Naftalan dünyanın ən gözəl kurortlarından birinə çevriləcək

İstirahət-müalicə mövsümünün qızğın çağıdır. Naftalana gələnlərin ardı-arası kəsilmir. Cari ildə bu səfalı diyar qonaqları xüsusi hazırlıqla qarşılayır. Bağların, parkların, xiyabanların sayı xeyli artıb, yaşıllıqların miqyası genişlənib. Geniş bir sahədə bayraq meydanı yaradılıb. Sosial problemlər sistemli surətdə həll olunur. Təkcə bir faktı qeyd eləmək kifayətdir ki, çoxmərtəbəli 15 binanın dam örtükləri təzələnib, fasadları müasir ornamentlərlə bəzədilib, illər boyu istifadəsiz qalan liftlər işə salınıb.

Daha 17 binada təmir-bərpa işləri görülür. Naftalanın iqtisadiyyatı sürətlə inkişaf edir.

Bütün bunlar haqqında cari ilin birinci yarısında görülmüş işlər və qarşıda duran vəzifələr barədə keçirilən toplantıda ətraflı söhbət açıldı. Əvvəlcə şəhər icra hakimiyyətinin başçısı Natiq Aslanovun məruzəsi dinlənildi. Sonra ayrı-ayrı kollektivlərin nümayəndələri görülən işlər barədə məlumat verdilər. Yekdilliklə qeyd olundu ki, son illərdə Naftalan ictimai həyatın hər sahəsində sürətlə inkişaf edir. Cari ilin altı ayında ümumi məhsul istehsalının həcmi ötən illə müqayisədə 69,1 faiz artmışdır. Şəhər sakinlərini narahat edən problemlər ardıcıl surətdə həll olunur, aztəminatlı ailələrin sosial müdafiəsi sahəsində geniş işlər görülür. 105 ailəyə ünvanlı sosial yardım verilib. 49 nəfər tənha, ahıl və əlil vətəndaşa xidmət göstərilib. Ötən müddət ərzində 113 nəfər daimi işlə təmin olunub. Balaca kurort şəhəri üçün bu o qədər də kiçik rəqəm deyil.

Ən əsası budur ki, dövlət başçısının qayğısı və köməyi sayəsində Naftalanın əvvəlki şöhrəti bərpa olunur. "Çinar" və "Qaşaltı" kimi müasir quruluşlu sanatoriya kompleksləri istifadəyə verilib. Həm mehmanxana, həm müalicə ocağı, həm də istirahət mərkəzi kimi bütün şərait yaradılıb. Daha bir yeni tikintidə - "Qarabağ" adlı beşmərtəbəli kompleksdə inşaat işləri başa çatmaq üzrədir.

Sahibkarlıq inkişaf etdikcə özəl sanatoriyaların şəbəkəsi də genişlənir. "Şəfa vannaları", "Müalicə-sağlamlıq mərkəzi", "Möcuzəli Naftalan", "Sehrli Naftalan " və s. sağlamlıq-turizm mərkəzlərində xidmət müasir tələblərə cavab verir.

"Azərbaycan Respublikasında kurortların 2009-2018-ci illərdə inkişafı üzrə Dövlət Proqramına" uyğun olaraq istirahət- əyləncə müəssisələrinin yenidən qurulması ilə bağlı bir sıra tədbirlər görülür. Dövlət başçısının sərəncamına əsasən altı kilometr uzunluğunda Naftalan-Qaşaltı-Qaraqoyunlu avtomobil yolu əsaslı təmir olunub, yaşıl zolaqlar salınıb və yeni yol-bəzək daşları düzülüb, qrunt suları üçün suötürücülər tikilib. Şəhərin səfalı guşəsində 280 yerlik körpələr evi - uşaq bağçası istifadəyə verilib, avtovağzal kompleksinin, polis şöbəsinin və Naftalan bələdiyyəsinin inzibati binalarının tikintisi davam edir. 80 yerlik Mərkəzi Şəhər Xəstəxanasının inşası üçün layihə smeta sənədləri hazırlanır.

Ən böyük narahatlıq su sarıdan idi. İndi bu problem də kompleks şəkildə həll olunur. Azərbaycan höküməti ilə Yaponiya Beynəlxalq Əməkdaşlıq Agentliyinin birgə maliyyələşdirdiyi layihə çərçivəsində sistemli işlər görülür. Həmin layihə 2035-ci ilə kimi perspektiv inkişaf nəzərə alınmaqla hesablanmışdır. Bu məqsədlə Ballıqaya-Goranboy kəmərindən səkkiz kilometr uzunluğunda magistral su xətti çəkilib, hər birinin həcmi 3 min kubmetr olan iki anbar tikilib. Bununla yanaşı 33 kilometr uzunluğunda kanalizasiya şəbəkəsi yaradılır. İndiyə kimi həmin şəbəkənin xeyli hissəsində işlər başa çatıb, çirkab suların təmizlənməsi üçün müvafıq qurğular inşa edilib.

Naftalanlılar deyirlər ki, bütün bunlar regionların sosial-iqtisadi inkişafına xüsusi önəm verən dövlət başçısı İlham Əliyevin tükənməz qayğı və diqqətinin bəhrəsidir. Regionların sosial-iqtisadi inkişafı dövlət proqramlarının icrasına həsr olunmuş konfransda Prezident İlham Əliyev qeyd etmişdi ki, "biz Naftalanın keçmiş şöhrətini bərpa edirik. Naftalan vaxtilə Ümumittifaq turizm mərkəzi idi. Bu gün biz bunu beynəlxalq turizm mərkəzinə çeviririk. Artıq iki gözəl hotel fəaliyyət göstərir, üçüncüsü də tikilir"...

Şəhər icra hakimiyyətinin başçısı Natiq Aslanov deyir ki, beynəlxalq səviyyədə turizm və mədəniyyət əlaqələrinin inkişafı məqsədilə Fransanın Leqi və İtaliyanın Pozitano şəhərləri ilə əməkdaşlıq edilir. Onu da qeyd edək ki, Fransanın Bas-Normandi regionunun Orn departamentindəki Leqi şəhərinin əsası Xl əsrdə qoyulub. İtaliyanın Pozitano şəhəri isə əfsanəyə görə dəniz allahı Paseydon tərəfindən salınıb.

Naftalan şəhəriylə Rusiya federasiyasının daha bir kurort şəhəri - Yessentuki administrasiyası ilə əməkdaşlıq və qardaşlaşma haqqında saziş imzalanmışdır. Bu, bizdə qəti inam yaradır ki, yaxın vaxtlarda möcuzələri ilə ölkədə məşhur olan Naftalan dünya miqyaslı müalicə-sağlamlıq, səyahət və turizm mərkəzinə çevriləcəkdir.

Bu günlərdə Naftalan yay mövsümünün beş mininci qonağını qəbul etdi. 2010-ci illə müqayisədə bu, iki dəfə çoxdur. Burada istirahət etmək, dincəlmək və həm də müalicə almaq üçün həmişə boş otaq, ya da bahalı lüks nömrə tapmaq mümkündür.

Əhməd İSAYEV,

Azərbaycan.-2014.- 24 iyul.- S.6.