«ASAN xidmət»in Avropa Parlamentində təqdimatı keçirilmişdir

Avropa Parlamentində "Azərbaycanda innovasiya və mobil kimlik: Avropaya rəqəmsal inteqrasiyanın yeni növü" mövzusunda konfrans keçirilmişdir. Tədbirdə Azərbaycanda elektron hökumət sahəsində həyata keçirilən islahatlarla bağlı məsələlər müzakirə edilmişdir.

Konfransda Avropa Komissiyasının və Avropa Parlamentinin üzvləri, Azərbaycanın və Estoniyanın hökumət və biznes nümayəndələri, informasiya texnologiyaları sahəsində fəaliyyət göstərən beynəlxalq şirkətlərin nümayəndələri iştirak etmişlər.

Konfransı giriş sözü ilə açan Avropa Parlamentinin Estoniyadan olan deputatı, Estoniyanın sabiq xarici işlər naziri xanım Kristina Oyuland Sovet İttifaqının dağılmasından sonra Estoniyada institusional sahədə islahatların yeni texnologiyalar üzərində aparılmasının faydalarını vurğulamış, "Skype"ın vətəni Estoniyada elektron xidmətlərin köhnə metodları üstələdiyini qeyd etmişdir. K.Oyulandın sözlərinə görə, ölkəsi Azərbaycanın da bənzər hədəflərə çatmasına yardım göstərsə də, sonradan "şagird müəllimini ötüb keçmişdir". O, Azərbaycanda çox qısa bir müddət ərzində böyük populyarlıq qazanmış "ASAN xidmət"in nailiyyətlərini alqışlamış və bunun tək vətəndaşlar üçün deyil, həm də hökumət üçün faydalı olduğunu söyləmişdir. Xanım Oyulandın sözlərinə görə, mülki xidmətlərdə bürokratik əngəllərin aradan qaldırılması hakimiyyət orqanlarına əlavə xərclərdən yan keçməyə imkan verir.

Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin sədri İnam Kərimov 2013-cü ildən etibarən "ASAN imza"nın istismara verilməsinin və təhlükəsizlik sisteminin yaradılmasının istifadəçilərə mobil telefonları vasitəsi ilə rəqəmsal uyğunluğu müəyyənləşdirməyə imkan yaratdığını bildirmişdir. O, "ASAN imza" layihəsinin Azərbaycan və Avropa İttifaqı arasında daha səmərəli əlaqələrin qurulmasına töhfə verəcəyini vurğulamışdır.

Sonra "ASAN xidmət"ə həsr olunmuş video-çarx nümayiş etdirilmişdir.

Azərbaycan Respublikası vergilər nazirinin müavini Sahib Ələkbərov isə çıxışında 2005-ci ildən etibarən elektron hökumətin yaradılmağa başlandığı barədə məlumat verərək uzun illər planlı təsərrüfat sistemində yaşamış Azərbaycanda əvvəllər vergi orqanlarının olmadığını, yalnız müstəqillik illərində əhalidə vergi mədəniyyətinin formalaşdırılması və vergi qanunvericiliyinin hazırlanması kimi işlərin görüldüyünü bildirmişdir. S.Ələkbərov konfrans iştirakçılarına Azərbaycanın vergi sistemi, bu sahədə aparılan islahatlar barədə məlumat verərək qeyd etmişdir ki, əvvəllər biznesin qeydiyyatı üçün təxminən 2 aya qədər vaxt tələb olunurdusa, son iki ildə proseslərin elektronlaşdırılması nəticəsində bu proses cəmi bir neçə dəqiqə ərzində başa çatdırılır: "Dünya Bankının son "Doing Business" hesabatına əsasən, bu gün Azərbaycan biznesin qeydiyyatı sahəsində ilk on dövlətin sırasında qərarlaşıb. 2013-cü ildən etibarən Azərbaycanda "ASAN imza" layihəsinin tətbiqinə başlanılması və təhlükəsizlik sisteminin yaradılması isə istifadəçilərə mobil telefonlar vasitəsi ilə rəqəmsal uyğunluğu müəyyənləşdirməyə imkan yaratmışdır. "ASAN imza" mobil-hökumət layihəsi çərçivəsində yeni nəsil elektron xidmətlərin tətbiqində inkişaf mərhələsinin başlanğıcı hesab edilir".

Çıxış edən Estoniyanın İqtisadi İşlər və Rabitə Nazirliyinin dövlət informasiya sistemləri və rabitə üzrə baş katibinin müavini Taavi Kotka Azərbaycanla rabitə və informasiya texnologiyaları sahəsində əməkdaşlıqdan məmnunluğunu bildirmişdir. Enerji sahəsində əməkdaşlığın qarşılıqlı maraq üzərində qurulduğunu qeyd edən T.Kotka bunun bütün sahələri əhatə etdiyini, yeni texnologiyaların və bu sahədə aparılan islahatların insanların həyatının rahatlaşdırılmasında, yeni iş yerləri, sərmayə sahələri, rəqəmsal bazarın yaradılmasında böyük rol oynadığını bildirmişdir.

Azərbaycan Respublikasının Rabitə və İnformasiya Texnologiyaları nazirinin müavini Elmir Vəlizadə də vətəndaşlara göstərilən xidmətlərdə İKT-dən istifadənin zəruriliyindən danışmış və Azərbaycandakı elektron xidmətlərin cari vəziyyəti ilə bağlı arayış vermişdir.

Avronest Parlament Assambleyasının həmsədri, bolqarıstanlı Yevgeni Kirilov və Avropa Parlamentində mühafizəkarlar və islahatçilar qrupunun başçısı Martin Kallanan konfransda çıxış edərək Azərbaycanda həyata keçirilən "Elektron hökumət" layihəsini yüksək qiymətləndirmiş, mövzu ilə bağlı fikirlərini bölüşmüşlər.

Daha sonra Azərbaycan Respublikası Vergilər Nazirliyi yanında ASAN Sertifikat Xidmətləri Mərkəzi və Estoniyanın Sertifikatlaşdırma Mərkəzi arasında anlaşma memorandumu imzalanmışdır. Memorandumu Azərbaycan tərəfdən vergilər nazirinin müavini Sahib Ələkbərov, Estoniya tərəfdən Sertifikat Mərkəzinin İdarə Heyətinin sədri Kalev Pihl imzalamışlar.

Sonra konfrans öz işini 2 paneldə davam etdirmişdir.

Müzakirələr panelinin 1-ci hissəsi "Mobil kimlik: insanların ölkələrarası əlaqələndirməsi. Estoniya və Azərbaycanın mobil kimlik sistemlərinin əməkdaşlığı" mövzusunda olmuşdur.

Azərbaycan Respublikası Vergilər Nazirliyinin Hüquq Baş İdarəsinin rəisi Samirə Musayeva "ASAN imza" layihəsi haqqında təqdimatla çıxış edərək mobil hökumətin elektron hökumət ideyasının növbəti mərhələsi olduğunu vurğulamışdır. S.Musayeva "ASAN imza"nın hansı zərurətdən doğduğu, vətəndaşlara hansı rahatlıqlar gətirdiyini faktlarla izah etmişdir. O, təmsil etdiyi nazirliyin "ASAN imza"nın öz xidmətlərinə necə inteqrasiya etdiyini və buna bağlı olan digər xidmətləri də təqdim etmişdir.

Elektron hökumətlə bağlı ikinci müzakirə panelində Rabitə və İnformasiya Texnologiyaları Nazirliyinin nümayəndəsi İsbəndiyar Əliyev "Elektron hökumət" layihəsinin həyata keçirilməsinin cari vəziyyəti ilə bağlı məlumat vermiş, "ASAN xidmət"in şöbə müdiri Azad Cəfərli isə təmsil etdiyi qurumun fəaliyyətinin insan hüquqları kontesktində təhlilini vermişdir. "Cybernetica"nı təmsil edən Arne Ansper ölkələrarası əməkdaşlıqdan, Vergilər Nazirliyinin baş idarə rəisi İlkin Vəliyev elektron vergi sistemlərində şəffaflıqdan, Avropa İnnovasiya və Texnologiya İnstitutunun idarə heyətinin üzvü Linnar Viik əməkdaşlığın gələcək perspektivlərindən danışmışlar.

Azərbaycan.-2014.- 21 fevral.- S.3.