Diplomatik təşkilatlarımız hücum strategiyasını davam etdirməlidir

Prezident İlham Əliyev diplomatlarla yanaşı,

tarixçilər qarşısında da çox mühüm vəzifələr qoydu

İyulun 7-də Bakıda Prezident İlham Əliyevin iştirakı ilə Azərbaycan Respublikasının diplomatik xidmət orqanları rəhbərlərinin beşinci müşavirəsi keçirildi.

Prezident İlham Əliyev müşavirədə çıxış edərək diplomatik nümayəndəliklərin rəhbərlərinə Azərbaycanın xarici siyasətinin gələcək istiqamətləri ilə bağlı ciddi tapşırıqlar verdi. Azərbaycanın xarici siyasəti ilə bağlı əsas məsələnin Ermənistan-Azərbaycan, Dağlıq Qarabağ münaqişəsinin həll edilməsi olduğunu söyləyən Prezident diqqətə çatdırdı ki, bu istiqamətdə heç bir nəticənin olmamasının başlıca səbəbi Ermənistanın qeyri-konstruktiv mövqeyidir və münaqişəni dondurulmuş vəziyyətdə saxlamaq cəhdləridir. Dövlət başçısı həmçinin Dağlıq Qarabağ münaqişəsi, o cümlədən İrəvan xanlığı ilə bağlı həqiqətlərin dünyaya çatdırılmasının ölkə diplomatiyasının əsas vəzifələrindən biri olduğunu vurğuladı.

Bu məsələ ilə bağlı münasibətini öyrəndiyimiz siyasətçilər də bildirirlər ki, dövlət başçısı diplomatlara ciddi tapşırıqlar verərək onların qarşısında çox mühüm vəzifələr qoydu.

Milli Məclisin deputatı, tarix elmləri doktoru, professor Musa Qasımlı deyir ki, cənab Prezident son müşavirədə ötən müddətdə keçilən yola yekun vurdu, mövcud vəziyyəti təhlil etdi, gələcək perspektivləri müəyyənləşdirdi. Dövlət başçısı bu nitqi ilə diplomatlar, tarixçilər qarşısında çox mühüm vəzifələr qoydu. Bu vəzifələr Azərbaycanın bütün diplomatiyasının, taktikasının yerinə yetirilməsinə yönəlmişdi. Deputat hesab edir ki, dövlət başçısının Azərbaycanın Dağlıq Qarabağ regionuna ermənilərin yerləşdirilməsi, Ermənistanın əsassız ərazi iddiaları, Azərbaycana qarşı başladığı hərbi təcavüzün nəticələri, Ermənistanı terrorçuların idarə etməsi və digər məsələlərlə bağlı həqiqətləri dünyaya çatdırmağı bir vəzifə kimi qarşıya qoyması çox əhəmiyyətlidir: "Cənab Prezidentin nitqində Azərbaycan ərazilərində 1918-ci ildə Ermənistan adlı dövlətin yaradılması və İrəvanın Azərbaycan tərəfindən ermənilərə paytaxt olaraq güzəştə gedilməsinə dair tarixi həqiqətləri sadə, anlaşıqlı dildə dünya ictimaiyyətinə çatdırılması xüsusi əhəmiyyət kəsb edən məsələdir. Dünya ictimaiyyəti bilməlidir ki, ermənilər bir ərazini işğal etdikdən sonra "böyük Ermənistan" yaratmaq məqsədilə daim işğallarını genişləndirmişlər. Bu həqiqətlərin çatdırılması ermənilərin yığcam yaşadığı ölkələrin ictimaiyyətinə də bir mesajdır. Bu o deməkdir ki, ermənilər harada yığcam yaşayırlarsa, həmin ölkələrin ərazi bütövlüyü təhdid altındadır".

M.Qasımlının sözlərinə görə, bu nitq diplomatiya sahəsində təhsil alan tələbə və magistrlər tərəfindən də ciddi şəkildə öyrənilməlidir.

Milli Məclisin Hüquq siyasəti və dövlət quruculuğu komitəsinin üzvü Çingiz Qənizadə də hesab edir ki, Prezident İlham Əliyevin diplomatlarla görüşü Azərbaycan dövlətinin məqsədyönlü və müstəqil siyasətinin prioritet istiqamətlərindən biridir. Bütün görüşlərdə dövlət başçısı diplomatik xidmət orqanları rəhbərləri qarşısında həqiqətləri söyləyir və onlardan tələb edir ki, bu həqiqətləri çalışdıqları ölkələrdə lazımi səviyyədə təqdim etsinlər. Dünya erməni xislətinin və əsl həqiqətin nədən ibarət olduğunu bilməlidir: "Prezident İlham Əliyev qətiyyətlə vurğuladı ki, bizim hədəfimiz inkişaf etmiş ölkəyə çevrilməyimizdir, ərazi bütövlüyümüzün bərpasıdır. Biz bu hədəfə doğru gedirik. Biz hər bir istiqamət üzrə hədəfə doğru gedirik. Çünki bizim bütün istiqamətlər üzrə düşünülmüş konseptual yanaşmaya söykənən siyasətimiz vardır. Bizim uğurlarımızın səbəbi bundan ibarətdir".

Ç.Qənizadənin sözlərinə görə, toplantıda xarici siyasətlə bağlı söylənən fikirlər onu deməyə əsas verir ki, son iki ildə Azərbaycan böyük uğurlara imza atmışdır. Son iki il ərzində ölkəmizin İsveçrə Konfederasiyasında, Avstraliya İttifaqında və Vyetnam Sosialist Respublikasında yeni səfirlikləri, Birləşmiş Ərəb Əmirliklərinin Dubay şəhərində baş konsulluğu, Kolumbiya və Uruqvayda isə təmsilçilik ofisləri açılmışdır. Hazırda Azərbaycanın xarici ölkələrdə 57 səfirliyi, 5 beynəlxalq təşkilat yanında daimi nümayəndəliyi, 9 baş konsulluğu, 7 təmsilçilik ofisi və 7 fəxri konsulluğu fəaliyyət göstərir: "Fikrimcə, Prezident İlham Əliyevin bir qayda olaraq diplomatik xidmət orqanları rəhbərləri ilə görüşlər keçirməsi bizim xarici siyasətimizdə yeni bir addımın atılması ilə bağlıdır. Dövlət başçısının diplomatlara verdiyi tapşırıq onların fəaliyyətində daha uğurlu bir dönüşün yaranmasına gətirib çıxaracaq".

Milli Məclisin deputatı Fərəc Quliyev isə deyir ki, diplomatik korpusun təlimat alması Azərbaycanın xarici siyasətinin müəyyənləşməsinə xidmət edən amildir. Bununla belə, Azərbaycan tərəfinin hücum diplomatiyasından istifadə etməsi də dəyişməz strategiya olmalıdır.

O dedi ki, Azərbaycan müharibədə ədalətli tərəfdir: "BMT-nin mövcud 4 qətnaməsi də ölkəmizin haqlı olduğunu bir daha sübut edir. Danılmaz faktdır ki, BMT neytral gücdür və bu qurum da açıq şəkildə öz münasibətini bildirib ki, Azərbaycan ərazisi işğal olunub və erməni silahlıları qeyd-şərtsiz həmin ərazilərdən çıxmalıdır. Biz də BMT-nin həmin qətnamələrinin qəbul edilməsi üçün ya hərbi, ya da dinc yolla mübarizə aparmalıyıq. Ona görə də diplomatik təşkilatlarımız hücum strategiyasını davam etdirməlidir".

F.Quliyev həmçinin bildirdi ki, Prezidentin İrəvanın tarixi Azərbaycan torpağı olması ilə bağlı faktların dünya ictimaiyyətinə çatdırılması ilə bağlı verdiyi tapşırıq da alqışlanmalıdır. Bu işdə diplomatların da üzərinə ciddi iş düşür. Diaspor təşkilatlarımız bu istiqamətdə fəaliyyətlərini daha da artırmalı, dövlət başçısının tapşırıqlarını layiqincə yerinə yetirməlidirlər. Deputat hesab edir ki, apardığı xarici siyasətlə dünyaya özünü tanıdan Azərbaycan dövləti gec-tez bu problemi də həll edəcəkdir.

Rəşad BAXŞƏLİYEV,

Azərbaycan.-2014.- 10 iyul.- S.2.