Azərbaycanın Strateji Araşdırmalar Mərkəzi və Mərakeş

Strateji Araşdırmalar Mərkəzi arasında əməkdaşlıq haqqında saziş imzalanıb

Azərbaycan Respublikasının Prezidenti yanında Strateji Araşdırmalar Mərkəzi (SAM) və Mərakeş Strateji Araşdırmalar Mərkəzi arasında əməkdaşlıq haqqında saziş imzalanmışdır.

SAM-ın mətbuat xidmətindən AzərTAc-a bildirilmişdir ki, sazişin imzalanması Mərakeş Strateji Araşdırmalar Mərkəzi və Afrika Strateji Araşdırmalar Federasiyasının təşkil etdiyi V beynəlxalq təhlükəsizlik forumundan sonra reallaşmışdır.

Xatırladaq ki, SAM-ın direktoru Fərhad Məmmədov və qurumun xarici siyasət məsələlərinin təhlili şöbəsinin məsləhətçi-eksperti Kamal Qasımov Mərakeşdə səfərdə olmuşlar. Forumun plenar iclasında Mərakeş, Tunis, Misir, Fransa, İtaliya, ABŞ və digər ölkələrdən ekspertlər, diplomatlar, hərbçilər çıxış etmiş, bölgədəki proseslər, regional təhlükəsizliyin müxtəlif aspektləri haqqında fikirlərini bölüşmüşlər. Forum beş plenar iclasdan və üç seminardan ibarət olmuşdur.

Fərhad Məmmədov forumda "Dağlıq Qarabağ münaqişəsi regional sabitliyə və təhlükəsizliyə təhdid kimi" mövzusunda çıxış etmişdir. F.Məmmədov Dağlıq Qarabağ münaqişəsinin regionun təhlükəsizliyinə vurduğu zərəri sistemli şəkildə təhlil etmişdir.

Azərbaycan.-2014.- 7 fevral.- S.4.