Milli-mənəvi sərvətlərimiz keçmişimizlə gələcəyimiz arasında körpüdür

Festivalın başlanmasına az qalırdı. Şimaldan gələn qara bulud göyün üzünü birdən-birə bürüdü. Güclü yağış yağmağa başladı. Festival iştirakçıları islanmalarına baxmayaraq, öz milli musiqi və rəqsləri ilə Masallı Rayon İcra Hakimiyyətinin qarşısında qurulmuş tribunanın önündən keçdilər. Rayon rəhbərliyi, Mədəniyyət və Turizm Nazirliyinin məsul işçiləri, Masallı rayonundan seçilən deputatlar, festivalın keçirilməsində əməyi olan alimlər, xarici ölkələrdən olan qonaqlar burada idilər.

Tədbirə gələnlər Heydər Əliyev meydanından keçərək şəhərin mərkəzində yerləşən Nizami Gəncəvi adına parka gəldilər. Rayon Mədəniyyət evi, habelə bir sıra ictimai binalar burada yerləşir. Parkda Masallının tarixini, adət-ənənəsini əks etdirən müxtəlif sənət nümunələri nümayiş etdirilirdi.

Günortadan sonra yağış dayanmış, Günəş öz zərrin şüalarını ətrafa səpələmişdi. Bu isə hər bir Masallı əhlində, folklor tədbiri iştirakçısında xoş ovqat yaradırdı. Şəhərin bayramsayağı bəzədilməsi də indi aydın görünürdü.

Axşam folklor iştirakçıları "Nağıl dünyası" İstirahət Mərkəzində toplaşdılar. Burada onlar bir nağıl dünyası yaşadılar. Folklor qruplarının rəhbərləri çıxış edərək belə bir tədbirdə iştirak etdiklərindən məmnun olduqlarını, bunun üçün Azərbaycanın Mədəniyyət və Turizm Nazirliyinə, Masallı Rayon İcra Hakimiyyətinə, bu işdə əməyi keçənlərin hamısına təşəkkürlərini bildirdilər. Qardaş Türkiyənin ölkəmizdəki səfirinin müşaviri özü ilə gətirdiyi hədiyyəni rayon icra hakimiyyətinin başçısına təqdim etdi. Sonra gecə yarısına qədər xoş musiqilər, oynaq, hərarətli rəqs nömrələri bir-birini əvəz etdi. Ağcabədi rayonundan gələn xanəndələrin ifasında "Qarabağ şikəstəsi" qanad açaraq dağların zirvəsinə ucaldı.

Elə burada xarici ölkələrdən gələn festival qrupu rəhbərlərinin bir neçəsi ilə görüşüb fikirlərini öyrəndik.

Litvalı Raymandas MİKOLAYTİS: "Masallı gözəl təbiətə malikdir. Artıq ikinci gündür buradayıq. Göstərilən mehribanlığa, qonaqpərvərliyə görə deməyə söz tapa bilmirəm. Folklor festivalı əhəmiyyətinə görə misilsizdir. Müxtəlif xalqların kollektivləri bir-birinin keçmişi, adət-ənənəsi ilə tanış olmaqla bərabər, dostluq əlaqələri yaradırlar. Burada bir neçə nəfərlə tanış olmuşam. Masallıya yenə gəlmək arzusundayam".

Türkiyəli Semih CAMEL: "Qardaş Azərbaycan torpağında olmaqdan çox məmnunam. İlk dəfədir Masallıya gəlmişəm. Çox yaxşı yerdir. Təbiəti kimi, insanları da gözəldir. Folklor qrupumuzun tərkibində 17 sənətçi var. Dilimiz, dinimiz kimi, folklorumuz da eyni qaynaqdan bəhrələnib. Altaydan Azərbaycana, Anadoluya kimi bir yol keçib gəlib. Bizim borcumuz onu yeni nəsillərə çatdırmaqdır. Bu baxımdan folklor festivalının əhəmiyyəti çox böyükdür. Bir sözlə, iftixar hissi keçirirəm. Ona görə ki, Heydər Əliyevin dediyi kimi, biz bir millət, iki dövlət olmaqla ən çətin və ən mutlu günlərdə bir olmuşuq. Bu birlik indi daha böyük önəm kəsb edir. Çünki bizi istəməyənlər də var. Qarabağ probleminin həlli üçün Türkiyə həmişə Azərbaycanın yanındadır".

Təbrizli Böyükbəy ƏLƏKBƏROĞLU: "Üç ildir ki, ard-arda Masallıda keçirilən folklor festivalında iştirak edirik. Bütün işlər yüksək səviyyədə təşkil olunub. Keçən illə müqayisədə Masallı daha abad və gözəl olub. Bunları gördükcə adamın ürəyi dağa dönür. Vətənin o başı, bu başı olmaz. Masallı da, Təbriz də qədim Azərbaycan torpaqlarıdır. Folklor qrupumuza 15 nəfər daxildir. Hər il olduğu kimi, bizi yenə böyük məhəbbətlə qarşılayıb diqqət göstərirlər. Buna görə Azərbaycanın Mədəniyyət və Turizm Nazirliyinə, Masallı Rayon İcra Hakimiyyətinə öz dərin təşəkkürümüzü bildiririk".

Ertəsi günü Heydər Əliyev Mərkəzində Masallı folkloru haqqında yazılmış 2 cildlik "Masallı folkloru" kitabının təqdimat mərasimi keçirildi. Tədbiri açan Masallı Rayon İcra Hakimiyyətinin başçısı festivalın keçmişlə gələcək arasında mənəvi körpü rolu oynadığından, bu zəngin xəzinənin gənc nəslə çatdırılmasının əhəmiyyətindən danışdı. 2 cildlik kitabın müəllifi professor Fərahim Sadıqov folklor toplusunun ərsəyə gəlməsində rolu olan rayon rəhbərliyinə, məktəb kollektivlərinə təşəkkürlərini bildirdi. Müzakirələrdə çıxış edən filologiya elmləri doktoru, professor Füzuli Bayat, Milli Məclisin deputatı Elmira Axundova və başqaları da əsərin məziyyətlərindən danışdılar. Folklor qrupları həmin gün rayonun Tüklə və Qızılağac kəndlərinə gedərək əhali qarşısında folklor nümunələrindən ibarət maraqlı konsert verdilər.

Festivalın 3-cü günü Heydər Əliyev parkında final konserti oldu. Hər çıxış tamaşaçılar tərəfindən alqışlarla qarşılandı. 8 ölkədən gəlmiş 16 folklor kollektivinin hər biri diplom və xatirə hədiyyələri ilə mükafatlandırıldı. Atəşfəşanlıq başladı. Kollektiv üzvləri növbəti il keçiriləcək folklor bayramında yenidən bir araya gəlmək ümidi ilə görüşüb ayrıldılar.

Seyran CAVADOV,

Azərbaycan.-2014.- 18 iyun.- S.13.