Mədəniyyət və turizm naziri Sabirabadda vətəndaşları qəbul edib

Azərbaycan Respublikasının Prezidenti İlham Əliyevin göstəriş və tövsiyələrinə müvafiq olaraq, dekabrın 10-da mədəniyyət və turizm naziri Əbülfəs Qarayev Sabirabad şəhərindəki Heydər Əliyev Mərkəzində Sabirabad, Saatlı, İmişli, Beyləqan, Ağcabədi, Laçın, Füzuli, Xocavənd, Cəbrayıl rayonlarından olan vətəndaşları qəbul edib.

AzərTAc xəbər verir ki, nazirliyin idarə və departamentlərinin, həmçinin tabeli qurumlarının rəhbərlərinin iştirak etdikləri görüşdə Aran bölgəsinin rayonlarında yaşayan bir qrup vətəndaşın müxtəlif xahiş və təkliflərinə baxılıb.

Vətəndaşların müraciətləri əsasən tarixi abidələrin bərpası və qorunması, bölgələrdə turizmin inkişafı, yeni otellərin tikintisi, yerlərdə musiqi və incəsənət məktəblərinin, kitabxanaların fəaliyyətinin genişləndirilməsi, musiqi məktəblərinin və klubların təmiri, mədəniyyət müəssisələrinin, kinoteatrların maddi texniki bazasının yaxşılaşdırılması ilə bağlı olub.

Məcburi köçkün düşərgələrində, mədəniyyət ocaqlarına əlavə ştatların verilməsi, xalq teatrlarının inkişafına qayğı, istedadlı gənclərin üzə çıxarılması və onların gələcək fəaliyyətinə yaradım göstərilməsinə dair təkliflər də qəbul zamanı qaldırılan məsələlər sırasında olub.

Nazir Ə. Qarayev hər bir vətəndaşın müraciətinin diqqətlə araşdırılması və qaldırılan məsələlərin qanunvericiliyin tələblərinə uyğun surətdə həlli barədə müvafiq strukturların rəhbərlərinə tapşırıqlarını verib. Müraciətlərin bir qismi elə yerindəcə öz həllini tapıb.

Mədəniyyət və Turizm Nazirliyinin səlahiyyətlərinə aid olmayan müraciətlər isə aidiyyəti qurumlara çatdırılmaq üçün qeydiyyata alınıb və nəzarətə götürülüb.

Vətəndaşların qəbulu başa çatdıqdan sonra nazir sözügedən rayonların mədəniyyət işçiləri ilə müşavirə keçirib. Bölgələrdə turizm infrastrukturunun qurulması və gələcək inkişafı üçün fikir mübadiləsi aparılıb.

Azərbaycan.-2014.- 11 dekabr.- S.7.