Azərbaycan və Mərakeşi ortaq dəyərlər birləşdirir

Fevralın 21-də Milli Məclis Sədrinin birinci müavini Ziyafət Əsgərov Azərbaycanda səfərdə olan Mərakeş Parlamentinin Nümayəndələr Palatasının Xarici əlaqələr, milli müdafiə, islam məsələləri və xaricdə yaşayan mərakeşlilərlə iş üzrə komitəsinin sədri Ali Kəbiri ilə görüşüb.

Qonağı Azərbaycan parlamentində salamlamaqdan məmnunluğunu ifadə edən Ziyafət Əsgərov Azərbaycanın Mərakeşlə çox yüksək siyasi əlaqələrinin olduğunu bildirib. Qeyd edib ki, ölkə başçılarının və parlament nümayəndə heyətlərinin qarşılıqlı səfərləri bu əlaqələrin möhkəmlənməsində mühüm əhəmiyyət kəsb edir. Bugünə qədər Azərbaycan və Mərakeş hökumətləri arasında 12 sənəd imzalanıb, 12 sənəd isə layihə formasındadır, onların da imzalanması gözlənilir. Onun sözlərinə görə, Mərakeşlə bütün sahələrdəki münasibətlər yüksələn xətlə inkişaf etsə də, ticarət dövriyyəsinin həcmi o qədər də yüksək deyil: "Hesab edirəm ki, siyasi əlaqələrdən çıxış edərək iqtisadi əlaqələri daha da gücləndirmək lazımdır. Bunun üçün hər iki ölkənin böyük potensialı var".

Z.Əsgərov ölkələrimiz və xalqlarımız arasında olan dostluq münasibətlərindən danışaraq, burada parlamentlərarası qrupların da rolunu xüsusi qeyd edib. Bildirib ki, 2008-ci ildən bəri Mərakeşdə bir neçə dəfə Azərbaycan Mədəniyyəti günləri keçirilib. Eləcə də Azərbaycanda Mərakeş Mədəniyyəti günləri təşkil olunub. Bu onu deməyə əsas verir ki, hər iki ölkəni birləşdirən siyasi, humanitar sahələrlə yanaşı, mədəni dəyərlər də mövcuddur.

Görüşdə bildirilib ki, Mərakeş hər zaman beynəlxalq təşkilatlarda Azərbaycanın mövqeyini dəstəkləyir. Həmçinin Azərbaycan da dost ölkəyə eyni münasibəti bəsləyir.

Ermənistan-Azərbaycan, Dağlıq Qarabağ münaqişəsindən danışan Z.Əsgərov vurğulayıb ki, bununla bağlı BMT, Avropa Birliyi, İslam Konfransı Təşkilatının və Avropa Şurasının çoxsaylı qətnamələri var. Təəssüf ki, Ermənistanın böyük sayğısızlığı nəticəsində bu qətnamələrin heç biri yerinə yetirilməyib. Daha sonra 1992-ci il fevral ayının 26-da Dağlıq Qarabağ bölgəsinin Xocalı şəhərində ermənilərin və onların havadarlarının törətdikləri soyqırımını xatırladan Z.Əsgərov bir gecədə 613 sakinin amansızcasına qətlə yetirildiyini deyib. Təəssüf ki, bəzi dövlətlər və beynəlxalq təşkilatlar bu soyqırımına hələ də göz yumur. Z.Əsgərov əminliyini bildirib ki, Mərakeş parlamentində də bu istiqamətdə işlər gedəcək və Xocalı soyqırımını tanıyan sənəd qəbul ediləcək.

Ali Kəbiri də Azərbaycan-Mərakeş əlaqələrini, xalqlararası dostluq münasibətlərini yüksək qiymətləndirib. Bildirib ki, Mərakeş hər zaman Azərbaycanın haqq səsinə səs verəcək və həyata keçirdiyi bütün strateji layihələrə dəstək olacaq. O, bundan sonra da bütün sahələrdəki əlaqələrin daha da inkişaf edəcəyinə əminliyini bildirib.

Görüşdə qarşılıqlı maraq doğuran digər məsələlər ətrafında da müzakirələr aparılıb.

Elgün MƏNSİMOV,

Azərbaycan.-2014.- 22 fevral.- S.1.