Londonda «Arşın mal alan» filmi
nümayiş etdirilmişdir
Londondakı "King`s College" Universitetində
fəaliyyət göstərən
Azərbaycan Cəmiyyətinin
təşkilatçılığı, Heydər Əliyev Fondunun, Azərbaycanın Böyük Britaniyadakı
səfirliyinin, Xaricdə
Təhsil Alan və Məzun Olmuş Gənclərin Beynəlxalq
Forumunun (ASAİF) və
Avropa Azərbaycan Cəmiyyətinin (AAC) dəstəyi
ilə "Arşın
mal alan" filmi nümayiş etdirilmişdir.
Azərbaycan Cəmiyyətinin sədri
Mərdan Həsənzadə
əvvəlcə film haqqında
məlumat vermişdir. Bildirilmişdir
ki, Azərbaycan kino sənətinin əfsanəsi olan "Arşın mal alan"
filmi 1945-ci ildə dahi bəstəkar Üzeyir Hacıbəylinin
eyniadlı operettası
əsasında ağ-qara
formatda çəkilmişdir.
Rza Təhmasib ve Nikolay Leşşenkonun
quruluş verdiyi ekran əsərində Rəşid Behbudov, Leyla Bədirbəyli, Münəvvər Kələntərli,
Lütfəli Abdullayev
kimi korifeyler rol almışlar.
"Arşın mal alan"
filmi Heydər Əliyev Fondunun təşəbbüsü və
dəstəyi ilə dünya kino sənayesinin əsas mərkəzi olan "Hollywood"da bərpa olunmuş və rəngli variantda hazırlanmışdır.
Universitetin tələbəsi Əmir
Quluzadə təmsil etdiyi Azərbaycan Cəmiyyətinin fəaliyyəti
haqqında məlumat vermiş, azərbaycanlı
tələbələr adından
qonaqları salamlamışdır.
Ekran əsərinin
nümayişindən əvvəl
Azərbaycanın son illərdəki
sürətli inkişafından
bəhs edən videoçarx nümayiş
etdirilmişdir.
Daha sonra tamaşaçılar
bərpa olunmuş və rəngli variantda hazırlanmış
"Arşın mal alan" filminə baxmışlar.
Film Böyük Britaniyada fəaliyyət göstərən
Azərbaycan təşkilatlarının
təmsilçiləri, səfirliyin
əməkdaşları, ictimaiyyətin
nümayəndələri ilə
yanaşı, müxtəlif
universitetlərdən tələbələrin
də daxil olduğu 250-yə yaxın
tamaşaçıda böyük
maraq doğurmuşdur.
Filmdən əvvəl ziyafət təşkil edilmiş, qonaqlar milli mətbəximizin ləziz
təamlarını dadmışlar.
Tədbirdə iştirakçılara Azərbaycanın
mədəniyyətindən, turizm potensialından və adət-ənənələrimizdən
bəhs edən jurnallar və bukletlər paylanmışdır.
Orxan İSMAYILOV,
AzərTAc-ın xüsusi müxbiri
London
Azərbaycan $g 2014.- 9 fevral.- S.8.