Türkiyədə «Xocalı soyqırımı və Qarabağ problemi»

mövzusunda beynəlxalq konfrans keçirilmişdir

Azərbaycan Respublikasının Türkiyədəki səfirliyinin və Türkiyə Vəkillər Kollegiyasının birgə təşkilatçılığı ilə fevralın 25-də Türkiyədə Xocalı soyqırımının 22-ci ildönümünə həsr olunmuş "Xocalı soyqırımı və Qarabağ problemi" mövzusunda iki sessiyadan ibarət konfrans keçirilmişdir.

Səfirlikdən AzərTAc-a bildirmişlər ki, tədbir Xocalı soyqırımı ilə bağlı türk dilində hazırlanmış sənədli filmin nümayişi ilə başlanmışdır.

Azərbaycanın Türkiyədəki səfiri Faiq Bağırov, Türkiyə Vəkillər Kollegiyası idarə heyətinin üzvü İzzet Varan və Azərbaycan Milli Məclisinin Regional məsələlər komitəsinin sədri Arif Rəhimzadə çıxış etmiş, ermənilərin Xocalıda törətdikləri vəhşiliklərin dünya ictimaiyyətinə çatdırılmasının vacibliyindən danışmışlar.

Konfransın "Qarabağ problemi beynəlxalq hüquq prizmasında" mövzusunda olan birinci sessiyası Türkiyə Vəkillər Kollegiyası İnsan Hüquqları Mərkəzinin Elmi Şurasının üzvü Abullah Buksırın moderatorluğu ilə keçmişdir. Sessiyada Milli Məclisin deputatı Qənirə Paşayeva, tanınmış alim Ümit Özdağ, Qazi Universitetinin professoru Cəmaləddin Taşkıran və Giresun Universitetinin rektoru professor Aygün Attar çıxış etmişlər.

Türkiyə Vəkillər Kollegiyası İnsan Hüquqları Mərkəzinin Elmi Şurasının üzvü Əhməd Dəmirçinin moderatorluğu ilə keçən ikinci sessiya "Xocalı soyqırımı beynəlxalq hüquq prizmasında" mövzusuna həsr olunmuşdur. Bu hissədə Azərbaycan Respublikası Vəkillər Kollegiyası rəyasət heyətinin sədri Azər Tağıyev, "Xocalıya ədalət!" beynəlxalq kampaniyasının Türkiyə üzrə nümayəndəsi Gözge Kılıç Yaşın, Milli Məclisin deputatı Rüstəm Xəlilov və Cümhuriyyət Xalq Partiyasından olan sabiq millət vəkili Onur Öymen çıxış etmişlər.

Konfrans iştirakçılarına Xocalı soyqırımı ilə bağlı təbliğat materialları təqdim olunmuşdur.

Tədbirdə Türkiyədə fəaliyyət göstərən qeyri-hökumət təşkilatlarının rəhbərləri, müxtəlif siyasi partiyaların nümayəndələri, tanınmış ictimai-siyasi xadimlər, elm adamları, ekspertlər və kütləvi informasiya vasitələrinin əməkdaşları iştirak etmişlər.

Azərbaycan.-2014.- 27 fevral.- S.6.