Azərbaycanın 2014-cü il üçün «Xalq yaradıcılığı paytaxtları» bəlli olmuşdur

Mədəniyyət və Turizm Nazirliyinin "2010-2014-cü illər üçün xalq yaradıcılığı paytaxtları" proqramı çərçivəsində 2014-cü il üzrə paytaxt bölgələr məlum olmuşdur. Mədəniyyət və Turizm Nazirliyinin müvafiq qərarı ilə bu il üçün Qəbələ "Azərbaycanın əfsanələr paytaxtı", Balakən "Folklor paytaxtı", Abşeron rayonu isə "Sənətkarlıq paytaxtı" elan edilmişdir.

Nazirliyin mətbuat xidmətindən bildirmişlər ki, "2010-2014-cü illər üçün xalq yaradıcılığı paytaxtları" proqramı Azərbaycanın qeyri-maddi mədəni irsinin qorunması, dəstəklənməsi, xalq yaradıcılığının təbliği və təşviqi istiqamətində aparılan islahatların davamı olaraq həyata keçirilir. Proqramın əsas məqsədləri regionlarda məqsədyönlü tədbirlərin təşkil olunması vasitəsilə Azərbaycanın qeyri-maddi mədəni irsinin qorunmasına, xalq yaradıcılığının təşviqinə, tarazlı regional və davamlı sosial-iqtisadi inkişafa, əhalinin həyat səviyyəsinin daha da yaxşılaşdırılmasına töhfə verməkdir.

Proqramın icrası ilə əlaqədar diyarşünaslıq, folklor və sənətkarlıq nominasiyaları üzrə daxil olmuş təkliflər müvafiq namizəd şəhərlərin ümumi hazırlığı, tarixi ənənələri və digər amillər nəzərə alınmaqla təhlil edilir. Paytaxt elan olunan bölgələrdə il ərzində milli folklor ustaları və kollektivlərinin çıxışları təmin edilir, sənətkarların əl işlərindən ibarət sərgilər təşkil olunur, milli adət-ənənələrin təbliği, respublikanın şəhər və rayonlarının beynəlxalq səviyyədə tanıdılması, daxili və xarici turizmin inkişafı istiqamətində müxtəlif layihələr reallaşdırılır. Azərbaycanın 2013-cü ilin "Xalq yaradıcılığı paytaxtları" Xaçmaz, Zaqatala və Göygöl olmuşdur.

AzərTAc

Azərbaycan.-2014.- 7 fevral.- S.6.