Müasir KİV-də mənəvi məsuliyyət
"Balanslaşdırılmış proqram siyasəti, yüksək efir mədəniyyəti, ictimai maraqlara xidmət, maarifləndirmə, operativ, obyektiv, hərtərəfli məlumatlandırma teleradio yayım həyata keçirən qurumun müvəffəqiyyətinin əsas şərtidir"
Ramiz
MEHDİYEV,
Azərbaycan Respublikası Prezident
Administrasiyasının rəhbəri,
akademik
İnsanın fiziki sağlamlığı
təbiətdən asılı
olduğu kimi, əxlaqi-mənəvi dəyərləri
də cəmiyyətin
ümumi mənəvi
atmosferində bərqərar
olmuş mədəni-mənəvi
dəyərlərdən asılıdır. İnsanları doğru-düzgün yola çəkmək üçün
nəyin pis, nəyin yaxşı olduğunu əvvəlcədən
müəyyən etməliyik.
İnsani dəyərlərin formalaşmasında və
bu mühitin idarə olunmasında ayrı-ayrı ictimai xadimlərlə bərabər
KİV də böyük
rol oynayır.
Biz cəmiyyətdə baş verən hadisələr haqqında
məlumatları yerli
informasiya vasitələrindən
alırıq. Virtual mədəni-mənəvi
mühitdə insan üçün müəyyən
çeşidli lokal informasiyalar məkanı yaratmaqla KİV real informasiya
seçimi edir. Xarici ölkələrdə baş
verən hadisələr
nə qədər rəngarəng olsa da, bizi ilk növbədə
öz cəmiyyətimizdəki
hadisələr maraqlandırır.
Xarici musiqilər nə qədər xoş olsa da, bizim
mənəvi ehtiyaclarımızı
milli musiqi daha çox ödəyir və s. Əlbəttə, televiziya
və internetə qalsa, hamı kosmopolit olmalıdır.
Lakin milli-mənəvi zəmində
televiziya verilişlərinin
yerini internetlə və ya peyk
antenasının xidməti
ilə doldurmaq mümkün deyil. Bir sözlə, biz öz kütləvi informasiya vasitələrimizin yaratdığı
mühitlə qarşılıqlı
əlaqədəyik. Uşaqların da, gənc nəslin
də necə formalaşması xeyli dərəcədə bu mühitdən asılıdır.
Televiziya
verilişlərinin məzmunu
milli ideologiya süzgəcindən keçirilməzsə,
biz bu güclü amilin ancaq bazarın
təsiri ilə yönəldilməsinə rəvac
vermiş olarıq ki, bu da
arzuedilməzdir.
Akademik Ramiz Mehdiyevin "Azərbaycan"
qəzetində işıq
üzü görmüş
"Azərbaycanın efir
məkanı: Problemlər
və vəzifələr"
məqaləsi respublikamızın
efir məkanının
müasir problemlərini,
üstün və qüsurlu cəhətlərini
açıb göstərməklə
yanaşı, aktuallığı,
peşəkar və obyektiv yanaşma tərzi, analtik təhlili ilə cəmiyyətdə müsbət
rezonans doğurmuşdu. Telekanallardan
cəmiyyətə sırınan
mənəvi ucuzlaşmaya,
yeknəsəkliyə, milli
olmayan düşüncə
və həyat tərzinə əsl vətəndaş, ziyalı
və peşəkar filosof kimi münasibətini
ifadə edən akademik Ramiz Mehdiyev dərin araşdırma və təhlilə əsaslanan bu məqaləsində həm də yaranmış vəziyyətdən
çıxış yollarını
göstərmişdir.
Akademik Ramiz Mehdiyev Milli Televiziya və Radio Şurasının (MTRŞ) apardığı
həftəlik monitorinqin
nəticələrinə istinad
edərək telekanallarda
şou xarakterli verilişlərin faiz nisbəti ilə artdığını da qeyd etmişdir.
Müharibə şəraitində yaşayan,
torpaqlarının 20 faizi
işğal altında
olan, təxminən 1 milyon vətəndaşı
qaçqın və köçkün həyatı
yaşayan Azərbaycanda
hərbi vətənpərvərlik
verilişlərinin də
azlığı kifayət
qədər narahatlıq
doğuran məqamdır.
Çox
təəssüflər olsun
ki, milli televiziyamızda vətənpərvərlikdən
uzaq olan şouların keçirilməsi
ilə bağlı münasibət bildirən
Azərbaycan Respublikası
Prezidenti Administrasiyasının
rəhbəri, hörmətli
akademik Ramiz Mehdiyevin milli mətbuatda çıxışından
sonra KİV-də hələ də istənilən dərəcədə
dəyişiklik görünmür
və bu sahədə durğunluq davam etməkdədir. Telekanallarda şou-biznes proqramları öz işini görməkdədir. Nədənsə ictimai mühitimizi formalaşdıran və onun daşıyıcıları
olan ziyalılarımız
da hələ ki, susur. Görünür, yüz illərlə
laqeydlik ucbatından başımıza gələnlər
hələ də bizlərə dərs olmamışdır.
Hamıya məlumdur ki, milli mətbuatımızın
adı böyük təbiət alimi, görkəmli ictimai-siyasi
xadim, mübariz ədib, jurnalist, fədakar xalq müəllimi Həsən
bəy Zərdabi ilə bağlıdır. XIX əsrin ikinci yarısında Həsən
bəy Azərbaycanda milli mətbuatın banisi kimi yorulmadan
Azərbaycan maarifini inkişaf etdirməyə,
müasirləşdirməyə çalışmış və
öz zamanında elmin bütün nailiyyətlərinin təbliğatçısı
olmuşdur.
Həsən bəy Zərdabi mükəmməl təhsili,
qabaqcıl dünya ictimai fikrinin təsiri ilə yetişmiş alimlərdən
idi. O, hələ Moskvada
rus məktəblərində
müəllimlik etdiyi
vaxtlarda fövqəladə
istedada malik ciddi bir alim
kimi tanınmış,
qabaqcıl elmin və mədəniyyətin
xeyirxah dostu olduğunu öz işi ilə isbat etmişdir.
Həsən bəyin Azərbaycana qayıtdığı illər
ictimai fikrin yeni yüksəlişi dövrünə təsadüf
etmişdi. O, öz müasirləri kimi bir həqiqəti çox aydın dərk edə bildi: maarifə, yeni fikirlərə geniş yol açmaq lazımdır!
H.Zərdabi yaradıcılığının əsas qayəsini Azərbaycan xalqının
milli və mənəvi həyatında
axtarmaq lazımdır. Bu mənada onun yaradıcılığında mənsub olduğu xalqın həyatı və məişəti ilə sıx bağlılığı, azərbaycanlıların
təsərrüfat məşğuliyyəti,
maddi və mənəvi mədəniyyət
məsələlərinin genişliyi
öz əksini tapmışdır.
Mətbuatın səviyyəsi də, problemləri də cəmiyyətin xarakteri ilə, ümumi inkişaf səviyyəsi ilə şərtlənir. İctimai-siyasi sarsıntılar, keçidlər,
inqilablar dövründə
cəmiyyət ahəngdar
inkişaf yolundan çıxır, müxtəlif
daxili tərəflər
arasında tarazlıq
pozulur. Bu və ya digər
amilin həddindən artıq aktivləşməsi
nəticəsində cəmiyyət
öz daxili müvazinətini itirir, iqtisadi, sosial və mədəni-mənəvi
disbalans yaranır.
Cəmiyyətdə dəyişilmələr təkamül yolu ilə deyil, sıçrayışlar, çevrilişlər,
inqilablar yolu ilə baş verdikdə insan ilə ictimai mühit arasında olduqca müxtəlif ziddiyyətlər ortaya çıxır.
Dövlət senzurası ləğv olunduqdan və nəzarət funksiyası
mətbuatın öz
daxili əqidə və mənəviyyat senzoruna həvalə edildikdən sonra mətbuat haqqında diskussiyalar, fikir mübadiləsi səngimək
bilmir. Azad fikir
və azad söz şəraitində
mətbuatın qarşısında
özünü dərk
etmək vəzifəsi
qoyulmuşdur. Lakin bu,
heç də təkcə mətbuatın
öz vəzifəsi olmayıb, bütün cəmiyyəti düşündürən
aktual problemlərdən
biridir. Mətbuat bazar iqtisadiyyatı
şəraitində də
başlıca missiyasını
unutmamalıdır. Peşəkar jurnalist cəmiyyət, xalq, millət qarşısında peşə
borcunu vicdanla yerinə yetirməli, ictimai rəyin reallığa adekvat surətdə formalaşmasına
nail olmalıdır. İctimai şüurun
düzgün yönəldilməsi,
hadisələrə ədalətli
qiymət verilməsi üçün əvvəlcə
jurnalistin özündən
obyektiv məntiqi təhlil qabiliyyəti və ədalət hissi tələb olunur.
Lakin bəzən
"söz azadlığı"
şüarının parıltısı
fonunda meyarlar itir. Sözün daşıdığı həqiqət yükü,
məsuliyyət arxa plana keçir və söz özü gerçəklikdən
ayrılmış dəyərə
çevrilir. Məsuliyyət itdikdə, meyar unudulduqda söz meydanına girmək asan olur. Sözə haqlı da, haqsız da eyni imkanla malik
olur. Haqq sözü ilə
nahaq sözün ictimai rəyi formalaşdırmaq sahəsində
bərabər imkanları
yaranır. Düzgün seçim etmək məsuliyyəti yenə də oxucunun üzərinə düşür.
Və burada ənənəvi paradoksallıq yenə də özünü göstərir. Bir tərəfdən,
ictimai şüurun
real səviyyəsi və
cəmiyyətin mövcud
mənəvi durumu mətbuat üçün
meyar olur. Digər tərəfdən, bu mətbuatın üzərinə
ictimai şüuru inkişaf etdirmək vəzifəsi düşür.
Bunun üçün
isə ya jurnalistin mənəvi səviyyəsi cəmiyyətin
orta mənəviyyat göstəricisindən heç
olmazsa bir az yüksək
olmalıdır, ya da o bu yüksəlişə
cəmiyyətin elitasının
mövqeyini kütlələrə
çatdırmaqla nail olmalıdır.
Söz azadlığı ideyası təhrif edildikdə və mütləqləşdirildikdə mətbuatı idarə edən ancaq bazar prinsipləri olur. Qəzeti maliyyələşdirmək və hətta ondan mənfəət götürmək üçün sensasiyalı məqalələr dalınca qaçmaq, yalana, şantaja, təhqirə, ədəbsizliyə, pornoqrafik lövhələrə səxavətlə yer vermək və bununla da qəzetin satılmasına nail olmaq, əlbəttə, ilk baxışda rahat yolla qazanc götürməyin bir üsulu sayıla bilər. Lakin bu, ancaq ilk baxışda belədir.
Əsl mətbuat bazar iqtisadiyyatının bütün təbəddülatlarından alnıaçıq çıxmalıdır. Əhalinin şüurlu təbəqəsinə ünvanlanan, insanların təfəkkür mədəniyyətini inkişaf etdirən, həqiqətən millətin tərəqqisinə xidmət edən qəzet, jurnal buraxmaq çətindir. Çox çətindir! Lakin başqa yol yoxdur! İtirilən, sərf olunan milli mənafe və dəyərlər yox, şəxsi zəhmət, ilkin intellektual potensial olmalıdır.
Dünyada gedən bütün bu prosessləri dərk etmək, qələmin və ya telekanalların törətdiyi "mədəni" cinayətlərin qarşısını almaq üçün milli mətbuat və MTRŞ bütün qüvvələrini səfərbər edərək milli maraqları təmsil etmək və müdafiə etmək mövqeyində dayanmalıdır. KİV digər funksiyalarla yanaşı, gənc nəslin tərbiyəsi işində də məsuliyyət daşıdığını unutmamalıdır.
Xanhüseyn KAZIMLI,
ASRP-nin sədri,
Milli Məclisin deputatı,
iqtisad elmləri doktoru,
professor
Azərbaycan.-2014.- 22 iyul.- S.6.