Zaqatala turistləri heyran edir

Zaqatala turizmin müxtəlif növlərinin inkişafı üçün geniş potensiala malikdir. Rayonda inşa edilmiş beynəlxalq hava limanı turistlərin rahat gəlib-getməsini daha da asanlaşdırır.

Zaqatala qədim şəhər olduğuna görə burada müxtəlif dövrlərə aid çoxlu sayda tarixi və memarlıq abidələri var. Rayon ərazisindəki onlarla alban məbədi eramızın IV-V əsrlərinə aiddir. Zaqatalada 108 tarixi abidə qeydə alınıb. Bunlardan Alban kilsəsi (VII əsr), Cingözqala (XIV əsr), Pəri qalası (V əsr), eləcə də Mosul kəndindəki Minarəni, rayon mərkəzindəki Zaqatala qalaları, Katex kəndindəki şəlalə turistlərin diqqətini xüsusilə cəlb edir.

Son dövrlərdə Zaqatalada inşa edilmiş yeni hotellər turizmin təşviqinə böyük təsir göstərir. Hazırda rayonda qeydiyyatda olan 10 turizm obyektindən 6-sı Azərbaycan Respublikası Mədəniyyət və Turizm Nazirliyindən lisenziya alıb. Hotellər yerli və əcnəbi turistlərə müasir standartlara uyğun xidmət göstərir.

Ekoturizm üçün ideal şəraitə malik Zaqatala Dövlət Təbiət Qoruğu 1929-cu ildə yaradılıb. Cənubi Qafqazda yerli flora və faunanı qorumaq üçün qurulan ilk qoruqlardandır. Dəniz səviyyəsindən 600-3600 metr hündürlükdə yerləşir. Zaqatala Dövlət Təbiət Qoruğu digər təsnifatlar kimi ərazinin florasının da zəngin olmasında müstəsna əhəmiyyət kəsb edir. Bu ərazidə 1000-ə yaxın bitki növü yayılıb. Bu da Azərbaycan florasının 1/4 hissəsini təşkil edir. Qoruqdakı bitki növlərindən 12-si Azərbaycanın “Qırmızı Kitab”ına nadir bitki kimi daxildir. Burada xalq təsərrüfatı üçün əhəmiyyətli olan efir yağlı güllər (qızılgül), özünəməxsus efir tərkibli çay bitkisi, vitaminlə, boyaq, aşı maddələri ilə zəngin ağaclar və ot növləri bitir. Qoruq ərazisində müxtəlif qala və şəlalələr var. Turist cığırları boyunca piyada, yaxud at belində səyahətə çıxanda qoruqda yaşayan heyvanların və quşların “həyat tərzi”ni müşahidə etmək, foto-video çəkilişlər aparmaq olar. Bu marşrutlarda turistlərin dincəlməsi və çadırlarda gecələməsi üçün münasib yerlər, həmçinin şərait yaradılıb.

Zaqatalada Turizm İnformasiya Mərkəzi fəaliyyət göstərir. Bu mərkəzə müraciət edən turistlərə Zaqatalanın tarixi, görməli yerləri haqqında geniş məlumat verilir və onlara bukletlər təqdim olunur.

Rayonda turizm sahəsində sahibkarlığın inkişafına diqqət artırılıb. Avropa Şurası ilə Mədəniyyət və Turizm Nazirliyinin birgə layihəsi olan “Tarixi şəhərlərdə mədəni irsin bərpası” istiqamətində RİH rəhbərliyinin təşəbbüsü ilə Zaqatala şəhərinin “Meydan” adlanan ərazisində və tarixi küçələrdə tikinti, yenidənqurma, abadlıq işləri görülüb. Turizm obyektlərinin fəaliyyətində beynəlxalq təcrübədən istifadə etmək məqsədilə işçilərlə seminarlar keçirilib, bələdçi qrupları təşkil edilib. Mədəniyyət və Turizm şöbələrinin, o cümlədən Turizm İnformasiya mərkəzlərinin rəhbərləri üçün Bakı şəhərində “Regionlarda turizm məhsullarının hazırlanması perspektivləri” mövzusunda keçirilən təlimlərdə rayonumuzun təmsilçilərinin iştirakı da səmərəli olub.

Zaqatalada yaradılmış 4 turist marşrutu yerli və əcnəbi qonaqlara fəal xidmət göstərir. Bu marşrutlar vasitəsi ilə turistlər rayonun tarixi və istirahət yerləri haqqında geniş məlumat ala, həmin obyektlərin xidmətlərindən istifadə edə bilirlər.

Həyata keçirilən bir çox tədbirlərlə yanaşı Azərbaycan Turizm İnstitutu Almaniya Əməkdaşlıq Cəmiyyəti ilə birgə rayonda aşpazlar, mehmanxana işçiləri üçün treninqlər və müxtəlif maarifləndirici seminarlar təşkil edib. İştirakçılara sertifikatlar və müxtəlif əyani vasitələr verilib.

Zaqatalada atçılıq turizminin inkişaf etdirilməsi məqsədilə Əliabad qəsəbəsində torpaq sahəsi ayrılıb. Azərbaycanın UNESCO-nun təcili qorunmaya möhtac qeyri-maddi mədəni irs siyahısına salınmış çövkən oyunlarında Zaqatala komandası da iştirak edir. Tarix-mədəniyyət qoruğu ərazisində turistlərin atla gəzintisi təşkil olunur.

Dünya Bankının Regional İnkişaf Proqramı layihəsi çərçivəsində Zaqatala Regional və Turizmin İnkişaf Proqramı işlənib hazırlanaraq Mədəniyyət və Turizm Nazirliyinə təqdim edilib.

Bu il “Folklor turizmi - inkişaf və perspektivlər” mövzusunda Folklor İnstitutu ilə birgə “dəyirmi masa” keçirilməsi nəzərdə tutulub.

Gözəlliklər məskəni olan Zaqatalanın turizm imkanlarının təbliği istiqamətində işlərimizi daha yüksək səviyyədə qurmağa çalışır, inanırıq ki, bu tarixi və füsunkar yerləri görməyə can atanların sayı ildən-ilə daha da artacaq.

Zümrüd AĞAKİŞİYEVA,

Zaqatala Rayon

Mədəniyyət və Turizm

şöbəsinin müdiri

Azərbaycan.-2014.- 2 iyul.- S.10.