Azərbaycan ilə Rusiya arasında əməkdaşlıq təkcə ikitərəfli

formatda deyil, həm də regional səviyyədə intensiv inkişaf edir

İyunun 18-də Azərbaycan Respublikasının xarici işlər naziri Elmar Məmmədyarov

Rusiya Federasiyasının xarici işlər naziri Sergey Lavrov ilə görüşmüşdür.

AzərTAc xəbər verir ki, əvvəlcə təkbətək, sonra geniş formatda keçirilən görüşdən sonra nazirlər mətbuat konfransı keçirmişlər.

Azərbaycan-Rusiya əlaqələrinin strateji xarakter daşıdığını deyən Elmar Məmmədyarov bildirmişdir ki, ölkələrimiz arasında iqtisadi əməkdaşlıq sürətlə inkişaf edir. E. Məmmədyarov rusiyalı həmkarı ilə görüşdə ikitərəfli əlaqələrin daha da dərinləşdirilməsi yollarına dair səmərəli fikir mübadiləsinin aparıldığını diqqətə çatdırmışdır. O, söhbət zamanı Ermənistan-Azərbaycan, Dağlıq Qarabağ münaqişəsinin də müzakirə mövzusu olduğunu söyləmişdir.

Ölkələrimiz arasında münasibətlərin inkişafında parlamentlərarası əlaqələrin də mühüm rol oynadığını qeyd edən E.Məmmədyarov həyata keçirilən qarşılıqlı səfərlərin əhəmiyyətini vurğulamışdır.

Sergey Lavrov bildirmişdir ki, Azərbaycan ilə Rusiya arasında əməkdaşlıq təkcə ikitərəfli formatda deyil, həm də regional səviyyədə intensiv inkişaf edir.

Hər iki ölkənin strateji tərəfdaşlar olduğunu vurğulayan S.Lavrov azərbaycanlı həmkarı ilə danışıqların səmərəli şəkildə keçdiyini bildirərək demişdir: “Biz münasibətləri dostluq, qarşılıqlı anlaşma əsasında inkişaf etdiririk. Ötən dövrdə nümayəndə heyətlərinin ən intensiv mübadiləsi məhz Azərbaycan ilə baş vermişdir”.

Keçən ilin avqustunda Prezident Vladimir Putinin Azərbaycanda səfərdə olduğunu xatırladan S.Lavrov bu ay parlament və digər rəsmi səviyyələrdə Rusiya nümayəndə heyətlərinin ölkəmizə səfər edəcəklərini bildirmişdir. O, yüksək səviyyəli qarşılıqlı səfərlərin əlaqələrimizin daha da inkişafına töhfə verdiyini əlavə etmişdir.

Azərbaycanın Avropa Şurası Nazirlər Komitəsinə sədrlik etdiyini xatırladan rusiyalı nazir görüşdə ölkələrimiz arasında əməkdaşlığın beynəlxalq təşkilatlar çərçivəsində inkişafı ilə bağlı razılıq əldə olunduğunu da söyləmişdir.

S.Lavrov bildirmişdir ki, söhbət zamanı, həmçinin Xəzər dənizinin hüquqi statusu ilə bağlı məsələyə də toxunulmuş, bu ilin sentyabrında Həştərxanda keçiriləcək sammitə hazırlıq müzakirə olunmuşdur.

Azərbaycan.-2014.- 19 iyun.- S.2.