Tanınmış alim-publisistin həyat və yaradıcılıq yoluna işıq salan toplu

Tanınmış ədəbiyyatşünas alim və publisist, AMEA-nın Nizami adına Ədəbiyyat İnstitutunun Cənubi Azərbaycan şöbəsinin müdiri, filologiya elmləri doktoru, professor Teymur Əhmədovun həyat və yaradıcılığından bəhs edən biblioqrafik məlumat toplusu çapdan çıxmışdır.

Topludakı biblioqrafik göstəricilər T.Əhmədovun yarım əsrdən çox bir dövrdə - 1954-2011-ci illərdə dövri mətbuatda çap olunmuş 500-dən artıq məqaləsi, publisistik əsəri, kitab və monoqrafiyaları barədə məlumatları əhatə edir.

Topluda alimin ömür yoluna da güzgü tutulur. Məlum olur ki, T.Əhmədov 1954-cü ildə Azərbaycan Dövlət Universitetinin Filologiya fakültəsini, 1964-cü ildə Azərbaycan Elmlər Akademiyasının Nizami adına Ədəbiyyat İnstitutunun aspiranturasını bitirmişdir. Elmi fəaliyyəti əsasən Nəriman Nərimanovun yaradıcılığının araşdırılmasına həsr olunmuşdur. 1966-cı ildə bu mövzuda namizədlik, 1988-ci ildə isə doktorluq dissertasiyaları müdafiə etmişdir. "Sovet Ermənistanı" qəzetində başlamış jurnalistlik fəaliyyəti isə Azərbaycanın bir sıra nüfuzlu mətbuat orqanları ilə bağlıdır. 1995-ci ildən "Respublika" qəzetinin baş redaktorudur. 2007-ci ildə onun təşəbbüsü və redaktorluğu ilə "Füyuzat" jurnalı nəşrə başlamışdır.

"İlin nüfuzlu ziyalısı" fəxri adına, "Ustad", "Qızıl qələm", "Həsən bəy Zərdabi" adına yüksək media mükafatlarına layiq görülən T.Əhmədov Azərbaycan Prezidentinin sərəncamına əsasən "Tərəqqi" medalı ilə təltif edilmişdir. Rusiya Təbiət Elmləri Akademiyasının həqiqi üzvüdür. Ondan çox dissertasiyanın elmi rəhbəri olmuşdur.

Topluda T.Əhmədovun həyat və yaradıcılığı, elmi-publisistik fəaliyyəti haqqında qısa oçerklər də yer almışdır. Akademiklər Cəmil Quliyev, Məmməd Cəfər Cəfərov, Budaq Budaqov, Asəf Nadirov, Bəkir Nəbiyev, xalq yazıçısı Qılman İlkin, xalq şairləri Mirvarid Dilbazi, Nəriman Həsənzadə, Zəlimxan Yaqub, filologiya elmləri doktoru Yaşar Qarayev və başqaları onu həm insan və şəxsiyyət, həm də alim və publisist kimi xarakterizə etmişlər. Bu qeydlərin leytmotivini belə bir ümumi rəy təşkil edir: Teymur Əhmədov istər şəxsiyyət, istərsə də alim, redaktor və publisist kimi daim yüksəkdə dayanan, öz həyat mövqeyi və zəhmətsevərliyi ilə seçilən insandır.

Bir sözlə, biblioqrafik toplu tanınmış alim və publisistin keçdiyi zəngin həyat və yaradıcılıq yolu barədə oxucuda hərtərəfli təsəvvür yaradır.

Azərbaycan.-2014.- 9 iyul.- S.6.