Xocalının işğalı zamanı
müharibə qaydaları kobud surətdə
pozulmuş və bütöv bir
şəhər Yer üzündən silinmişdir
Səfərbərlik və Hərbi Xidmətə Çağırış üzrə Dövlət Xidmətində Xocalı faciəsinin 22-ci ildönümü ilə əlaqədar anma mərasimi keçirilmişdir.
Xidmətin
ictimaiyyətlə əlaqələr şöbəsindən
AzərTAc-a bildirmişlər ki, əvvəlcə Xocalı
soyqırımı qurbanlarının xatirəsi bir dəqiqəlik sükutla yad
edilmişdir.
Mərasimi açan Xidmət rəisinin müavini, polkovnik Zaur Abdullayev Xocalının işğalı zamanı hətta müharibə qaydalarının pozulduğunu, bütöv bir şəhərin Yer üzündən silindiyini vurğulamışdır. Qeyd etmişdir ki, bizim sıralarımızda xidmət edən döyüşlərin iştirakçısı olmuş zabitlərimiz daha yaxşı bilirlər ki, müharibənin öz qaydaları vardır və bu qaydalarda dinc əhaliyə, qadınlara, uşaqlara toxunmamaq əsas götürülür. Amma Xocalıda biz heç kimə fərq qoyulmadığının şahidi olduq. Xocalı faciəsi məhz buna görə insanlığa qarşı cinayətlərlə eyni sırada dayanır.
Xocalı faciəsinə hüquqi qiymət verilməsində ümummilli lider Heydər Əliyevin əvəzsiz rolu qeyd edilmiş, Heydər Əliyev Fondunun bu soyqırımı aktının dünyada tanıtdırılması istiqamətində gördüyü işlərdən söz açılmışdır. Bildirilmişdir ki, Heydər Əliyev Fondunun vitse-prezidenti Leyla Əliyevanın təşəbbüsü ilə həyata keçirilən "Xocalıya ədalət!" kampaniyası nəticəsini verir və artıq dünya Xocalı hadisələrini soyqırımı kimi tanıyır.
Daha sonra Azərbaycan Respublikasının Diasporla iş üzrə Dövlət Komitəsinin idarə rəisi Cavanşir Vəliyev çıxış edərək "Xocalıya ədalət!" beynəlxalq kampaniyası çərçivəsində diaspor təşkilatları tərəfindən aparılan işlərdən söz açmışdır.
Cavanşir Vəliyev kampaniyanın nəticəsi olaraq bir neçə ölkədə Xocalı soyqırımının tanındığını vurğulayaraq, bununla kifayətlənməli olmadığımızı demişdir. O, komitə tərəfindən Xocalı soyqırımının dünyaya çatdırılması ilə bağlı tədbirlərin yalnız fevralın 26-da deyil, il ərzində həyata keçirildiyini qeyd etmişdir.
Müstəqil tədqiqatçı Rövşən Məmmədov isə Xocalı faciəsinin tarixindən ətraflı söhbət açmışdır. O, həmçinin Heydər Əliyev İrsini Araşdırma Mərkəzinin nəşr etdiyi "Xocalı-1992" kitabını təqdim etmişdir.
"Türkiyə Universitetləri Məzunları" İctimai Birliyinin sədri Çingiz Bayramov Xocalı soyqırımının dünyada tanıtdırılmasında QHT-lərin, gənclərin, tələbələrin rolundan danışmışdır.
Daha sonra
"Türkiyə Universitetləri Məzunları" İctimai Birliyinin
Xocalı soyqırımına həsr etdiyi
sosial çarx nümayiş olunmuşdur.
Azərbaycan.-2014.- 27 fevral.- S.4.