Möhtəşəm quruculuq ünvanı

Ötən ilin yekunları Nərimanov rayonunda inkişafın davamlı olmasından xəbər verir

Müəyyənləşdirilmiş sosial-iqtisadi vəzifələrin icra edilməsi, nəzərdə tutulmuş proqram və layihələrin reallaşması, ictimai-siyasi sabitliyin təmin olunması baxımından yola saldığımız 2013-cü il Azərbaycanda növbəti uğurlu dövr kimi tarixə düşdü. Prezident İlham Əliyevin ulu öndər Heydər Əliyev dühasından qaynaqlanan, elmi əsaslara və liberal iqtisadiyyat prinsiplərinə söykənən, insan amilini əsas götürən siyasi kursunun nəticəsində ötən il respublikamızın inkişafının davamlılığı təmin edildi, beynəlxalq iqtisadi mühitdə hələ də müşahidə olunan müəyyən kataklizmlərə rəğmən yeni uğurlar əldə olundu.

2013-cü ildə ölkəmizin dinamik inkişafı təmin edildi

Azərbaycan iqtisadiyyatının yüksəlişi güclü iqtisadi potensialın, neft gəlirlərindən səmərəli istifadə olunmasının, aparılan ünvanlı və düşünülmüş islahatların nəticəsinin bariz nümunəsidir. Bu il yanvarın 9-da keçirilən Nazirlər Kabinetinin 2013-cü ilin sosial-iqtisadi inkişafının yekunlarına və 2014-cü ildə qarşıda duran vəzifələrə həsr olunmuş iclasında Prezident İlham Əliyevin giriş və yekun nitqlərində respublikamızdakı iqtisadi və siyasi vəziyyət dərindən təhlil edildi, uğurlar qiymətləndirildi, qarşıda duran vəzifələr və həlli yolları dəqiq müəyyən olundu. Dövlət başçısının qeyd etdiyi kimi, ötən il qarşıya qoyulmuş iqtisadi və sosial məsələlər həllini tapıb, ölkəmizin uğurlu inkişafı davam edib: "2013-cü ildə ölkəmizin dinamik inkişafı təmin edilmişdir. Azərbaycanda böyük layihələr icra edilmişdir, ölkəmizin beynəlxalq nüfuzu artmışdır. Ölkədə aparılan islahatlar daha da dərinləşmişdir. Bir sözlə, biz ölkəmizin uğurlu inkişafını təmin edə bildik".

Əvvəlki illərdə olduğu kimi, 2013-cü ildə də makroiqtisadi sabitlik qorunub saxlandı, iqtisadiyyatın şaxələndirilməsi, qeyri-neft sektorunun və regionların inkişafı davam etdi, sahibkarlığa dövlət dəstəyi gücləndirildi, özəl bölmənin inkişafı üçün azad rəqabət və münbit investisiya mühiti təmin olundu, əhalinin sosial rifahı daha da yaxşılaşdı. Ötən il ən mühüm makroiqtisadi göstərici olan ümumi daxili məhsulun 6 faiz, qeyri-neft sektorunun isə 10 faiz artması ölkə iqtisadiyyatının şaxələndirilməsi ilə bağlı qarşıya qoyulmuş vəzifələrin icra olunduğunu göstərir. İl ərzində ölkə iqtisadiyyatına 28 milyard dollar investisiya qoyulub, valyuta ehtiyatlarımız isə ümumi daxili məhsulun 70 faizini təşkil edərək 50 milyard dollar səviyyəsinə çatıb.

Bakının gözəlləşən və müasirləşən siması Nərimanov

rayonunun hər yerində hiss olunur

Azərbaycanın coşğun inkişafının, sürətli yüksəlişinin, gündən-günə dəyişərək gözəlləşən simasının konkret ünvanlarından biri də hər zaman yüksək tərəqqi tempi ilə seçilən Nərimanov rayonudur. Respublikamızda aparılan uğurlu sosial-iqtisadi siyasət nəticəsində indiyədək Bakı şəhərinin aparıcı rayonlarından olan rayonun rayonunun da hərtərəfli inkişafı üçün böyük işlər görülüb və bu işlər hazırda yüksək əzmlə davam etdirilir.

Ümumiyyətlə, son illərin real mənzərəsi Nərimanov rayonunun əsl tikinti meydanına çevrildiyini göstərir. Burada vüsət alan quruculuq işləri paytaxtda Nərimanovun qüruru olduğu qədər ölkəmizdən kənarda Azərbaycanın gözəl tanıtımıdır. Ölkə Prezidentinin birbaşa təşəbbüsü və himayəsi sayəsində son illərdə Nərimanov rayonunda mühüm infrastruktur layihələri həyata keçirilib, möhtəşəm binaların tikintisinin təməli qoyulub və uğurla başa çatdırılıb. İstifadəyə verilən və yenidən qurulan səhiyyə və təhsil müəssisələri, yollar, yol ötürücüləri və yol qovşaqları, idman qurğuları, piyada keçidlər, parklar, inzibati binalar, bərpa olunan tarixi memarlıq abidələri rayonun simasını başdan-ayağa dəyişib. Özünün füsunkar gözəlliyi ilə, dünyadakı möhtəşəm memarlıq əsərləri ilə bir sırada dayanan Heydər Əliyev Mərkəzi isə rayon sakinlərinin fəxr yeridir. Heydər Əliyev Mərkəzi istifadəyə verildikdən sonra beynəlxalq tədbirlər məkanına çevrilib.

Nərimanov rayonunda quruculuq və abadlıq işləri ötən il də yüksək dinamizmlə davam etdirilib. Prezident İlham Əliyev 2013-cü ildə 6 dəfə Nərimanov rayonunda olub, obyektlərin açılış və təməlqoyma mərasimlərində iştirak edib, əsaslı təmir və yenidənqurma işlərindən sonra yaradılan şəraitlə, habelə inşası davam edən obyektlərdə işlərin gedişatı ilə tanış olub. Dövlət başçısı ötən ilin yanvarında "Bakıelektrikşəbəkə" ASC-nin rayondakı yarımstansiyanın, mart ayında isə Rəssamlıq Akademiyasının yeni korpusunun açılış mərasimlərində iştirak edib, 20 may və 22 oktyabr 2013-cü il tarixlərdə Dədə Qorqud parkında həyata keçirilən işlərlə tanış olub. Sentyabr ayında Prezident "Qələbə meydanı"nda müxtəlif səviyyəli tunel tipli yol qovşağı layihəsi çərçivəsində inşa edilən beş tunelin, dekabrda isə "Kitabi-Dədə Qorqud" abidəsinin və yeni salınan Dədə Qorqud parkının açılış mərasimində iştirak edib. Bu il yanvarın 7-də ölkə başçısı respublikanın ən iri səhiyyə müəssisəsi olan Bakı Sağlamlıq Mərkəzinin açılışında iştirak edərək xeyir-duasını verib.

İl ərzində "Gənclik" metrosunun ətrafında yerləşən binaların fasadlarının milli memarlıq üslubunda yenidən qurulması, Vaqif prospektinin genişləndirilməsi, Z.Bünyadov prospektinin yenidənqurulması, şəhərin baş planına uyğun digər layihələrin həyata keçirilməsi işləri davam etdirilib. Heydər Əliyev prospektində, K.Rəhimov, Ə.Əbdürrəhimov, akademik H.Əliyev küçələrində istismar müddətini keçmiş, yararsız hala düşmüş və şəhərin ümumi görkəminə xələl gətirən yaşayış binalarının, qeyri-yaşayış obyektlərinin sökülərək başqa ərazilərə köçürülməsi istiqamətində işlər aparılıb. Qeyd olunan binalarda yaşayan sakinlər üçün hazırda K.Rəhimov küçəsində 126 mənzilli, 7 mərtəbəli yaşayış binasının və Heydər Əliyev prospektində 167 mənzilli 7 mərtəbəli yaşayış binasının tikintisi davam etdirilir və yaxın müddətdə sakinlərin istifadəsinə veriləcək.

Heydər Əliyev prospektinin yenidən qurulması ilə əlaqədar istismar müddətini keçmiş 8 yaşayış binasının yerində müasir, milli memarlıq üslubunda 4 ədəd yeni yaşayış binası tikiləcək. Həmin binalarda yaşayan 320 nəfər sakin əvvəlcədən kirayə haqqı ödənilməklə köçürülüb. Artıq söküntü işləri başa çatdırılıb və tikinti işlərinə başlanıb. Tikinti işləri tam başa çatdırıldıqdan sonra sakinlərin əvvəlki mənzillərinin sahəsindən 30-40 faiz artıq olmaqla tam təmirli, geniş və yaraşıqlı mənzillər onların istifadəsinə veriləcək.

K.Rəhimov küçəsində sökülmüş 7 ədəd yaşayış binasının yerində rayon sakinlərinin mənalı istirahət yerinə çevriləcək müasir parkın salınması davam etdirilir. Artıq parkın birinci hissəsində işlər başa çatdırılıb. Füsunkar gözəlliyi ilə seçilən, Avropa istehsalı olan tikinti materiallarından istifadə edilməklə salınmış parkın birinci hissəsi sakinlərin istifadəsinə verilib. Parkın ikinci hissəsinin 2 mərtəbəli avtomobil dayanacağı ilə birlikdə yaxın gələcəkdə istifadəyə verilməsi nəzərdə tutulur. Bu işlərin başa çatdırılmasından sonra Nərimanov rayonunun siması daha da gözəlləşəcək, sakinlərin yaşayışı və mənalı istirahəti üçün geniş imkanlar yaranacaq.

Sosial-iqtisadi yüksəliş artan templə davam edib

Hər bir ölkənin, şəhərin, qəsəbənin inkişafı makroiqtisadi göstəricilərdən daha aydın görünür. Nərimanov rayonunun sosial-iqtisadi həyatındakı sürətli inkişaf 2013-cü ildə də saxlanılıb, yeni nailiyyətlər qazanılıb. Statistik rəqəmlər də 2013-cü ildə Nərimanov rayonunda nəzərəçarpacaq müsbət dəyişikliklərin baş verdiyini təsdiq edir. Ötən ilin yekunlarına əsasən rayonda iqtisadiyyatın əsasını təşkil edən sənayenin dinamik inkişafı davam etdirilib. Bu müddət ərzində xidmətlər də daxil olmaqla 1 milyard 951,9 milyon manatlıq məhsul istehsal olunub, 2012-ci ilə nisbətən 100,6 faiz artım surəti əldə edilib. Belə ki, 2013-cü ildə Nərimanov rayonunda

- istehlakçılara 1 milyard 965,3 milyon manatlıq və ya bütün sənaye məhsulunun 104,4 faizi qədər sənaye məhsulu göndərilib;

- sənaye kompleksində işləyənlərin sayı 565 nəfər artaraq 9972 nəfər təşkil edib, onların orta nominal əməkhaqqı 7,4 faiz artaraq 455,8 manata çatıb;

- yeni müəssisələrin yaradılması, mövcud müəssisələrin fəaliyyətinin bərpa edilməsi nəticəsində 2911 daimi iş yeri açılıb;

- bütün mənbələr hesabına əsas kapitala 539,3 milyon manatlıq investisiya qoyulub ki, bu da 2012-ci ilə nisbətən 154,3 faiz təşkil edir;

- ticarət üzrə pərakəndə əmtəə dövriyyəsinin həcmi 945,3 milyon manat olmaqla 9,4 faiz, əhaliyə göstərilən ictimai iaşə xidmətinin həcmi 78,8 milyon manat olmaqla 41,1 faiz artıb;

- əhaliyə 84,6 milyon manatlıq nəqliyyat, 312,6 milyon manatlıq rabitə xidmətləri göstərilib ki, bu da əvvəlki dövrə müvafiq olaraq 40 faiz və 17,5 dəfə artım deməkdir;

- rabitə xidmətlərinin həcminin 17,5 dəfə artması ilə yanaşı işçilərin sayı təxminən 2 dəfə və ya 935 nəfər artaraq 1834 nəfər təşkil edib, onların orta aylıq əməkhaqqı 3,3 dəfə artaraq 1112,2 manata çatıb.

Bakı şəhəri sakinlərinin kənd təsərrüfatı məhsullarına olan tələbatının tam və dolğun ödənilməsi, bazar qiymətlərinin süni surətdə qalxmasının qarşısının alınması ilə əlaqədar olaraq Nərimanov rayonunda 2006-cı ilin 17 iyulundan başlayaraq hər həftənin şənbə və bazar günləri kənd təsərrüfatı məhsullarının satış yarmarkaları təşkil olunur. Ötən il belə yarmarkaların təşkili davam edib və rayon sakinlərinə 4,5 min tona yaxın kənd təsərrüfatı məhsulları satılıb. Rayon sakinləri tərəfindən böyük razılıqla qarşılanan bu mühüm tədbirin gələcəkdə daha da inkişaf etdirilməsi üçün müvafiq işlər görülür.

Uğurlu lobbiçilik missiyası

Nərimanov rayonu ilə Rusiya Federasiyasının Həştərxan və Volqoqrad vilayətləri arasında xeyli müddətdir iqtisadi-siyasi və mədəni sahədə dostluq və əməkdaşlıq əlaqələri mövcuddur. 2010-cu ildən başlayaraq indiyədək Prezident İlham Əliyevin göstəriş və tapşırığı ilə bu əməkdaşlığın qurulması və genişləndirilməsi istiqamətdə mühüm layihələr həyata keçirilib.

Rusiyanın bu vilayətləri ilə dostluq və əməkdaşlıq əlaqələrinin bariz nümunələri kimi Həştərxan vilayətinin mərkəzində yerləşən 3,5 hektar ərazisi olan parkda nümunəvi abadlıq işləri aparılaraq ümummilli lider Heydər Əliyevin əzəmətli abidəsi ucaldılıb, Bakı küçəsində yerləşən 11 nömrəli orta məktəbə ulu öndər Heydər Əliyevin adı verilib. Heydər Əliyev Fondunun təşəbbüsü və dəstəyi ilə həmin məktəbin əsas korpusu genişmiqyaslı rekonstruksiya olunub, müasir standartlara uyğun iki yeni korpus inşa edilib və şagirdlərin təhsilinin lazımi səviyyədə təşkili üçün bütün şərait yaradılıb, mebel və texniki avadanlıqlarla təchiz edilib.

Həyata keçirilən layihələrin davamı olaraq, 2012-ci il sentyabrın 12-də Həştərxan şəhərində Heydər Əliyev Fondunun dəstəyi ilə inşa olunmuş Azərbaycan və Rusiya Dostluq körpüsünün və Heydər Əliyev parkında yaradılmış "Arzu" uşaq əyləncə şəhərciyinin açılışı, həmçinin Heydər Əliyev Fondunun növbəti layihələrindən biri olan Müqəddəs Knyaz Vladimirin məbədi önündə knyaz Vladimirin abidəsinin təməlqoyma mərasimləri keçirilib.

Qarşılıqlı əməkdaşlığın bariz nümunəsi kimi, 2012-ci il dekabrın 19-da Nərimanov rayonunun ərazisində yeni salınmış parkda Rusiya Federasiyasının Həştərxan vilayətinin qubernatoru Aleksandr Jilkinin başçılıq etdiyi nümayəndə heyətinin iştirakı ilə "Bakı və Həştərxan dostluğu" abidəsinin təməlqoyma mərasimi keçirilib.

Ötən il dekabrın 20-də Heydər Əliyev Fondunun vitse-prezidenti Leyla Əliyevanın iştirakı ilə Müqəddəs Vladimir məbədinin önündəki meydanda Knyaz Vladimirin abidəsinin və abidənin yerləşdiyi ərazidə salınmış parkın təntənəli açılış mərasimi keçirilib. Bundan başqa, həmin gün Heydər Əliyev Fondunun təşəbbüsü ilə Rusiyanın Həştərxan şəhərində tikilmiş "Meçta" uşaq kafesinin açılışı olub, həmçinin Həştərxan şəhərinin Bakinskaya küçəsində Heydər Əliyev Fondunun dəstəyi ilə tikiləcək yeni uşaq bağçasının təməli qoyulub.

Rusiyada bu layihələrin reallaşdırılmasında yaxından iştirak edən Nərimanov rayonu bununla həm də Azərbaycanın lobbiçiliyini uğurla həyata keçirir. Fərəhləndirici haldır ki, Rusiya Federasiyasının Həştərxan vilayətində görülən böyük işlərdə göstərdiyi səy və fəallığa görə Nərimanov RİH-nin başçısı Abdin Fərzəliyev Rusiya Prezidenti Vladimir Putinin imzaladığı sərəncamla "Dostluq" ordeni ilə təltif olunub. Bu orden Abdin Fərzəliyevin timsalında Nərimanov rayonuna verilən yüksək mükafatdır. Ən əsası, bu nailiyyət Prezident İlham Əliyevin xüsusi diqqət və qayğısının - "əsl siyasət real iş və konkret fəaliyyətdən ibarətdir" məramının məntiqi nəticəsidir. Nərimanov rayonunun ictimaiyyəti yaxşı bilir ki, rayonun əldə etdiyi hər bir uğurun əsl müəllifi Prezident İlham Əliyevdir.

Vətəndaşların problem və təklifləri daim diqqət mərkəzindədir

Əhalinin problem və təkliflərinin öyrənilməsi məqsədilə vətəndaşlarla birbaşa ünsiyyət vasitəsi kimi yerlərdə qəbulların müstəsna əhəmiyyəti var. Bunu nəzərə alaraq, Nərimanov rayon rəhbərliyi tərəfindən 2013-cü ildə 25 səyyar qəbul və görüş keçirilib. Qəbullar müəssisə və təşkilatlarda, məcburi köçkünlərin məskunlaşdığı yataqxanalarda, inzibati və inşası yarımçıq qalmış binalarda, habelə rayonun ayrı-ayrı yaşayış sahələrində, əhalinin mədəni-kütləvi tədbirlər otağında keçirilib və 1919 nəfər vətəndaş iştirak edib. Bu görüş və qəbullar zamanı edilən 203 müraciətdən 198-i (97,5 faizi) həll edilib, 5-i isə (2,5 faizi) nəzarətə götürülüb. Keçirilən səyyar görüş və qəbullarda qaldırılan məsələlər küçə və məhəllədaxili yolların təmiri, maddi yardım, dam örtüyünün təmiri, məhəllələrin abadlaşdırılması, işə düzəlmə, kommunal problemlər, təhsil, səhiyyə müəssisələrinin təmiri və tikintisi, mənzil şəraitinin yaxşılaşdırılması və sosialyönümlü məsələlərlə bağlı olub.

Nərimanov RİH-nin sənədlərlə və vətəndaşların müraciətləri ilə iş şöbəsinə daxil olan sənədlərin qeydiyyatı kompyuter vasitəsilə aparılır. Bu da vətəndaşlara operativ şəkildə izahatların verilməsi və sənədlərin icrasına vaxtında nəzarət üçün çox əlverişlidir. Həmçinin RİH başçısı aparatının internet səhifəsinə vətəndaşlar tərəfindən müraciətlərin sayı artıb. "Qaynar xətt-1643" xidməti isə 2013-cü ilin sentyabr ayının 15-dən fəaliyyətə başlayıb. Xidmətin əsas məqsəd və vəzifələri dövlət qurumlarına çıxışın asanlaşdırılması, vətəndaşların məmnunluğunun təmin edilməsi istiqamətində yeni yanaşmanın formalaşdırılması, əhaliyə göstərilən xidmət səviyyəsinin yüksəldilməsi, dövlət-vətəndaş, dövlət orqanı ilə cəmiyyət arasında münasibət və əlaqələrin keyfiyyətcə yeni müstəvidə inkişafı, dövlət orqanlarının fəaliyyətində şəffaflığın artırılması, ictimaiyyətin iştirakının genişləndirilməsi, minimum zaman kəsiyində vətəndaşların problem və şikayətlərinin daha çevik və operativ şəkildə həll olunması və sairdən ibarətdir. Sözügedən qısa vaxt ərzində artıq xidmətə 66 müraciət daxil olub. Onlardan 35-i tam həll edilib, digər müraciətlərlə bağlı isə vətəndaşlara müvafiq izahatlar verilib.

"Azərbaycan Respublikasının bəzi şəhər və rayonlarının inzibati ərazi bölgüsündə qismən dəyişikliklər edilməsi haqqında" qanuna və Nərimanov RİH başçısının 6 dekabr 2012-ci il tarixli sərəncamına əsasən rayon inzibati ərazi vahidi tərkibində 1, 2 və 3 nömrəli Sahə İnzibati Ərazi Dairələri üzrə nümayəndəliklər yaradılıb. Hər bir nümayəndəlik tərəfindən ərazi öyrənilir, məhəllə və bina kompleksləri, habelə orada yaşayan sakinlərlə tanışlıq mütəmadi şəkildə həyata keçirilir. Nümayəndəliklər tərəfindən vətəndaşları narahat edən problemlər qeydə alınır və müntəzəm olaraq həlli istiqamətində müvafiq tədbirlər görülür. İcra nümayəndəlikləri onların ərazilərində fəaliyyət göstərən MKİS-lərlə qarşılıqlı əməkdaşlıq əsasında küçə və məhəllədaxili ərazilərdə təmizlik və abadlıq işlərinin həyata keçirilməsi üçün lazımi işlər görürlər. Bundan əlavə, nümayəndəliklər tərəfindən ərazilərində qanunsuz tikintilərə və ticarətə qarşı mübarizə tədbirləri işlənib hazırlanıb. Azərbaycan dilinin normalarının pozulması hallarının qarşısını almaq məqsədilə nümayəndəliklər tərəfindən öz əraziləri üzrə daimi nəzarət və monitorinqlər həyata keçirilir. Cari ilin yanvar ayında hər üç nümayəndəliyin hesabat yığıncaqları keçirilib, sakinlərin təklif və rəyləri dinlənilib və nəzərə alınıb.

Əvvəlki seçkilərdə olduğu kimi, ötən il oktyabrın 9-da keçirilmiş prezident seçkilərində də Nərimanov rayonunun seçiciləri fəallığı və mütəşəkilliyi ilə seçiliblər. Rayon sakinləri həmin gün üzərinə düşən müqəddəs missiyanı şərəflə yerinə yetirərək tərəqqiyə və sivil dünyaya inteqrasiyanın tərəfdarı olduğunu təsdiqləyərək böyük səs çoxluğu ilə İlham Əliyevə səs veriblər.

Təbii ki, əldə olunan nailiyyətlərlə kifayətlənmək olmaz. Elə Nərimanov rayon rəhbərliyi də hesab edir ki, qazanılan uğurlar davamlı olmalıdır. Prezident İlham Əliyevin verdiyi göstəriş və tapşırıqları, çıxışlarında qarşıya qoyduğu vəzifələri rəhbər tutan Nərimanov rayonunun aidiyyəti orqanları 2014-cü ili də müvəffəqiyyətlə başa vuracaqlarına əmindirlər. Çünki bunun üçün hər bir imkan, o cümlədən möhkəm iradə və rayon ictimaiyyətinin daim yaxından hiss olunan dəstəyi var.

Rəşad CƏFƏRLİ,

Azərbaycan.-2014.- 12 fevral.- S.5.