Lənkəranın gülü rəng-rəng

Füsunkar, mənzərəli yerlər yaradanda Ulu Tanrı Lənkəranı da unutmayıb. Bir tərəfdən yaşıl meşə örtüklü silsilə Talış dağları, digər tərəfdən bol nemətli, mavi gözlü Xəzər onun hüsnünə xüsusi gözəllik verir. Bu yerlərin çayları, bulaqları, bərəkətli limon, naringi, portağal bağları, çay plantasiyaları da var.

Subtropik iqlimə malik olduğundan Lənkəranın qışı da mülayim keçir. Qışda yağan qar nadir hallarda bir-iki gün yerdə qalır. Qalan vaxtlarda cənub hərarətinə tab gətirə bilmir, tez bir zamanda əriyib gedir. Belə iqlim şəraitində bu qədim diyar ilin bütün fəsillərində güllü-çiçəkli olur. Elə buna görə də şairlər onun şəninə şeirlər yazıb, bəstəkarlar nəğmələr bəstələyiblər.

Gözəlliyi, gül-çiçəyi görmək, duymaq, ona qayğı göstərmək xoş əhval-ruhiyyənin əlamətidir. Müxtəlif nemətlər düzülmüş süfrədə gül olanda insanda xoş ovqat yaranır. Respublikamızda həyat səviyyəsi yaxşılaşdıqca zövqlər daha da yüksəlir. İnsanlar təbiətə, gözəlliyə daha həssas yanaşır. Hər kəs nemətlərin ən yaxşısına sahib olmağa can atır. Bugünün reallığı belədır. Lənkəranlılar da yaşadıqları məkanın qədrini bilərək onun həmişə səfalı, gözəl, güllü-çiçəkli olmasına çalışırlar. Cənub şəhərini gəzdikcə bunun bir daha şahidi olursan. Evlərin eyvanında irili-xırdalı dibçəklərdə, həyət-bacalarda, yol kənarlarında, park və xiyabanlarda, bir sözlə, hər tərəfdə müxtəlif növlü, müxtəlif rəngli gül-çiçək göz oxşayır. Onlar xüsusi qayğı ilə bəslənilir.

Təbiət vurğunu olan Nurəddini Lənkəranda, habelə respublikamızın digər bölgələrində "Kivi Nurəddin" ləqəbi ilə tanıyırlar. Nurəddin 15-20 il bundan əvvəl böyük zəhmət bahasına kivi bağı salıb. Həmin ləqəbi də buna görə qazanıb. O, hazırda müxtəlif gül-çiçəklər, dekorativ ağaclar yetişdirməklə məşğuldur. Lənkəran şəhərinə daxil olarkən şose yolunun sol tərəfində yaşıllıqlar qoynunda "Bitkilər aləmi" dükanı var. Buradakı müxtəlif gül-çiçək əraziyə xüsusi gözəllik verir. Cənub zonasına gələn qonaqlar maşını saxlayaraq əsrarəngiz gözəlliyi seyr edir, dibçək güllərindən alıb özləri ilə aparırlar.

Bakı istiqamətindən Lənkərana daxil olan hər kəsi sanki təbiət özü salamlayır: "Xoş gəlmişsiniz", - deyir. Xüsusilə şəhərin avtovağzal hissəsi görkəmini tamamilə dəyişib. Bura, demək olar, yenidən qurulub, küçələr asfaltlanıb. Ərazidə əkilən gül-çiçək görülən işləri tamamlayaraq insanda xoş əhval-ruhiyyə yaradır.

Təbiət bu diyardan doğrudan da gözəlliyi əsirgəməyib. Yerli sakinlər isə onu qorumaqla bərabər, həm də zənginləşdirirlər. Dövlət başçısı İlham Əliyev Lənkəranın sosial-iqtisadi inkişafı üçün ardıcıllıqla sərəncamlar imzalayır, vəsaitlər ayırır. Bunun nəticəsidir ki, "Cənub mirvarisi" adlanan bu məkan aydan-aya, ildən-ilə inkişaf edir, daha da abadlaşır.

Azərbaycanın Milli Qəhrəmanı Əsgər Əliyevin adını daşıyan park şəhərin mərkəzində yerləşir. Üç-dörd ay bundan əvvəl parkı görənlər indi buraya gələrkən onu az qala tanıya bilmirlər. Park başdan-başa yenidən qurulub. Piyadalar gəzən yerlərə tamet daşlar düzülüb, yeni işıqlandırma sistemi qurulub, oturacaqlar quraşdırılıb. Yeni salınan yaşıllıq, əkilən gül-çiçək, dekorativ ağaclar parkı daha cazibədar etmişdir.

İstirahət yerinin bir guşəsində Veteranlar klubu və çayxana yerləşir. Əmək və müharibə veteranlarının istirahəti üçün burada, demək olar ki, hər bir şərait var. İki nəfərin həvəslə nərd oynadığını görüb onlara xeyli tamaşa etdik. Fərhad Ağabəyov və Fərman Məmmədov 70 yaşı arxada qoysalar da, şux görünürlər. Yaxınlaşıb zəri nə üçün stəkanla atdıqlarını soruşduqda zarafatla biri digərinə işarə etdi: "Hərif zər tutur", - deyərək şuxluq yaratdı. Veteranlarla çay içə-içə söhbət edib gün-güzəranları ilə maraqlandıq. Hər birindən "Allah razı olsun" kəlməsini eşitdik. Dedilər ki, övladlarını böyüdüb boya-başa çatdırıblar, onlara təhsil veriblər, evləndiriblər. İndi imkan daxilində nəvələrinə nəvaziş göstərirlər. Bunlarla bərabər, ölkədə, o cümlədən Lənkəranda gedən inkişafdan, tərəqqidən razılıq edirlər. Ulu öndər Heydər Əliyevin işini uğurla davam etdirən Prezident İlham Əliyevin fəaliyyətni yüksək qiymətləndirirlər.

Heydər Əliyev Xatirə Parkı lənkəranlıların sevimli istirahət yeridir. Yeni tikilmiş, əsaslı təmir olunmuş ictimai binaların, yaşayış evlərinin əhatəsində yerləşən geniş park gül-çiçəyə qərq olunmuşdur. Bura al-əlvan rənglərdən toxunmuş xalını xatırladır. Axşam vaxtlarında park daha qələbəlik olur. Babalar, nənələr nəvələrini, ata və analar uşaqlarını götürüb bura gəlirlər.

Lənkərandakı ali və orta ixtisas məktəblərində təhsil alan tələbə gənclər buraya tez-tez gəlir, söhbət edir, arzularını bölüşürlər. Parkın ərazisində orijinal üslubda tikilmiş Gənclər Mərkəzi fəaliyyət göstərir. Mərkəz gənclərin intellekt səviyyəsinin, dünyagörüşünün formalaşmasında mühüm rol oynayır. Burada 10-na yaxın dərnək də təşkil olunub. Parkın ərazisində nişan, ad günü, digər müxtəlif tədbir və mərasimlər keçirilir. Bunun şahidi də olduq. Mərkəzin 3-cü mərtəbəsində yerləşən yay zalından gələn oynaq musiqi sədaları pərdə-pərdə ətrafa yayılırdı. Bundan parkda istirahət edənlərə də pay düşürdü.

Beləcə, Lənkəran şəhəri gül-çiçəyin içində inkişaf edir, daha da abadlaşır və gözəlləşir. Bunları gördükcə unudulmaz şairimiz Səməd Vurğunun dillər əzbəri olan "Azərbaycan" şeirindəki "Lənkəran gülü rəng-rəng..." misrasını xatırlayırsan.

Seyran CAVADOV,

Azərbaycan.-2014.- 20 iyul.- S.4.