından tanısınlar, bir-birinə daha yaxşı münasibətlər bəsləsinlər.

Nazir vurğulayıb ki, Azərbaycan və İran arasında dostluq, qardaşlıq, əməkdaşlıq əlaqələrinin durmadan genişlənməsi xalqlarımıza yalnız xeyir verməkdədir. Xüsusilə qeyd etmək istərdim ki, son dövrdə hər iki dövlətin prezidentlərinin münasibətləri bizi bir daha bu yola istiqamətləndirir. Azərbaycan Prezidenti İlham Əliyevin və İran Prezidenti Həsən Ruhaninin qarşılıqlı səfərləri əlaqələrimizin daha intensiv xarakter almasına böyük təkan verib. Bu qarşılıqlı səfərlər münasibətlərimizin daha da genişləndirilməsinin vacibliyini şərtləndirir. Bu baxımdan Sizin səfərinizi də yüksək qiymətləndirirəm. Çox sevinirəm ki, Siz Azərbaycan dilində sərbəst danışırsınız və aramızda tərcüməçiyə ehtiyac yoxdur.

Səmimi görüşə görə təşəkkürünü bildirən İslam Mədəniyyəti və Əlaqələri Təşkilatının sədri Əbuzər İbrahimi Türkman Azərbaycanın qədim tarixə və zəngin mədəniyyətə malik ölkə olduğunu deyib. Qeyd edib ki, biz özümüzü Azərbaycanın millətindən, dövlətindən ayrı təsəvvür etmirik. Bizim hər şeyimiz, o cümlədən mətbəximiz, mədəniyyətimiz, sevincimiz, kədərimiz, hissiyyatımız birdir. Xalqlarımızın mədəniyyətlərinin yaxınlığı müvafiq sahədə birgə tədbirlərin keçirilməsinə imkan yaradır.

Görüş ikitərəfli əlaqələrə dair fikir mübadiləsi ilə davam edib.

Azərbaycan.-2014.- 5 dekabr.- S.5.