Qorxunun yox olduğu an

Elton İsgəndərov 19 yaşında bu məqama qovuşdu

Belə bir müdrik deyim var: cəsarət mənəvi dəyər, əxlaqi sərvətdir. Və bu sərvətə sahib olmaq, yiyələnmək üçün yaş həddi əsas şərt deyil. İgidlik insanın əzmindən, iradəsindən asılıdır. Sənin cəsarətin o vaxt tam üzə çıxır ki, öz içində qorxunun tamamilə məhv olduğu məqam başlayır... Deyirlər, qəhrəmanlıq da fitri istedaddır. Mərdlik, cəsarət, ölümün gözünə dik baxmaq istedadı. Bir də yüksəliş, ucalıq, müqəddəslik, ölümsüzlük istedadı. Cəmi 19 yaşında bu zirvəni fəth etmək o qədər də asan deyil. Bunun üçün bəlkə də çox şeylər tələb olunur. Ən başlıcası, vətən sevgisi, torpağa, el-obaya bağlılıq, anda sədaqət... Bəlkə də bütün bunlar 19 yaşın çərçivəsinə, o balaca boy-buxunun ölçüsünə-biçisinə sığmır. Sən demə, böyük qəhrəmanlıqlar, əlçatmaz qələbələr hər kəsin içindəki təpərlə, məğrurluqla ölçülür. Elton Xaləddin oğlu İsgəndərov da qəhrəmanlığı belə meyarlarla dəyərləndirir. Samuxun Əhmədbəyli kəndində doğulmuşdu. Orta məktəbi bitirəndən sonra hərbi xidmətə yollanmışdı. Hələ uşaqlıqdan cəldliyi, çevikliyi, cəsarəti ilə yaşıdlarından fərqlənirdi. Adicə uşaq oyunlarında da birinciliyə can atırdı. Təşkil etdiyi futbol komandasının kapitanı idi. Deyirlər ki, komandası uduzanda bir gün özünə gəlmirdi. Bir sözlə, qalibiyyətə meyilli idi...

Atası Xaləddin kişi oğlu haqqında danışanda nə qədər sarsılsa da, qürurunu, fəxarətini də gizlətmir: "Bir qədər inadkar idi. Orta məktəbi yüksək qiymətlərlə bitirsə də, təhsilini davam etdirməyə tələsmədi. Könüllü hərbi xidmətə yollandı. Cəmi bir ildə əsl qəhrəman ömrü yaşadı..."

Elton Milli Ordunun Sərhəd Xidmətində qulluq edirdi. Hərbi xidmətə başladığı ilk günlərdən nümunəvi davranışı ilə seçilirdi. Komandirləri ən çətin məqamlarda ona etimad göstərir, qabiliyyətinə inanırdılar. İnanırdılar ki, Elton başladığı işi yarımçıq qoymaz.

2009-cu il iyunun 18-də Cəlilabad rayonu istiqamətində sərhəd pozucuları ilə döyüşə başladı. "Meşə qardaşları" terror təşkilatı xeyli müddət idi ki, bu döyüşə hazırlaşırdı. Onların yeganə məqsədi dolayı yollarla sərhədlərimizi keçmək idi. Döyüşün ən ağır məqamında sərhəd pozucularından biri sərhədçilərimizin dayandıqları mövqeyə qumbara atır. Onda cəsur əsgər Elton İsgəndərov tərəddüd etmədən özünü həmin səmtə yetirir. Belə çətin döyüşdə 19 yaşlı əsgər həlak olsa da, ölümü ilə onlarla əsgər və zabitimizin həyatını xilas etdi. Bax əsl qəhrəmanlıq, ölçüyə-biçiyə gəlməyən igidlik belə olur. Onda Elton ölüm haqqında yox, bu torpağın yenilməzliyi, bütövlüyü barədə düşünürdü. Bir də düşünürdü ki, vətən mənə oğul deyibsə, sübut etməliyəm ki, göstərilən etimadda, etibarda yanılmayıblar.

Bir döyüş əməliyyatında da Elton İsgəndərov ölümlə üz-üzə qalmışdı. Amma cəsarətlə üç terrorçunu yaxalayıb zərərsizləşdirə bilmişdi. "Meşə qardaşları" ilə döyüş isə onun son əməliyyatı oldu. Terror təşkilatı yaraqlılarını təslim etmək üçün bütün gücünü-qüvvəsini sərf etdi. "Əgər bizim qəddimizi əyə bilmirlərsə, deməli, vətən güclüdür, ordu qüdrətlidir". 19 yaşlı əsgər bu amallarla yaşayırdı. Terror əməliyyatında həyatına son qoyulsa da, onun xidmətləri qədərincə qiymətləndirildi. 2009-cu il iyunun 29-da ona Azərbaycanın Milli Qəhrəmanı adı verildi. Bu yüksək adın şərəfi, ucalığı ona ölümündən sonra bir əbədi ömür başlatdı...

Eltonun təhsil aldığı kənd məktəbində maraqlı bir guşə yaradılıb - Xatirə guşəsi. Onun adı ilə bağlı xeyli sənəd, əşya toplanıb. Sonuncu dəfə geydiyi yaralı əsgər paltarı da bu guşədə saxlanılır.

Samuxun Əhmədbəyli kəndində gənclərdən ibarət bir futbol klubu var. Adına Eltonun komandası deyirlər. Hələ orta məktəbdə oxuyanda yaratmışdı bu komandanı. Bu gün də rayon birinciliyində onlar fərqlənirlər. Çalışırlar ki, qəhrəmanın adını futbol yarışlarında da ləyaqətlə qorusunlar.

Bu gün Eltonun həmkəndliləri onun adını uca tuturlar. Kənddə yeni doğulan onlarla uşağa Eltonun adı verilib. Kənd, el-oba yeni qəhrəmanını böyüdür, hər kəs bilir ki, hələ müharibə bitməyib. Nə qədər ki torpaqlarımız düşmən tapdağındadır, böyüyən yeni nəsil Eltonun varisi olacağına and içir...

Eltonun atası Xaləddin kişi övladına göstərilən ehtiramı, el-oba sevgisini yüksək dəyərləndirir: "Eltonun cəsarətinə, hünərinə bələd idim. Bilirdim ki, o, təkcə ailəmizin yox, öz xalqının təəssübkeşidir. Milli maraqlar olan yerdə onu susdurmaq mümkün deyildi..."

Samuxun Əhmədbəyli kəndində balaca qəbiristanlıqda uca, hündür görünən bir məzar daşı var. Milli Qəhrəman Elton Xaləddin oğlu İsgəndərov bu məzarda uyuyur. Nə yaxşı ki bu yerin-yurdun sakinləri onu tənhalıqdan qoruyur, tez-tez məzarına baş çəkirlər. Əlbəttə, bu, adi təsəlli deyil. Vətən, el-oba uğrunda 19 yaşında həyatı ilə vidalaşan bir gəncin gələcəyə boylanan heykəl harayıdır. Amma inanırıq ki, belə oğulların qisası yerdə qalmayacaq. Biz müharibə istəməsək də, təslimçiliklə də barışmaq fikrimiz yoxdur. Azərbaycan Prezidenti, Ali Baş Komandan İlham Əliyevin dediyi kimi: "Biz müharibə istəmirik. Biz çalışırıq ki, məsələ sülh yolu ilə həll edilsin. Ancaq görürük ki, 20 il ərzində bu məsələ öz həllini tapmır. Bu məsələni dondurulmuş vəziyyətdə saxlamaq istəyən qüvvələr, əfsuslar olsun ki, öz niyyətlərinə, öz məqsədlərinə nail olurlar. Biz isə bu vəziyyətlə barışmaq istəmirik və barışmayacağıq. Biz sülh istəyirik. Amma, eyni zamanda, biz torpaqlarımızı, haqq-ədalətin bərpasını istəyirik..."

Haqq-ədalətin bərpası, halal haqqımızın özümüzə qaytarılması asanlıqla başa gəlmir. Bunun üçün vətən dəyərli oğullarının canından, qanından keçir. Biz bu yolda hələ mücadiləni axıra qədər davam etdirəcəyik. O vaxta qədər ki, 19 yaşlı Milli Qəhrəman Elton İsgəndərovun böyük arzuları həqiqətə çevriləcək, vətən torpağı yağı tapdağından xilas olacaq...

Bəşir ŞƏRİFLİ,

Azərbaycan.-2014.- 17 iyul.- S.11.