Azərbaycan Respublikası Hərbi Prokurorluğunun geniş kollegiya iclası keçirilmişdir
Yanvarın 31-də Azərbaycan Respublikası Hərbi Prokurorluğunda mərkəzi aparat işçilərinin, Naxçıvan Muxtar Respublikası və ərazi hərbi prokurorlarının iştirakı ilə 2013-cü ildə görülmüş işlərin və cari ildə qarşıda duran vəzifələrin müzakirəsinə həsr olunmuş geniş kollegiya iclası keçirilmişdir.
Hərbi
Prokurorluğun mətbuat xidmətindən bildirmişlər
ki, kollegiya iclasında hesabat məruzəsi ilə
çıxış edən baş prokurorun müavini - hərbi
prokuror, ədliyyə general-leytenantı Xanlar Vəliyev yola
saldığımız 2013-cü ilin Azərbaycan
Respublikasının Prezidenti İlham Əliyevin rəhbərliyi
ilə Heydər Əliyev siyasi kursunun uğurlu
inkişafı, xüsusən dövlət
başçısının xalqımızın yekdil etimadı
nəticəsində yenidən bu ali vəzifəyə
seçilməsi ilə əlamətdar olduğunu xüsusilə
vurğulamışdır.
Qeyd edilmişdir ki, Azərbaycan Prezidenti, Ali Baş Komandan İlham Əliyevin rəhbərliyi ilə həyata keçirilən məqsədyönlü tədbirlər nəticəsində 2013-cü ildə dövlət müstəqilliyimiz daha da möhkəmləndirilmiş, demokratik, hüquqi dövlət, vətəndaş cəmiyyəti quruculuğu prosesi sürətləndirilmişdir. Ölkənin inkişaf dinamikasında ciddi keyfiyyət dəyişiklikləri baş vermiş və sosial-iqtisadi siyasətin uğurla həyata keçirilməsi nəticəsində böyük nailiyyətlər əldə olunmuşdur. Uğurla həyata keçirilən dövlətçilik siyasətinin məntiqi nəticəsi kimi əldə edilmiş iqtisadi nailiyyətlər, ölkəmizdə yoxsulluğun və işsizliyin səviyyəsinin azalmasına, kriminogen durumun sabitləşməsinə müsbət təsir göstərmişdir.
Ölkə iqtisadiyyatının dinamik inkişafının Silahlı Qüvvələrin fəaliyyətinə də müsbət təsir etdiyini söyləyən hərbi prokuror bildirmişdir ki, son illər Ali Baş Komandan İlham Əliyevin diqqət və qayğısı nəticəsində ordunun maddi-texniki bazası əhəmiyyətli dərəcədə möhkəmləndirilmiş, hərbçilərin sosial vəziyyətinin yaxşılaşdırılması istiqamətində mühüm addımlar atılmışdır. Bunun nəticəsində ordunun döyüş qabiliyyəti xeyli yüksəlmiş, şəxsi heyətin nizam-intizamı güclənmiş, nöqsanların aradan qaldırılması istiqamətində mühüm irəliləyişlərə nail olunmuşdur. Ötən il Silahlı Qüvvələrdə cinayətkarlığa qarşı mübarizə, qanunçuluq və hüquq qaydasının möhkəmləndirilməsi istiqamətində görülən işlər səmərəli olmuş, hesabat dövründə qeydə alınmış cinayətlərin 99,5 faizi açılmışdır.
Hərbi prokuror demişdir ki, 2012-ci ilə nisbətən ötən il Silahlı Qüvvələrdə və qanunvericilikdə nəzərdə tutulmuş başqa silahlı birləşmələrdə qeydə alınmış cinayətlər 0,5 faiz, hərbi xidmət əleyhinə cinayətlər 2 faiz, hərbi xidmətdən yayınma 16 faiz, fərarilik cinayətləri 7,7 faiz, hərbi hissəni və xidmət yerini özbaşına tərketmə cinayətləri 22 faiz, hakimiyyətdən sui-istifadə etmə cinayətləri 5,6 faiz, qulluğa səhlənkar yanaşma cinayətləri 12,5 faiz, odlu silah, döyüş sursatını, partlayıcı maddələri və qurğuları talama və ya hədə-qorxu ilə tələb etmə 22,2 faiz, silahlı birləşmələrdə ölüm halları 21,4 faiz, o cümlədən qəsdən adam öldürmə 33,3 faiz, özünü öldürmə həddinə çatdırma 70,6 faiz azalmışdır. Hərbi hissəni və xidmət yerini döyüş şəraitində özbaşına tərk etmə halları baş verməmişdir. Hərbi birləşmələrdə törədilmiş bir sıra ağır və xüsusilə ağır cinayətlərin açılması təmin olunmuşdur. Bu növ cinayət hadisələrinin azalmasında hərbi prokurorluq orqanlarının Müdafiə Nazirliyi, Dövlət Sərhəd Xidməti, Daxili Qoşunlar və digər hərbi qurumlarla yaradılmış qarşılıqlı sağlam və işgüzar əlaqələrin, eləcə də hələ ilin əvvəlindən planlaşdırılmaqla il ərzində mütəmadi həyata keçirilmiş müxtəlif xarakterli birgə tədbirlərin çox böyük əhəmiyyəti olmuşdur. Bununla yanaşı, qanunvericilikdə nəzərdə tutulmuş silahlı birləşmələrdə tabelik qaydaları əleyhinə cinayətlər, o cümlədən tabelik münasibətlərində olmayan hərbi qulluqçular arasında qarşılıqlı münasibətlərin nizamnamə qaydalarını pozma, maşınları idarə etmə və istismar qaydalarını pozma, mülkiyyət əleyhinə və qeyri-hərbi cinayətlər artmışdır.
Silahlı Qüvvələrdə və qanunvericilikdə nəzərdə tutulmuş başqa silahlı birləşmələrdə qəsdən adam öldürmə və özünü öldürmə həddinə çatdırma, tabelik münasibətlərində olmayan hərbi qulluqçular arasında qarşılıqlı münasibətlərin nizamnamə qaydalarını pozma cinayətlərinin qarşısının alınması məqsədilə hər il olduğu kimi, ötən ildə də iki dəfə Respublika Hərbi Prokurorluğunun kollegiyasında silahlı birləşmələrin rəhbər vəzifəli şəxslərinin iştirakı ilə məhkəmə və istintaq təcrübəsi ümumiləşdirilməklə müzakirə edilmişdir. Həmin cinayətləri doğurmuş səbəb və şəraitin aradan qaldırılması üçün zəruri qabaqlayıcı tədbirlərin görülməsinə dair kollegiyanın qərarlarına əsasən, silahlı birləşmələrin komandanlıqlarına təqdimatlar, ərazi hərbi prokurorlarına icmal-məktublar göndərilmişdir. Cinayətlərin qarşısının alınması məqsədi ilə Müdafiə Nazirliyi və digər qurumlarla birlikdə tədbirlər planları hazırlanaraq təsdiq edilmiş və icrası təmin olunmuşdur. Hazırda bu istiqamətdə işlər davam etdirilir.
Kollegiyada hərbi prokuror, ədliyyə general-leytenantı Xanlar Vəliyev bir daha vurğulamışdır ki, Silahlı Qüvvələrdə və qanunvericiliyə uyğun olaraq yaradılan digər silahlı birləşmələrdə qəsdən və ehtiyatsızlıqdan adam öldürmə, özünü öldürmə, eləcə də düşmən tərəfindən açılmış atəş nəticəsində xəsarət almış və ya öldürülmüş, habelə xəstəliklə bağlı və ya avtoqəza nəticəsində baş vermiş ölüm hadisələri ilə əlaqədar hər bir fakt üzrə Respublika Hərbi Prokurorluğu tərəfindən dərhal Cinayət Məcəlləsinin müvafiq maddələri ilə cinayət işi başlanılır və istintaq hərəkətləri aparılmaqla cinayət törətmiş şəxslərin məhkəmə məsuliyyətinə verilməsi təmin olunur.
Heydər Əliyev Fondunun prezidenti, Milli Məclisin deputatı Mehriban xanım Əliyevanın təşəbbüsü ilə Milli Məclisin Azərbaycan xalqının ümummilli lideri Heydər Əliyevin 90 illik yubileyi münasibətilə amnistiya elan edilməsi haqqında 2013-cü il 7 may tarixli qərarının Respublika Hərbi Prokurorluğu orqanları tərəfindən icrası vaxtında həyata keçirilmişdir.
"Korrupsiyaya
qarşı mübarizə haqqında" Qanunun
və Azərbaycan Respublikasının Prezidenti
İlham Əliyevin 2012-ci il
5 sentyabr tarixli sərəncamı
ilə təsdiq edilmiş "Korrupsiyaya qarşı mübarizəyə dair 2012-2015-ci illər üçün
Milli Fəaliyyət Planı"nın,
eləcə də 2013-cü il yanvarın
16-da dövlət başçısının sədrliyi ilə keçirilmiş
Nazirlər Kabinetinin iclasında
qarşıya qoyulan vəzifələrin
icrası ilə əlaqədar hərbi prokurorluq
orqanları mütəşəkkil cinayətkarlığın
ən təhlükəli təzahürlərindən biri olan korrupsiyaya
qarşı mübarizə sahəsində fəaliyyətini daha da gücləndirmişdir.
Bu da Silahlı Qüvvələrin qüdrətini
zəiflədə biləcək cinayətlərin, o cümlədən mənimsəmə,
israfçılıq, rüşvətxorluq, vəzifədən
sui-istifadə etmə və digər cinayətlərin
vaxtında aşkar olunmasına, cinayət
törətmiş şəxslərin layiqli
cəzaya məhkum edilməsinə şərait
yaratmışdır.
Diqqətə
çatdırılmışdır ki, respublikanın hərbi
prokurorluq orqanları 2013-cü ildə korrupsiya və
rüşvətxorluq hallarına qarşı mübarizə
sahəsində müvafiq işlər görərək bu
xarakterli faktlar üzrə 64 şəxs barəsində 55
cinayət işinin istintaqını tamamlayaraq aidiyyəti
üzrə baxılması üçün hərbi məhkəmələrə
göndərmişlər.
Hərbi
Prokurorluq tərəfindən Səfərbərlik və Hərbi
Xidmətə Çağırış üzrə Dövlət
Xidməti ilə birgə həmin Xidmətin idarə,
şöbə və bölmələrində
aparılmış yoxlamalar nəticəsində bir sıra
hallarda çağırışçıların hərbi
xidmətə çağırışdan əsassız azad
edilmələri, onlara hərbi həkim komissiyalarının rəylərinə
əsasən çağırışdan qanunsuz möhlət
verilməsi və
çağırışçıların valideynlərindən
rüşvət alınması ilə bağlı
Göyçay, Daşkəsən və Saatlı rayon
şöbələrinin vəzifəli şəxsləri barəsində
Cinayət Məcəlləsinin 311.3.1-ci, 311.3.2-ci və
313-cü maddələri ilə başlanmış cinayət
işlərinin istintaqı yekunlaşaraq baxılması
üçün hərbi məhkəmələrə göndərilmişdir.
Azərbaycan
Respublikası Prezidentinin "Dövlət və bələdiyyə
əmlakının və vəsaitlərinin idarə
olunması sahəsində korrupsiya ilə əlaqədar
hüquqpozmalara qarşı mübarizənin gücləndirilməsi
haqqında" 2009-cu il 22 iyun tarixli fərmanında və
dövlət başçısının Nazirlər
Kabinetinin bu il yanvarın 9-da 2013-cü ilin sosial-iqtisadi
inkişafının yekunlarına və 2014-cü ildə
qarşıda duran vəzifələrə həsr olunmuş
iclasındakı nitqində rüşvətxorluğa və
korrupsiyaya qarşı daha da ciddi mübarizə
aparılması, ictimai nəzarətin gücləndirilməsi
barədə verdiyi tapşırıqların icrası ilə
əlaqədar prokurorluq orqanlarının üzərinə
çox böyük məsuliyyət qoyulduğunu qeyd edən
Xanlar Vəliyev bildirmişdir ki, bu qəbildən olan cinayətlərin
aşkarlanması istiqamətində struktur qurumlar tərəfindən
bir sıra işlər görülsə də, bu sahədə
tədbirlərin səmərəliliyi və intensivliyi daha da
artırılmalıdır.
Hərbi
prokurorluq orqanları törədilmiş cinayətlər nəticəsində
hüquqi və fiziki şəxslərə dəymiş maddi
ziyanın 78,6 faizinin istintaq zamanı ödənilməsini təmin
etmişlər.
Xüsusi vurğulanmışdır ki, 2013-cü ildə hərbi prokurorluq orqanları tərəfindən bir çox ağır, mürəkkəb və çoxepizodlu cinayət işlərinin istintaqı tamamlanmış, ibtidai istintaqın keyfiyyətinin yaxşılaşdırılması, qüvvədə olan cinayət-prosessual qanunvericiliyin tələblərinə dəqiq əməl edilməsi üzərində nəzarət gücləndirilmişdir. Hesabat dövründə dövlət əmlakının mənimsənilməsi ilə bağlı bir sıra cinayət işləri üzrə istintaq yekunlaşaraq günahkar şəxslərin cinayət məsuliyyətinə cəlb edilməsi təmin olunmuşdur.
Ötən il Respublika Hərbi Prokurorluğunun Ağır cinayətlərə dair işlər üzrə istintaq idarəsində ağır və xüsusilə ağır, mürəkkəb və aktual xarakterli cinayət işlərinin istintaqı tamamlanaraq baxılması üçün hərbi məhkəmələrə göndərilmişdir.
Müdafiə Nazirliyinin "N" saylı hərbi hissələrinin sabiq maliyyə xidməti rəisləri Rüstəmov İlqar Faiq oğlunun, Əliyev Zaur Bayram oğlunun, Nəzərov Şahmar Məmməd oğlunun, Salamov Məmməd Akif oğlunun, Əliyev Rauf Əsgər oğlunun, Sadıqov Aydın Fəxrəddin oğlunun Azərbaycan Respublikası Cinayət Məcəlləsinin 179.3.2-ci, 313-cü və 326.1-ci maddələri ilə başlanmış cinayət işlərinin istintaqı yekunlaşaraq baxılması üçün hərbi məhkəmələrə göndərilmişdir.
Cinayət törətmiş şəxslərin əməlləri nəticəsində dövlətə vurulmuş maddi ziyanın 2 milyon 1948 manat məbləğində vəsaitin istintaq zamanı ödənilməsi təmin edilmişdir.
Ötən il hərbi prokurorluq orqanları tərəfindən əməliyyat-axtarış tədbirlərinin yerinə yetirilməsi üzərində prokuror nəzarətinin gücləndirilməsi nəticəsində axtarışda olanlardan 63 nəfər tapılıb istintaqa cəlb edilmişdir. Təhqiqat orqanlarının fəaliyyətində qanunların icrasına nəzarət qaydasında 149 yoxlama keçirilmiş, nəticədə 2575 qanun pozuntusu aşkar edilmişdir. Qanun pozuntularını doğuran səbəb və şəraitin aradan qaldırılması üçün 317 təqdimat göndərilmiş, 222 nəfərə xəbərdarlıq edilmiş, 60 cinayət işi başlanmış, təhqiqat orqanlarının icraatında olan işlər üzrə 210 yazılı göstəriş verilmiş, cinayət işlərinin başlanmasının rədd edilməsinə dair 28 qanunsuz qərar ləğv olunmuşdur.
Kollegiya iclasında təhqiqat orqanlarının fəaliyyətində aşkar edilmiş nöqsanlar və qanun pozuntuları konkret misallarla təhlil edilmişdir. Hərbi prokuror ərazi hərbi prokurorlarından bu sahədə görülən işin səmərəliliyinin artırılmasını və ilkin təhqiqatın tam, hərtərəfli və keyfiyyətli aparılması üçün prokuror nəzarətinin daha da gücləndirilməsini tələb etmişdir.
Hesabat dövründə dövlət ittihamının müdafiəsi şöbəsi tərəfindən birinci instansiya hərbi məhkəmələrinin hökm və qərarlarından verilmiş 72 apelyasiya protestinin 64,7 faizi təmin olunmuşdur. Cinayətkarlığın profilaktikası üçün məhkəmə qərar və hökmlərinin rolunun artırılması, məhkumlar, həm də başqa şəxslər tərəfindən yeni cinayətlərin törədilməsinin qarşısını almaq məqsədilə hesabat dövründə 235 məhkəmə prosesi səyyar qaydada keçirilmişdir.
Keçən il hərbi prokurorluq orqanlarında vətəndaşların 1741 müraciətinə baxılmış, 1063 vətəndaş mərkəzi aparatda qəbulda olmuş, ərazi hərbi prokurorluqlarında 3412 vətəndaşın fərdi qəbulu aparılmış, bilavasitə hərbi hissə və birləşmələrdə 2738 nəfər qəbul edilərək müraciətləri üzrə müvafiq qərarlar qəbul olunmuşdur.
Ədliyyə general-leytenantı Xanlar Vəliyev demişdir ki, Xocalı, Qaradağlı, Meşəli, Bağanis-Ayrım faciələri, terror, habelə əsir düşmüş şəxslərə işgəncə verilməsi və erməni silahlı qüvvələrinin törətdiyi digər cinayət əməlləri Azərbaycan Respublikası Cinayət Məcəlləsinin soyqırıma görə məsuliyyəti nəzərdə tutan 103-cü və digər maddələri ilə istintaq olunan cinayət işi üzrə 296 təqsirləndirilən şəxs barəsində axtarış elan edilmişdir. Hazırda cinayət işi üzrə intensiv istintaq-əməliyyat tədbirləri davam etdirilir.
Kollegiyada görülmüş müsbət işlərlə yanaşı, "Prokurorluq haqqında" Qanunda nəzərdə tutulmuş fəaliyyət istiqamətləri üzrə işin səmərəliliyinə mənfi təsir göstərən hallar ətraflı təhlil olunmuşdur. İbtidai istintaq, təhqiqat üzərində prosessual rəhbərliyin həyata keçirilməsində, cinayətkar hərəkətlər nəticəsində hüquqi və fiziki şəxslərə vurulmuş maddi ziyanın ödənilməsi, dövlət ittihamının müdafiəsi, müraciətlərə baxılması və vətəndaşların qəbulu ilə əlaqədar işin təşkilində yol verilmiş nöqsanlar və çatışmazlıqlar ciddi tənqid olunmuş və onların aradan qaldırılması üçün konkret göstərişlər verilmişdir.
Vurğulanmışdır ki, hərbi qulluqçuların hüquqi maarifləndirilməsi sahəsində də müəyyən işlər görülmüş, qanunvericiliyin öyrənilməsi ilə əlaqədar "Hərbi prokurorluq orqanları ilə Silahlı Qüvvələrdə hüquq qaydalarının, hərbi intizamın möhkəmləndirilməsi, cinayət hadisələrinin xəbərdarlıq edilməsi və aradan qaldırılması sahəsində Respublika Hərbi Prokurorluğunun, Müdafiə Nazirliyi, Dövlət Sərhəd Xidməti və Daxili Qoşunlarla birgə Tədbirlər Planı"na əsasən, Hərbi Prokurorluğun əməkdaşları müntəzəm qaydada hərbi hissələrdə olmuş, hərbi qulluqçular qarşısında çıxışlar, məruzələr etmiş, onlarla söhbətlər aparmışlar. Bununla yanaşı, Respublika Hərbi Prokurorluğu tərəfindən "Əsgər kitabçası" çap edilərək hərbi hissələrə göndərilmişdir.
Xanlar Vəliyev diqqətə çatdırmışdır ki, hərbi prokurorluq orqanlarının hərbi qulluqçularının sosial müdafiəsinin yaxşılaşdırılması istiqamətində müəyyən işlər görülmüşdür. Hərbi Prokurorluğun vəzifə borclarını layiqincə yerinə yetirən 27 işçisinə respublika hərbi prokurorunun əmrinə əsasən məharət dərəcələri verilmişdir.
Azərbaycan Respublikası baş prokurorunun və hərbi prokurorun müvafiq əmrləri ilə 25 işçi vəzifədə irəli çəkilmiş, xidməti fəaliyyətlərində fərqlənmiş 40 əməkdaş həvəsləndirilmiş, 37 işçi müxtəlif medallarla təltif olunmuş, 82 əməkdaşa rütbələr verilmiş, 20 işçi intizam məsuliyyətinə cəlb edilmişdir.
Hərbi Prokurorluğun maddi-texniki vasitələrlə, xidməti bina, nəqliyyat və rabitə vasitələri, habelə başqa növ təminatlarla təchiz edilməsi üçün müvafiq işlər görülmüşdür.
Sonra məruzə ətrafında çıxışlar olmuşdur.
Respublika
Hərbi Prokurorunun müavinləri, ədliyyə general-mayoru
Şəfahət İmranov və ədliyyə general-mayoru
Rasim Kazımov, şöbə
rəisləri Mahir Əhmədov, Aydın Ələsgərov,
Naxçıvan Muxtar Respublikasının hərbi prokuroru
Yaşar Həsənov, Gəncə hərbi prokuroru Əmrah Mehtiyev, Qazax hərbi
prokuroru Şahin Zamanov çıxış edərək
hesabat dövründə görülmüş işlərdən
danışmış, nöqsanların aradan qaldırılması,
qanunçuluğun möhkəmləndirilməsi, insan
hüquq və azadlıqlarının etibarlı müdafiəsi,
cinayətkarlığa qarşı səmərəli
mübarizənin təmin olunması ilə əlaqədar hərbi
prokurorluq orqanlarının qarşısında duran vəzifələrin
yerinə yetirilməsi üçün görüləcək
tədbirlər barədə ətraflı məlumat
vermişlər.
Kollegiya
iclasında həmçinin ərazi hərbi
prokurorluqlarında keçirilən əməliyyat
müşavirələrinin nəticələri hərtərəfli
müzakirə olunmuş, tabe prokurorluqların əməkdaşları
tərəfindən qaldırılan və işin səmərəliliyinin
artırılması baxımından həlli vacib məsələlərin
tənzimlənməsi istiqamətində qarşıda duran
konkret vəzifələr müəyyənləşdirilmiş,
əlaqədar struktur qurumlarına konkret göstərişlər
verilmişdir.
Respublika
hərbi prokuroru, ədliyyə general-leytenantı Xanlar Vəliyev
kollegiyaya yekun vuraraq demişdir ki, hərbi prokurorluq
orqanları Azərbaycan Respublikasının Prezidenti, Ali
Baş Komandan İlham Əliyevin prokurorluq orqanlarına
göstərdiyi yüksək qayğı və etimadı
layiqincə doğrultmaq, qanunun aliliyini, hərbi idarəçilik
orqanlarında insan və vətəndaş hüquq və
azadlıqlarına dönmədən əməl
olunmasını, habelə cinayətkarlığa qarşı
mübarizəni təmin etmək üçün
bütün zəruri tədbirləri bundan sonra da dönmədən
həyata keçirəcəklər.
AzərTAc
Azərbaycan.-2014.- 1 fevral.- S.4.