Əlvida, ötən il, salam, Təzə il

Əlvida, ötən il,

əlvida sənə.

Bir də görüşmərik

səninlə daha.

Dağ dağa rast gələr,

bəlkə, haçansa,

Bizsə sənin ilə

heç zaman,

heç vaxt

Bir daha, bir daha

qarşılaşmarıq.

Hər zaman qalmayan

gözəllik kimi,

Yanan ulduz kimi

parladın, söndün.

Keçmiş zaman olub,

axan çay olub,

Şərəfli, şöhrətli

tarixə döndün.

Gəldin Yer üzünə,

bu kainata

Məsum körpə kimi,

bəyaz qar kimi.

Yaşadın dəqiqə,

saatla, ayla,

Min bir ümid dolu

gələn sabahla.

Ömür karvanının

bu yollarında

Elimə, günümə -

Azərbaycana

Yeni qələbələr,

yeni zəfərlər,

Könüllər oxşayan

sevinc bəxş etdin.

Uğurlar üstünə

uğur gətirib,

Yaxşını yamandan

seçib götürüb,

Ölkələr, millətlər

arasında biz

Bir az da ucaldıq,

boy atdıq sənlə.

Amma bir söz gəlib,

deməsəm, olmaz.

Gərək heç dəyməsin

o söz xətrinə.

Ötən günlərinlə,

aylarınla sən

Bir yaş da qaladın

yaşımız üstə.

Deməli, qocaldıq

bir yaş da belə.

Amma kədərdən çox

sevincimiz var.

Qocala-qocala

cavan görünən,

Boyu çinar kimi

göyə ucalan,

Ayağı torpaqda

məğrur palıdtək

Vüqarla, qürurla

möhkəm dayanan

Odlar yurdu adlı

şöhrətli, şanlı

Elimiz, günümüz

Vətənimiz var.

***

Salam, bir də salam,

gələn Təzə il!

Ayağın düşərli,

sayalı olsun!

Kimin nə arzusu,

nə niyyəti var,

Göyərsin zəmitək,

bol bəhər versin.

Hər kəs əkdiyinin

bəhrəsin

görsün.

Toy, şənlik bəzəsin

hər günü, ayı.

Ondan da pay düşsün

hər bir insana.

Göyərçin qanadlı

sülh şüarımız

Yayılsın hər yana -

bütün cahana!

Ölkələr, millətlər

mehriban olsun,

Hər duyan ürəkdə

xoş niyyət olsun.

Savaş da, dava da

qalsın qınında.

Bir körpə uşağın,

cavan əsgərin

Burnunun ucu da

heç qanamasın.

İşğalçı siyasət,

ikili mövqe

İlim-ilim itib

yox olub getsin.

Ərisin istiyə düşən

qar kimi,

Gözümüz onları

bir də görməsin.

Torpağın sinəsi

daha yenidən

Dilim-dilim olub

qoy sökülməsin,

qan tökülməsin.

Min bir əzab ilə,

alın təriylə

Tikilən, salınan

şəhərlər, kəndlər

Nahaqdan odlara

qoy qalanmasın,

alovlanmasın.

Analar nisgilli

göz yaşlarıyla

Bir daha, bir daha

qoy ağlamasın.

Nə oğul itkisi,

nə ər itkisi

Ana sinəsini

qoy dağlamasın.

Qarabağ həsrəti

vüsala dönsün.

Qaçqınlar yığışsın

ocaq başına.

Şuşadan ucalsın

muğamatımız,

Qızlar toplaşsınlar

bulaq başına.

Yenə bayrağımız

Xankəndimizdə

Vüqarla, qürurla

qoy dalğalansın,

Düşmən qəzəbindən

Alışsın, yansın.

Arzular, istəklər

dərya qədərdir.

Hansını söyləyim,

hansını yazım?

Bir daha, bir daha

yenə deyirəm:

Təzə il, qədəmin

mübarək olsun!

Seyran CAVADOV,

Azərbaycan.-2014.- 31 dekabr.- S.9.