Oğuzun turizm potensialı artır

Böyük Qafqazın ətəklərində yerləşən Oğuz Azərbaycanın zəngin təbiətə malik bölgələrindəndir. Rayonumuzun dağ və dağətəyi meşəlikləri, buz bulaqları, coşqun çayları, şəlalələri gələn qonaqların gözünü-könlünü oxşayır.

Qədim memarlıq abidələrinə, təbiətinə, flora və faunasına, insanlarının qonaqpərvərliyinə, milli mətbəxinə, çeşidli şirniyyat növlərinə, ekoloji cəhətdən təmiz havasına görə də Oğuz istər yerli, istər əcnəbi turistləri valeh edir.

Onu da qeyd edək ki, rayonumuzun siması son illər tanınmaz dərəcədə dəyişib. Oğuz şəhərində yeni parklar, xiyabanlar salınıb, yollar asfaltlaşdırılıb, sosial obyektlər və yaraşıqlı evlər tikilib. Bunlarla yanaşı, son illər bir sıra turizm obyektləri də inşa edilərək istifadəyə verilib. 2008-ci ildən fəaliyyət göstərən "AFRA" hoteli bu sahənin inkişafına xeyli təkan verib. 65 yerlik hoteldə qonaq və turistlər üçün hər cür şərait yaradılıb.

Baş Daşağıl kəndindəki "Saf təbiət", Xaçmaz kəndindəki "Təpə yeri", şəhərin şimalında yerləşən "Oğuz turizm" istirahət mərkəzlərində hər il yüzlərlə turist dincəlir. Hazırda Oğuzda 14 ailəvi istirahət mərkəzi fəaliyyət göstərir. "Palma", "Oğuz eli", "Qaynama", "Farel", "Gözəllik" ailəvi istirahət mərkəzlərində rayonumuzun qonaqlarına və turistlərə nümunəvi xidmət göstərilir. Bir neçə yeni hotel və ailəvi istirahət mərkəzi də inşa edilməkdədir. Müqayisə üçün qeyd edək ki, 2012-ci ildə rayona 4300 turist gəlmişdisə, 2013-cü ildə bu rəqəm 12000 nəfər olub. Şübhəsiz, turizmin inkişaf etdirilməsində tarix və mədəniyyət abidələrinin, tarixi yerlərin əhəmiyyəti böyükdür. Bu baxımdan Oğuzun qədim və zəngin tarixi var. Rayonumuzun müxtəlif ərazilərində yerləşən qədim abidələr tarixin bütün dövrlərindən soraq verir.

Azərbaycan Respublikası Nazirlər Kabinetinin 2 avqust 2001-ci il tarixli 132 saylı qərarı ilə 32 tarix və mədəniyyət abidəsi dövlət mühafizəsinə götürülüb. Bu abidələrdən qədim Alban məbədləri, Muxas qülləsi, Gavur qala, Kərimli türbəsi, Surxayxan qalası, məscidlər turistlərdə daha çox maraq doğurur. Şöbəmiz tərəfindən 5 yeni abidə haqqında məlumatlar hazırlanaraq Mədəniyyət və Turizm Nazirliyinə göndərilib. Bu abidələrdən son tunc erkən dəmir dövrünə aid edilən Kərimli kurqanları rayonumuzun qədimliyini sübut edir. Aparılan təmir və bərpa işləri sona çatdırıldıqdan sonra bu kurqanlar da turistlərin üzünə açılacaq.

Rayon tarix-diyarşünaslıq muzeyi vaxtaşırı olaraq "Oğuzun tarixini öyrənək" devizi altında tarix və mədəniyyət abidələrinə ekskursiyalar təşkil edir.

Muzey tərəfindən turizmin inkişaf etdirilməsi və təbliği sahəsində xeyli işlər görülüb. "Oğuza xoş gəlimişsiniz", "Oğuz əcdadlarımızın nəsillərə əmanəti - Oğuz abidələri", "Cənnətməkan diyar Oğuz" adlı 3000-dən artıq buklet çap olunaraq rayonun qonaqlarına və turistlərə paylanıb. Oğuzun təbiət gözəlliklərini, tarixi abidələrini əks etdirən bannerlər hazırlanaraq yol kənarlarına vurulub. Rayonumuzun turizm potensialı, milli mətbəxi, sənətkarların əl işləri 2012-ci ilin mart ayında Moskva şəhərində keçirilmiş ümumdünya turizm və səyahətlər sərgisində, 2013 və 2014-cü ilin aprel ayında Bakı şəhərində təşkil olunmuş beynəlxalq turizm və səyahətlər sərgisində nümayiş etdirilib. Hər il Oğuzun turizm potensialı, tarix və mədəniyyət abidələri, milli adət-ənənələrimiz və mətbəximiz haqqında verilişlər hazırlanır və müxtəlif televiziya kanallarında nümayiş olunur. Turizmin təbliği məqsədilə rayonda ilk dəfə 2013-cü ilin sentyabr ayının 27-də dünya turizm günü münasibəti ilə tədbir keçirilib.

Oğuzun mədəniyyət evlərində və klublarında turizmi təbliğ etmək üçün sənətkarların əl işlərindən ibarət sərgilər, tarixi abidələrimizi əks etdirən fotostendlər təşkil edilir. Rayon mədəniyyət evində yaradılmış "Xalçakəsdi" folklor, "Bayram" zurnaçılar kollektivi, Filfilli, Baş Daşağıl, Bucaq və Kərimli kənd klublarında folklor rəqs qrupları fəaliyyət göstərir.

Rayonun çövkan komandası hər il respublika Atçılıq Turizm Mərkəzində təşkil edilən milli atüstü oyunlar festivalında uğurla çıxış edir. Milli kulinariyamızın təbliği məqsədilə Qəbələ şəhərində ilk dəfə keçirilmiş mürəbbə festivalında rayonumuzun nümayəndələri üçüncü yerə layiq görülüb. Bir sözlə, dövlətin qayğısı sayəsində aparılan geniş tikinti-quruculuq və abadlıq işləri Oğuzu gözəl bir turizm məkanına çevirib.

Ulduz BAXIŞOVA,

Oğuz Rayon Mədəniyyət və Turizm Şöbəsinin müdiri

Azərbaycan.-2014.- 18 iyun.- S.13.