İstanbulda «Qara dəniz bölgəsində etimad mühitinin və mədəniyyətlərarası dialoqun gücləndirilməsi» mövzusunda Beynəlxalq Gənclər Forumu keçirilir

Azərbaycan-Amerika Gəncləri İctimai Birliyinin (AAGİB) təşkilatçılığı ilə fevralın 20-də Türkiyənin İstanbul şəhərində "Qara dəniz bölgəsində etimad mühitinin və mədəniyyətlərarası dialoqun gücləndirilməsi" mövzusunda Beynəlxalq Gənclər Forumu öz işinə başlamışdır.

İctimai Birlikdən verilən məlumata görə, forumda əvvəlcə Xocalı faciəsi qurbanlarının xatirəsi bir dəqiqəlik sükutla yad edilmişdir.

AAGİB-in sədri və Qara Dəniz Ölkələri Gənc Liderlər Forumunun əlaqələndiricisi Vüqar Əhmədov görüşün əməkdaşlığın möhkəmləndirilməsi baxımından əhəmiyyətindən danışmışdır. Sonra forum çərçivəsində "Qara dəniz bölgəsində münaqişələrin həlli və etimad mühitinin gücləndirilməsində vətəndaş cəmiyyətinin rolu" mövzusunda plenar sessiya keçirilmişdir. Sessiyanın məruzəçisi Milli Məclisin deputatı Asim Mollazadə "Qara dəniz bölgəsində mövcud münaqişələr və onların həllində regional tərəfdaşlığın yolu" adlı məruzə ilə çıxış etmişdir.

Sessiya çərçivəsində keçirilən müzakirələrdə "Xocalıya ədalət" beynəlxalq kampaniyanın təqdimatı da keçirilmişdir. Kampaniyanın təmsilçisi Sevinc İskəndərova forum iştirakçılarını Xocalı soyqırımı və "Xocalıya ədalət" çərçivəsində keçirilən tədbirlər haqqında məlumatlandırılmışdır.

Forum işçi qruplarda gənclər təşkilatlarının əməkdaşlıq perspektivlərinə dair müzakirələrlə davam etmişdir. Əsas müzakirə mövzuları Qara dəniz hövzəsi ölkələrində mövcud münaqişələr, sülhün möhkəmləndirilməsi, Azərbaycanda və Türkiyədə tolerantlığın səviyyəsi məsələləri olmuşdur.

Forum öz işini fevralın 22-dək davam etdirəcək və toplantıya qatılan gənc liderlər bölgədə sabitliyin, sülhün və iqtisadi əməkdaşlığın bərqərar olmasında vətəndaş cəmiyyətlərinin əməkdaşlıq perspektivləri ətrafında fikir mübadiləsi aparacaqlar.

AzərTAc

Azərbaycan.-2014.- 22 fevral.- S.10.