Təhsil naziri Saatlı şəhərində vətəndaşları qəbul edib

Azərbaycan Respublikasının Prezidenti İlham Əliyevin tapşırıq və tövsiyələrinə uyğun olaraq, mərkəzi icra hakimiyyəti orqanlarının rəhbərləri bölgələrdə vətəndaşların qəbulunu keçirir, onların müxtəlif məsələlərlə bağlı müraciət, ərizə və şikayətlərinin müsbət həll edilməsi üçün müvafiq tədbirlər görürlər.

AzərTAc xəbər verir ki, mərkəzi icra hakimiyyəti orqanları rəhbərlərinin 2014-cü ilin dekabr ayında şəhər və rayonlarda vətəndaşların qəbulu cədvəlinə uyğun olaraq təhsil naziri Mikayıl Cabbarov dekabrın 8-də Saatlı şəhərindəki Gənclər Mərkəzində Şirvan şəhərində, Saatlı, Sabirabad, İmişli, Beyləqan və Hacıqabul rayonlarında yaşayan bir qrup vətəndaşı qəbul edib.

Nazirliyin idarə və departamentlərinin, həmçinin tabeli qurumlarının rəhbərlərinin iştirak etdikləri 30-dan çox sakinin müraciətlərinə baxılıb.

Vətəndaşlar işə qəbul, xaricdə təhsil, məktəblərin təmiri ilə əlaqədar müraciət ediblər. İş yerlərinin dəyişdirilməsi, tələbələrin bir ali təhsil ocağından digərinə köçürülməsi, təhsildə yeniliklərin tətbiqinə dair təkliflər də qəbul zamanı qaldırılan məsələlər sırasında olub.

Nazir Mikayıl Cabbarov hər bir vətəndaşın müraciətinin diqqətlə araşdırılması və qaldırılan məsələlərin qanunvericiliyin tələblərinə uyğun surətdə həlli barədə müvafiq strukturların rəhbərlərinə tapşırıqlarını verib.

Müraciətlərin bir qismi elə yerindəcə öz həllini tapıb. Nazirliyin səlahiyyətinə aid olmayan məsələlər isə aidiyyəti orqanlara çatdırılmaq üçün qeydiyyata alınıb və nəzarətə götürülüb.

Azərbaycan.-2014.- 9 dekabr.- S.5.