Heydər Əliyev Mərkəzində Gürcüstanın

xalq artisti Vaxtanq Kikabidzenin konserti

Dekabrın 20-də Heydər Əliyev Mərkəzində Gürcüstanın xalq artisti, tanınmış kinoaktyor və müğənni Vaxtanq Kikabidzenin solo konserti keçirilib.

Heydər Əliyev Mərkəzindən AzərTAc-a bildiriblər ki, konsertin əvvəlində Bakının gözəlliyindən söz açan ifaçı paytaxtımızın sakinləri və şəhərimizin qonaqları qarşısında çıxışından qürur hissi duyduğunu bildirib.

Vaxtanq Kikabidze ecazkar səsi və zamanın fövqündə duran mahnıları ilə yenidən qəlbləri fəth edib. O, yaradıcılığının müxtəlif dövrlərinə aid mahnıları tamaşaçılara onların tarixçələrini danışaraq təqdim edib. Şux zarafatlar, məzəli söhbətlərlə zalda şən ovqat yaradan ifaçının çıxışı alqışlarla qarşılanıb.

V.Kikabidzenin Bakı tamaşaçılarına təqdim etdiyi repertuarda məşhur “Mənim illərim - mənim sərvətim”, “Mimino” filmindəki mahnıları da yer alıb. Heydər Əliyev Mərkəzinin səhnəsində ikinci dəfə çıxış etdiyini vurğulayan sənətkar bu ilin yanvarında həmin səhnədə təqdim olunan “Vera məhəlləsinin musiqiləri” müziklinin əsas mahnısını yenidən ifa edib.

Canlı əfsanə səhnəni tanınmış gürcü müğənnisi Liza Baqrationi ilə bölüşüb. İlk dəfə Bakıda olan ifaçı buradakı gözəlliyə və xeyirxahlığa valeh olduğunu bildirib. O, tamaşaçılara iki mahnı təqdim edib.

Konsertin sonunda tamaşaçıların alqışları ilə bir neçə dəfə yenidən səhnəyə qayıdan V.Kikabidze proqramı Azərbaycan xalq mahnısı “Bəri bax”ın da daxil edildiyi “Qafqaz popurisi” ilə sona çatdırıb. O, bakılıları qarşıdan gələn Yeni il bayramı münasibətilə təbrik edib, onlara sevgi və səadət dolu günlər arzulayıb.

V.Kikabidze konsertdən əvvəl jurnalistlərə verdiyi müsahibədə Bakını çox sevdiyini bildirərək deyib: “Mən həmişə çıxışlarımda demişəm ki, iki şəhərdə məmnuniyyətlə yaşayaram - onlardan biri Tbilisi, digəri Bakıdır. Mən bu şəhəri sevirəm və özümü burada çox yaxşı hiss edirəm. Burada mənim çoxlu dostlarım var və tez-tez bir-birimizə qonaq gedirik”.

İlk dəfə Bakıya 40-50 il əvvəl gəldiyini söyləyən sənətkar son illər bu şəhərin çox gözəl və möhtəşəm olduğunu bildirib: “Mən unikal Heydər Əliyev Mərkəzinin səhnəsində ikinci dəfədir çıxış edirəm və tamaşaçılara səmimi münasibət, sevgi və hörmətə görə minnətdarlığımı bildirirəm. Bu heyrətamiz bina məni yalnız memarlığı ilə deyil, həm də hər bir sənətçinin uğurlu çıxışı üçün vacib əhəmiyyət daşıyan xoş aurası ilə valeh edib”.

Azərbaycan.-2014.- 23 dekabr.- S.16.