Azərbaycan Respublikasının baş

prokuroru Gəncə şəhərində vətəndaşları qəbul etmişdir

Azərbaycan Respublikasının Prezidenti İlham Əliyevin göstəriş və tövsiyələrinə müvafiq olaraq vətəndaşların qəbulu, onların müraciətlərinə vaxtında baxılması və haqlı tələblərinin təmin edilməsi bütün dövlət qurumlarının əsas vəzifələrindən biri kimi müəyyənləşdirilmişdir.

Baş prokuror Zakir Qaralov bölgələrdə vətəndaşların qəbulu cədvəlinə uyğun olaraq iyunun 20-də Gəncə Şəhər Prokurorluğunun inzibati binasında Gəncə şəhərindən, Göygöl, Samux, Daşkəsən, Xocalı, Goranboy və Kəlbəcər rayonlarından olan vətəndaşları qəbul etmişdir.

Azərbaycan Respublikası Baş Prokurorluğunun mətbuat xidmətindən AzərTAc-a bildirmişlər ki, qəbuldan əvvəl baş prokuror Zakir Qaralov və Gəncə Şəhər İcra Hakimiyyətinin başçısı Elmar Vəliyev yenidən qurulan Heydər Əliyev parkında Ulu Öndərin abidəsini ziyarət etmiş, önünə gül dəstələri düzərək əziz xatirəsini ehtiramla yad etmiş, Heydər Əliyev Mərkəzi ilə tanış olmuşlar.

Baş Prokurorluğun məsul əməkdaşlarının, habelə əlaqədar tabe prokurorların iştirakı ilə keçirilən qəbulda baş prokuror bölgədə yaşayan 100-dən artıq vətəndaşın müraciətlərində qaldırılan və bilavasitə prokurorluq orqanlarının səlahiyyətlərinə aid olan məsələlər üzrə onların qanunauyğun və operativ şəkildə həll edilməsi üçün əlaqədar struktur qurumlarının rəhbərlərinə və tabe rayon prokurorlarına müvafiq göstərişlər vermişdir.

Gün ərzində baş prokuror tərəfindən qəbul edilən vətəndaşların müraciətlərinin böyük əksəriyyəti elə yerindəcə öz həllini tapmışdır.

Vətəndaşların ərizə və şikayətlərində qaldırdıqları məsələlərin, o cümlədən konkret cinayət işlərinin istintaqı və törədilmiş cinayətlər barədə məlumatların araşdırılması zamanı yol verilmiş qanun pozuntuları ilə əlaqədar və sosial problemlərə aid müraciətlərin bilavasitə prokurorluqda və ya aidiyyəti üzrə müvafiq icra orqanlarında operativ həlli üçün zəruri tədbirlərin görülməsi təmin edilmişdir.

Eyni zamanda, qeyd edilən rayonların prokurorlarının iştirakı ilə müşavirə keçirilməklə cinayətkarlığa qarşı mübarizənin səmərəliliyi və kəsərliliyinin artırılması üçün konkret tapşırıqlar verilmiş, vətəndaşların müraciətlərinə obyektiv baxılması və onların qəbulu işinin düzgün təşkilinə görə tabe prokurorların fərdi məsuliyyət daşımaları onların diqqətinə çatdırılmışdır.

Qəbuldan sonra baş prokuror şəhər icra hakimiyyətinin başçısı ilə şəhər prokurorluğunun 4 mərtəbəli müasir və milli memarlıq üslubunda yeni inzibati binasının inşa edildiyi əraziyə gedərək binanın layihələrini əks etdirən stendlərlə tanış olmuş, tikinti işlərinin gedişi ilə maraqlanaraq görülən işlər və ətraf ərazinin abadlaşdırılması ilə əlaqədar tövsiyələrini vermişdir.

Azərbaycan.-2014.- 21 iyun.- S.5.