İran və Azərbaycan müştərək mədəniyyətə malikdir

İran İslam Respublikasında nəşr olunan “Dəniz” qəzeti bu ölkənin Azərbaycandakı səfiri Möhsün Pakayinin müsahibəsini dərc edib.

Səfir Azərbaycanın sürətlə inkişaf etdiyini və bunun rəsmi Tehranı sevindirdiyini bildirib. “Hər iki xalq müştərək mədəniyyətə malikdir. Xalqların tarixi, dini və milli adət-ənənələri, ümumilikdə mədəniyyətləri biri-birinə çox bənzəyir. Odur ki, Bakıda yaşayaraq fəaliyyət göstərmək bizim üçün heç bir çətinlik yaratmır. Biz Azərbaycanda özümüzü qəriblikdə hiss etmirik” – deyə səfir qeyd edib.

İranlı diplomat vurğulayıb ki, hər iki ölkənin dövlət rəsmilərinin qarşılıqlı səfərləri və aparılan danışıqlarda əldə olunan razılaşmalar Azərbaycan ilə İranın siyasi cəhətdən də yaxınlaşmasını şərtləndirir. Azərbaycan və İran diplomatları beynəlxalq təşkilatlar çərçivəsində səmərəli əməkdaşlıq edir və bir sıra məsələlərə dair vahid mövqe nümayiş etdirirlər.

Media sahəsində əməkdaşlıq əlaqələrindən danışan M.Pakayin bildirib ki, azərbaycanlı jurnalistlərin İrana, iranlı jurnalistlərin isə Azərbaycana səfərləri təşkil olunub. Bu səfərlər geniş ictimaiyyətə obyektiv məlumatların çatdırılmasına şərait yaradır. Mətbuat nümayəndələrinin qarşılıqlı səfərləri davam etdiriləcək.

İqtisadiyyat və ticarət əlaqələrinin də yüksələn xətlə inkişaf etdiyini diqqətə çatdıran səfir yaxın gələcəkdə iki ölkə arasındakı münasibətlərin daha da yaxınlaşacağına əminliyini ifadə edib.

Rabil Kətanov

AzərTAc-ın xüsusi müxbiri

Tehran

Azərbaycan.-2014.- 27 dekabr.- S.12.