Fransanın TV5Monde televiziya kanalında Azərbaycan haqqında veriliş yayımlanmışdır

Heydər Əliyev Fondunun Azərbaycanı Fransada yaxından tanıtmaq istiqamətində həyata keçirdiyi tədbirlər sayəsində ölkəmizə maraq getdikcə daha da artır. Bunu son vaxtlar yerli kütləvi informasiya vasitələrinin Azərbaycanla bağlı çoxsaylı məqalələr dərc etməsi və verilişlər yayımlaması da təsdiqləyir.

Fransanın geniş tamaşaçı auditoriyasına malik TV5Monde televiziya kanalında "Qısamüddətli səfər: Azərbaycan" adlı veriliş yayımlanmışdır. Verilişin əvvəlində zəngin tarixə malik Azərbaycanın qədim İpək Yolu üzərində yerləşməsi, Qafqazda ən güclü və lider dövlət olması, min illər boyu Şərq ilə Qərb arasında körpü rolu oynaması, yeraltı sərvətlərlə, xüsusilə, neft və təbii qazla zəngin olması barədə məlumat verilir. Televiziya verilişində Azərbaycanın paytaxtı Bakının özündə Şərq və Qərb mədəniyyətlərini birləşdirdiyi, UNESCO-nun Ümumdünya Mədəni İrs Siyahısına daxil olan İçərişəhərdəki Şirvanşahlar sarayının ölkənin tarixi barədə əyani təsəvvür yaratdığı, məşhur "Karvansaray" restoranında qonaqlara Azərbaycan mətbəxinin müxtəlif çeşiddə nümunələrinin təqdim edildiyi diqqətə çatdırılır.

Bakının yaxınlığında yerləşən Qobustan qayalarında əks olunan rəsmlərin Azərbaycanda insanların ən qədim dövrlərdə məskunlaşdığını sübut edən canlı tarix olduğu vurğulanır.

Həmçinin Azərbaycandakı palçıq vulkanlarından və onların əhəmiyyətindən bəhs olunur.

Verilişdə Azərbaycanın dünyada Odlar yurdu kimi tanındığı tamaşaçıların diqqətinə çatdırılır, Yanardağda daim od şölələndiyi, buna yeraltı təbii qazın səbəb olduğu bildirilir. Həmçinin son illər Azərbaycanda turizm imkanlarının artdığı, əsrarəngiz təbiəti və gözəl mənzərəsi ilə ölkəmizin xarici turistləri daha çox cəlb etdiyi barədə məlumatlar verilir, dəniz səviyyəsindən 2500 metr hündürlükdə yerləşən Xınalıq kəndinin özəlliklərindən söz açılır.

Ümumilikdə, veriliş Azərbaycanı fransız tamaşaçılarına tanıtmaq baxımından mühüm əhəmiyyət kəsb edir.

Azərbaycan.-2014.- 4 fevral.- S.9.