Gəncənin gözəlliyi UNESCO üzrə Türkiyə Milli

Komissiyasının işçi qrupunun üzvlərini heyran etmişdir

Azərbaycanda səfərdə olan UNESCO üzrə Türkiyə Milli Komissiyası işçi qrupunun üzvləri Zaqatala və Şəkidən sonra fevralın 7-də Gəncədə olmuşlar. AzərTAc xəbər verir ki, UNESCO üzrə Azərbaycan və Türkiyə Milli komissiyalarının birgə həyata keçirdikləri "Türkiyə və Azərbaycanın ənənəvi əl işləri" layihəsi çərçivəsində Gəncəyə səfər edən qonaqlar bu qədim şəhərin gözəlliyinə heyranlıqla tamaşa etmişlər.

Ailə, Qadın və Uşaq Problemləri üzrə Dövlət Komitəsi (AQUPDK) və UNESCO üzrə Azərbaycan Respublikasının Milli Komissiyasının birgə təşkilatçılığı ilə həyata keçirilən səfər çərçivəsində "Qızıl əllər" MMC-də olan türkiyəli qonaqlar burada biçmə-tikmə, rəssamlıq nümunələrinə baxmış, rəqs qrupunun çıxışlarını izləmişlər.

Sonra şəhər rəsm qalereyasında olan qonaqlar burada dekorativ sənət nümunələrinə, ustaların əl işlərinə baxmışlar. Dahi Azərbaycan şairi Nizami Gəncəvinin məqbərəsini ziyarət edən UNESCO üzrə Türkiyə Milli Komissiyasının işçi qrupunun üzvləri uşaq rəssamlıq məktəbində balacaların rəsm üzərində işləmə qabiliyyətlərinə heyranlıqla tamaşa etmişlər.

UNESCO üzrə Türkiyə Milli Komissiyasının üzvü, Hacettepe Universitetinin professoru Aylin Gorgün Baran AzərTAc-a bildirmişdir ki, biz Bakıda olarkən Azərbaycanın paytaxtından böyük zövq almışdıq. Lakin bölgələrə gələrkən gördük ki, təkcə paytaxt Bakıda deyil, Azərbaycanın bütün şəhər və rayonlarında böyük quruculuq və abadlıq işləri aparılır. Xüsusilə Gəncə bizi heyran etdi. Dahi Azərbaycan şairi Nizami Gəncəvinin məqbərəsi və onun ətrafında görülən işlərin miqyasını sözlə ifadə etmək mümkün deyil. Əl sənəti nümunələrinə gəldikdə isə, Azərbaycanda bu sahədə böyük potensial vardır və biz çalışacağıq ki, bu potensialı bütün dünyada təbliğ edək.

Azərbaycan.-2014.- 8 fevral.- S.5.