Yeni proqram uğurla icra olunur

İl başa çatır. Həm də üçüncü Dövlət Proqramının ilk ili. Hər yerdə olduğu kimi, sərhəd bölgəsində yerləşən Gədəbəy rayonunda, onun qəsəbə və kəndlərində, idarə və müəssisələrində də ilə yekun vurulur, qarşıda duran vəzifələr müəyyən edilir.

İlin uğurları fərəhlidir. Rayon üzrə təqribən 400 milyon manatlıq məhsul istehsal olunub. Bu da 2003-cü ildə olduğundan 6,7 dəfə çoxdur. Son illərin ən xarakterik cəhəti budur ki, rayonda kənd təsərrüfatı ilə yanaşı, sənaye sahələri də sürətlə inkişaf edir, dövlət proqramlarında göstərilən tapşırıqlar sistemli surətdə yerinə yetirilir.

Aparılan genişmiqyaslı tikinti-abadlıq işləri sayəsində Gədəbəyin siması çox dəyişib. Heydər Əliyev adına mədəniyyət və istirahət parkı yenidən qurulub, 1000 nəfər tamaşaçı tutan möhtəşəm Yaşıl teatr, respublikada analoqu olmayan Aşıq musiqisi məktəbi istifadəyə verilib. Hazırda neçə-neçə sosial obyekt inşa edilir.

Əhalinin güzəranının yaxşılaşması məqsədilə sosial problemlərin həlli, xüsusən qaz və elektrik enerjisi təchizatının günün tələbləri səviyyəsində qurulması üçün konkret tədbirlər görülür. Dövlət proqramına uyğun olaraq 110 kilovoltluq elektrik xətti çəkilir. Moruqlu, Nərimankənd, Samanlıq, Qoşabulaq-Misginli, Çalburun, Çalbaş, Səbətkeçməz, Söyüdlü kəndlərinin qazlaşdırılması üçün ilkin tədbirlər həyata keçirilir.

Son illər rayonda mənzil fondunun ümumi sahəsi 48,5 faiz artmışdır. Qarabağ müharibəsi əlillərinə və şəhid ailələrinə xüsusi qayğı göstərilir. Bu yaxınlarda 40 mənzilli yaşayış binası istifadəyə verilib, daha 54 mənzilli iki binanın inşasına hazırlıq görülür.

Gədəbəy irili-xırdalı 100dən artıq yaşayış məntəqəsini əhatə edir. Coğrafi şəraiti elədir ki, evlər bir-birindən aralı tikilib. Gediş-gəliş mürəkkəbdir. Rayonun baş magistralından və şəhərdaxili küçələrdən əlavə 336 kilometr yerli əhəmiyyətli yolları var. Onların abadlığı, rahatlığı hər bir insanın taleyində, hər bir kəndin tərəqqisində mühüm rol oynayır.

İndi hər yanda sistemli surətdə yolar çəkilir və körpülər salınır. Bu mühüm məsələyə dövlət proqramında da xüsusi diqqət yetirilib. Proqramda yerli əhəmiyyətli avtomobil yollarının tikintisinin, yenidən qurulmasının və körpülərin əsaslı təmirinin davam etdirilməsi bir vəzifə kimi irəli sürülüb. Hamını illər boyu narahat edən bu vacib məsələlər uğurla həll edilir. Əhalinin uzun illərdən bəri arzusunda olduğu Gədəbəy-Novosaratovka-Qaravəllilər yolunun tikintisi isə başa çatmaq üzrədir.

Son vaxtlar Slavyanka-Qoşabulaq, Arıxdam-Söyüdlü-Ərtəpə, Gədəbəy- Rüstəm Əliyev, Gədəbəy-Qızıltorpaq-Şınıx yolları əsaslı təmir olundu. 15 kilometrlik Xarxar-Samanlıq yolu yenidən quruldu. Nərimankənd-Moruqlu, İsalı- Mormor, İnəkboğan-Böyükqaramurad, Şahdağ-Arabaçı, Slavyanka-Nərimankənd yollarında təmir işləri aparıldı. Bir sıra yerlərdə - çayların üzərində keçidlər düzəldildi, Fındıqlı körpüsü bərpa edildi. Şəhərin girəcəyindəki Çolpan çayı üzərində üçtağlı körpü istifadəyə verildi. Gədəbəylilər iftixarla deyirlər ki, bütün bunlar yola saldığımız ilin əvəzsiz yadigarları, Prezident İlham Əliyevin sərhəd bölgəsində yerləşən qəsəbə və kəndlərə göstərdiyi tükənməz qayğı və diqqətin bəhrəsidir.

Rayonda dövlət proqramına uyğun olaraq məktəb tikintisinə geniş fikir verilir. Təkcə son iki ildə Novorasaratovka, Slavyankada Qoşabulaq, Arıxdam və Samanlıq kəndlərində iki və üçmərtəbəli məktəb binaları inşa olunub. Üçüncü Dövlət Proqramında təhsil müəssisələrinin əsaslı təmiri və tikintisi sahəsində işlərin davam etdirilməsi, o cümlədən, İsalı və Moruqlu kənd orta məktəbləri, Misginli kənd uşaq bağçası-körpələr evi üçün binaların tikilməsi nəzərdə tutulmuşdur. Dövlət proqramının bu tələbi də uğurla yerinə yetirilir. Rayonun ən ucqar yaşayış məntəqələrindən biri olan İsalı kəndində 180 yerlik məktəb binasının inşası başa çatmaq üzrədir. Moruqlu kəndində orta məktəb, Misginlidə isə uşaq bağçası- körpələr evi binalarının inşasına başlamaq üçün hazırlıq görülür.

Gədəbəy əsasən kənd təsərrüfatı rayonudur. Burada xüsusən kartofçuluq mühüm yer tutur. 2014-2018-ci illər üçün sosial-iqtisadi inkişafın Dövlət Proqramında da bu ənənəvi sahənin genişlənməsinə xüsusi diqqət yetirilib. Proqramda həmçinin kiçik və ya orta həcmli çörək istehsalı müəssisələrinin yaradılmasına, heyvandarlıq, arıçılıq, kartofçuluq və digər kənd təsərrüfatı sahələrinin inkişaf etdirilməsinə böyük önəm verilir.

Maldarlıq sahəsində uğurların daha da artırılması üçün baytarlıq idarəsi və diaqnostika kabineti üçün inzibati binaların inşası mühüm bir vəzifə kimi irəli sürülmüşdü. Rayon fəallarının köməyi ilə bu mühüm iş vaxtında başa çatdırıldı. Hazırda ərazi kənd təsərrüfatı idarəsi üçün hər şəraiti olan yaraşıqlı bina inşa edilir.

Regionların sosial-iqtisadi inkişafı dövlət proqramlarının icrasına həsr olunmuş konfransda Prezident İlham Əliyev demişdir: “Kənd təsərrüfatının inkişafı növbəti illərdə iqtisadi sahədə prioritet olaraq qalacaqdır. Biz daim buna böyük diqqət göstərməliyik... Bölgələr üzrə ixtisaslaşma aparılmalıdır. Mən bu barədə dəfələrlə öz fikirlərimi bildirmişəm. Müəyyən işlər görülübdür. Ancaq daha da konkret və ciddi təkliflər verilməlidir ki, biz bu ixtisaslaşmanı formalaşdıraq və yetişdirilən hər bir məhsul üzrə xüsusi stimullaşdırma amilləri də olmalıdır. Yəni burada kortəbii yanaşma qəbuledilməzdir. Hər bir bölgə üzrə, yetişdirilən hər bir kənd təsərrüfatı məhsulu üzrə xüsusi bir yanaşma tərzi olmalıdır”.

Göründüyü kimi, fermerlərə geniş meydan verilib, hər şey torpaq sahibkarlarının işə münasibətindən asılıdır. Necə deyərlər, məqsəd dəqiq, yol aydındır. Bu günlər keçirilən toplantılardan birində rayon Ağsaqqallar Şurasının sədri Kərəm Məmmədov isə dedi ki, nankor qonşuların hücumlarına hünərlə cavab verən və Başkənd kimi tarixi bir bölgəni düşmən caynağından biryolluq xilas edən hünərvər gədəbəylilər dövlət proqramının tələbləri və Prezident İlham Əliyevin qarşıya qoyduğu bütün vəzifələri həmişə uğurla yerinə yetiriblər. Biz bundan sonra da Azərbaycanın ümumi tərəqqisinə layiqli töhfələrimizi verəcəyik.

Əhməd İSAYEV,

Azərbaycan.-2014.- 20 dekabr.- S.10.